1 የሱስ ባረና ካልያዋንቶ ኦዲደ፥ “እት ዱረ ብታኒ፥ ባረ ጎልያ ኡባ ቦላ ሱንꬄዳ እት ብታኒ ደኤ፤ ሽን ሀ ብታኒ አ ሚሻ ባይዜ ያግያ ዝግርሳይ አ ጋኬዳ፤ 2 ሄዋ ድራዉ ባረ ሱንꬄዳ ብታንያ ጼሲደ፥ ‘ሀዌ ታን ስስያ የዉ አዬ? ሀንፐ ጉየ ኔን ታ ጎልያንነ ታ ሚሻ ቦላ ታፐ ጋርሳና ሱንታደ ኪተታናዉ ዳንዳያቤና ድራዉ፥ ሀቼ ጋካናዉ ኪተቴዳዋ ሄታደ ሼꬋ’ ያጌዳ።

3 “ሱንቴዳዌ ባረ ዎዛናን፥ ‘ታ ጎዳይ ታና ሱንꬃተꬃፐ ኮላና ሀኔ፤ ሽን ታ ዋኖሻ? ጎሻናዉ ዎልቃይ ታዉ ባዋ፤ ዎሳናዉ ቃይ ታዉ ፖኬ። 4 ታ ኦꬃናባ ታ ኤራይ፤ እ ታና ሱንꬃተꬃፐ ከሶፐ፥ ባረንቱ ጎለ ቢና፥ ታና ሞክያ ላገꬃቱዋ ታን ደማና’ ያጌዳ።

5 “ባረ ጎዳፐ ሻሉዋ ታልኤዳ አሳቱዋ ሁጲያን ሁጲያን ጼሲደ፥ ኮይሮ ብታንያ፥ ‘ኔን ታ ጎዳፐ ዎይሳ ኬና ሻሉዋ ታልኣዲ?’ ያጌዳ።

6 “እካ፥ ‘ታን ጼቱ ባሬታ ኩሜዳ ዛይትያ ታልኣድ’ ያጌዳ።

“ሱንቴዳ ብታኒካ፥ ኔን ፓራማና ዋራቃታ ሄይ፤ ኡታደ ኤለካ ‘እሻታማ’ ጋደ ጻፋ ያጌዳ።

7 “ሄዋፐ ሀራ ብታንያ፥ ‘ኔን አፑኑዋ ታልኣዲ?’ ያጌዳ።

“ ‘ጼቱ ቁንኣ ዛርጋ’ ያጌዳ።

“ሱንꬃይካ፥ ‘ዋራቃታ ሄይ፤ ሆስፑን ታማ ጋደ ጻፋ’ ያጌዳ።

8 “ሄ ሱንꬃይ ጭንጫተꬃን ኦꬄዳ ድራዉ፥ አ ጎዳይ አ ጋላቴዳ፤ አያዉ ጎፐ፥ ሀ አላምያ አሳይ ባረንቱዎ ፖኡዋ አሳፐ አꬌዳ ጭንጫቱዋ።

9 “ታን ህንተንቶ ያጋይ፥ ‘ሀ አላምያ ሻሉ ዉርያ ዎደ፥ መꬍናዉ ዉረና ጎልያን ህንተንታ ሞካና ማላ፥ ሀ ሚሻን ህንተንቶ ላግያ ደምተ። 10 ላፋ የዉዋን አማነቴዳዌ፥ ዎጋባንካ አማነቴ። ሽን ላፋ የዉዋን አማነትቤናዌ፥ ዎጋባንካ አማነተና። 11 ስም ህንተንቱ ሀ አላምያ ሻሉዋን አማነተናዋ ግዶፐ፥ ቱማተꬃ ሻሉዋ ህንተንቶ ኦኔ ሀዳራ ጊደ እማናዌ? 12 ህንተንቱ ሀራ አሳ ሻሉዋን አማነተናዋ ግዶፐ፥ ህንተንቱ ሚሻ ኦኔ ህንተንቶ እማናዌ?’ ጌዳ።

13 “እት ካላ ላኡ ጎዳቶ ቆማታናዉ ዳንዳይያዌ አይ ቆማይካ ባዋ፤ አያዉ ጎፐ፥ እቱዋ እጺደ፥ ሀራ ዶሴ፤ ዎይ እቱዋ ቦንቺደ፥ ሀራ ካꬌ፤ ጾሳዉነ ሻሎ ሞደታናዉ ዳንዳይክታ” ያጌዳ። 14 ሻሉዋ ዶስያ ፓርሳዋቱ ሀዋ ኡባ ስሲደ፥ የሱሳ ቦላ ቅሊጬድኖ። 15 ሽን የሱስ ኡንቱንታ፥ “ህንተንቱ አሳ ስንꬃን ህንተንታ ጽሎ አሳ ኦꬅያዋንታ፤ ሽን ጾሳይ ህንተንቱ ዎዛና ኤሬ፤ አያዉ ጎፐ፥ አሳ ስንꬃን ቦንቼቴዳዌ ጾሳ ስንꬃን ቱና ግዴ።

16 “ሙሴ ህግያነ ናባቱ ጻፌዳ ማጻፋ *ሙሴ ህግያነ ናባቱ ማጻፋ፦ አይሁዳቱዋ ጌሻ ማጻፋቱዋ፤ ሄዋንታ ጉሳይ ኤጫ ጫቁዋ ማጻፋ። ዮሃንሳ ዎድያ ጋካናዉ አሳይ አዛዘቲደ ደኤድኖ፤ ሄዋፐ ካላ ቃይ ጾሳ ካዉተꬃይ ኦደቴዳ፤ አሳይ ኡባይ ያ ገላናዉ ኬሰቴ። ማቶሳ 11:12፣ 13 17 ሽን ህግያፐ እትባይ አትያዋፐ ሳሉነ ሳአይ አꬍያዌ ማታቴ። ማቶሳ 5:18

18 “ባረ ማቻቶ ብሊደ ሀራሮ አክያዌ ኡባይ ዎሹሜ፤ ቃይ አስናፐ ብለቴዳ ማጫዉኖ አክያዌ ኦንነካ ዎሹሜ። ማቶሳ 5:32፤ 1 ቆሮ. 7:10፣ 11

19 “ጋቲ ሎይꬂደ አልኦ ግዴዳ ማዩዋ ማዪድነ ጋላሳን ጋላሳን ኦቶሩዋን ናሸቲደ ደእያ እት ዱረ ብታኒ ደኤ። 20 ቃይካ ኩመንꬃ አሳተꬃን ማይꬃይ ደእያ እት አልኣዛራ ጌተትያ ህዬሳይ፥ ሀ ዱረ ብታንያ ካርያን ግሴዳ። 21 ሀ ዱረ ብታንያ ሳምፓፐ ላለቴዳ ሱፓ ማናዉ አሞቴ፤ ሀራይ አቶ ካናቱካ ዪደ አ ማይꬃ ላጪኖ።

22 “ሀ ህዬሳ ብታኒ ሀይቂና፥ ኪታንቻቱ አ አብራሃሞ ባጋ ቦንቾሳ አፌድኖ፤ ዱረ ብታኒካ ቃይ ሀይቂደ ሞገቴዳ። 23 ስኦልያን ዳሮ ሴለቲደ ደእሽን፥ ꬎቁ ጊደ ሃኩዋን አልኣዛራ፥ አብራሃሞ ባጋን ደእያዋ በኤዳ።

24 “እካ ባረ ኮሻ ꬎቁ ኦꬂደ፥ ‘አብራሃሞ፥ ታ አቦ፥ ታዉ ቃረታ። ሀ ታማ ሴላን መቶታ ደእያ ድራዉ፥ አልኣዛር ባረ ብራꬍያ ጼራ ሃꬃን ቦቺደ፥ ታ እንጻርሳ እርጽሳናዳን ሀያና ታኮ ኪታርኪ’ ያጌዳ።

25 “አብራሃሞ ቃይ፥ ‘ታ ናአዉ፥ ኔን ፓጻ ደኣደ፥ ሎኦ ደኡዋ ደእና፥ አልኣዛር ሎኤና መቶ ደኡዋ ደኤዳዋ ቆፓ። ሀእ ቃይ እ ሀዋን ናሸትያ ዎደ፥ ኔን መቱዋ ቦላ ደኣ።

26 “ ‘ሀዋፐ ሀራይ ቃይ፥ ሀዋፐ ያ ህንተንቱኮ አꬋናዉ ኮይያዋንቱ አናዳን፥ ያን ደእያዋንቱካ ቃይ ሃ ኑኮ ፕነናዳን፥ ኑ ግዶንነ ህንተንቱ ግዶን ዎጋ አፉ መቴዳ’ ያጌዳ።

27 “ዱረ ብታኒካ፥ ‘አብራሃሞ፥ ስም ሄዋ ግዶፐ፥ ኔን አልኣዛራ ታ አቡ ጎለ የዳና ማላ፥ ኔና ዎሳይ። 28 አያዉ ጎፐ፥ ታዉ እቼሹ እሻቱ ደእያ ድራዉ፥ ኡንቱንቱ ቃይ ሀ መቱዋሳ ዬና ማላ፥ ኡንቱንቶ አልኣዛር ቢደ ማርካቶ’ ያጌዳ።

29 “አብራሃሞ ቃይ፥ ‘ሙሴነ ናባቱ ጻፌዳ ማጻፋይ ኡንቱንቶ ደኤ፤ ሄ ማጻፋይ ግያዋ ኡንቱንቱ ስሲኖ’ ያጌዳ።

30 “ዱረ ብታኒ፥ ‘ህኢ፤ አብራሃሞ፥ ታ አቦ፥ ሄዋ ግደና፤ ሽን እት ብታኒ ሀይቁዋፐ ደንዲደ፥ ኡንቱንቱኮ ብንቶ፥ ኡንቱንቱ ባረንቱ ናጋራ ፓጺደ፥ ስማናዋንታ’ ያጌዳ።

31 “አብራሃሞካ፥ ‘ኡንቱንቱ ሙሴነ ናባቱ ጻፌዳ ማጻፋ ስሰናዋ ግዶፐ፥ ሀራይ አቶ እት ኡራይ ሀይቁዋፐ ደንድ ይንቶካ አማንክኖ’ ጌዳ” ያጌዳ።