18
ማንቆ ግዴዳ አምአትባነ ማካላንቻ ዳናባ
1 የሱስ ባረና ካልያዉንቶ፥ ሳለተናን ኡባ ጋላስ ዎሳናዳን ሌምሱዋን ኦዴዳ። 2 እካ፥ “እት ካታማን ጾሳዉ ያየናዌ፥ አሳካ ቦንቼና እት ዳናይ ደኤ። 3 ሄ ካታማን አምኤ ምሽራታ ደአዉ። እዛካ ሄ ዳናኮ ያደ፥ ‘ታ ሞርከዉነ ታዉ ደእያ የዉዋ ፕርዳ’ ያጋዱ።
4 “ዳሮ ዎድያን እዝዉ ፕርደናን እጼዳ። ሽን ባረ ዎዛናን ቆፒደ፥ ‘ታን፥ ኡባ ጾሳዉ ያያና ꬋዮፐካ፥ አሳካ ቃይ ቦንቻና ꬋዮፐ፥ 5 ሀ አምኤ ምሽራታ ታና ላባንꬅያ ድራዉነ ኡባ ዎደ ታኮ ያደ ታና ዳቡርሰና ማላ፥ ታን እዝዉ ፕርዳና’ ጌዳ።
6 “ሄ ማካላንቻ ዳናይ ጎዋ አኬክተ። 7 ጾሳይ ጋላስነ ቃማ ባረንታ ማዳና ማላ፥ ዳንዳያን አኮ ዋስያ ዶረታዋንቶ ፕርደኔየ? እ ኡንቱንቶ ኤለካ ዛረኔ? 8 ታን ህንተንቶ ያጋይ፤ ኡንቱንቶ ኤሌል ፕርዳና፤ ሽን አሳ ናአይ ይያ ዎደ ሀ ቢታን አማኑዋ ደማኔሻ?” ያጌዳ።
ኦቶረትያ ፓርሳዊያነ ባረና ካዉሽሴዳ ቃራጻ ቃንጽያ ብታንያ
9 ባረንታ ጌሻ ጊደ አማነትያዋንቶነ ሀራ ኡባ ዳሪ ካꬍያዋንቶ፥ የሱስ ሀ ሌምሱዋ ኦዴዳ: 10 “ላኡ አሳቱ ዎሳናዉ ጌሻ ጎልያ *ዎሳናዉ ጌሻ ጎልያ፦ አይሁዳ አሳይ ኡባ ዎደ ጌሻ ጎልያን ዎንታ ጉራንነ ጋላሳ ዎስኖ። ገሌድኖ። ሄዋንቱፐ እቱ ፓርሳዊያ፤ እቱ ቃይ ቃራጻ ቃንጽያዋ። 11 ፓርሳዊ ደንድ ኤቂደ ባረ ዎዛናን ዎሲደ፥ ‘ጾሳዉ፥ ታን ሀራ አሳዳን: ቦንቂያዋንቱዳን፥ ማካልያዋንቱዳን፥ ዎሹምያዋንቱዳን፥ ዎይ ሀዋዳን ቃራጻ ሺሸና ድራዉ ኔና ጋላታይ። 12 ሳምንታን ላኡ ካላ ጾማይ፤ ታን ደምያ ኡባፐ ታሙ ኩሽያፐ እቱዋ እማይ’ ያጌዳ።
13 “ሽን ቃራጽያ ብታኒ ሃኩዋን ኤቂደ፥ ባረ አይፍያን ፑደ ሳሉዋ ꬎቁ ጊደ ጼላናዉካ ኮይቤና። ሽን ባረ ትራ ባቂደ፥ ‘ጾሳዉ፥ ታን ናጋራንቻ፤ ታና ማራ’ ያጌዳ። 14 ታን ህንተንቶ ኦድያዌ አዬ ጎፐ፥ ካሰ ብታንያፐ አꬊደ ሀ ብታኒ ጽሎ ግዲደ ባረ ጎለ ስሜዳ፤ ባረና ꬎቁ ኦꬅያ ኡባይ ካዉሻና፤ ባረና ቃይ ካዉሽስያ ኡራይ ꬎቁ ጋና” ያጌዳ።
የሱስ ጉꬃ ናና አንጄዳ
(ማቶሳ 19:13-15፤ ማር. 10:13-16)
15 የሱስ ባረ ኩሽያ ዎꬂደ አንጃና ማላ አሳይ ጉꬃ ናና አኪደ አኮ ዬድኖ። አ ካልያዋንቱካ በኢደ፥ አሳ አሄና ማላ ጌድኖ። 16 የሱስ ቃይ ጉꬃ ናና ባረኮ ጼሲደ፥ “ጉꬃ ናናይ ታኮ ያና ማላ አግተ፥ ድጎፕተ፤ ጾሳ ካዉተꬃይ ሀዋንቱ ማላሳ። 17 ታን ህንተንቶ ቱሙዋ ኦዳይ፤ ጾሳ ካዉተꬃ ጉꬃ ናኣዳን አከናዋንቱ ኡባይ ሄ ካዉተꬃ ሙለካ ገለና” ያጌዳ።
18 ይሁዳ ቢታ ሞድያዋንቱፐ እቱ፥ “ሎኦ ታማርስያዎ፥ ታን መꬍና ደኡዋ ላታናዉ አያ ኦꬃናዉ በሲ?” ያጊደ የሱሳ ኦቼዳ። 19 የሱስካ አዉ፥ “አያዉ ታና ሎኦ፥ ያጋይ? እት ጾሳፐ አትን፥ ሎኡ ኦንነ ባዋ፤ 20 ጾሳ አዛዛቱዋ፥ ‘ዎሹሞፓ፥ ዎꬎፓ፥ ዉኦፓ፥ ዎርዱዋ ማርካቶፓ፥ ነ አባነ ነ ዳዮ ቦንቻ ያግያዋ ኤራ’ ” ያጊደ ዛሬዳ። 21 ብታኒ ዛሪደ፥ “ሀዋ ኡባ፥ ናአተꬃፐ ዶማደ ናጋድ” ያጌዳ።
22 የሱስካ ሀዋ ስሲደ፥ “እትባይ ኔን ብሮን ኦናን አቶዌ ደኤ፤ ሄዌኔካ፥ ነዉ ደእያዋ ኡባ ዛልኣደ ማንቃቶ እማ፤ ሀዋ ኦꬆፐ ሳሉዋንካ ኔን ዱረታና፤ ሄዋፐ ጉየ ታ ጌዱዋ ካላ” ያጌዳ። 23 ሄ ብታኒ ቃይ ሄዋ ስሲደ ዳሮ ዱረ ግዶ ድራዉ ዳሮ ካዮቴዳ።
24 የሱስካ ሀ ብታኒ ዳሮ ካዮቶዋ በኢደ፥ “ዱረ አሳይ ጾሳ ካዉተꬃ ገላናዉ ዎት መታንዴሻ! 25 ዱረ አሳይ ጾሳ ካዉተꬃ ገላናዋፐ ጋሉ ማርፕያ ጾእያና አꬋናዌ ማታቴ” ያጌዳ። 26 ሄዋ ስሴዳ አሳይ፥ “ስም ኦን አታናዉ ዳንዳዪ?” ያጌድኖ።
27 እካ ቃይ ዛሪደ፥ “አሳዉ ዳንዳየተናዌ ጾሳዉ ዳንዳየቴ” ያጌዳ። 28 ጰጽሮስ ዛሪደ፥ “ስም ኑን ኑዉ ደእያ ኡባ አጊደ ኔና ካሌዶ” ያጌዳ። 29 እካ፥ “ቱሙዋ ጋይ፥ ጾሳ ካዉተꬃ ድራዉ ባረ ጎልያ፥ ዎይ ባረና የላዋንታ፥ ዎይ ባረ ማችያ፥ ዎይ ባረ ናና፥ ዎይ እሻቱዋ አጌዳዌ፥ 30 ሀ ዎድያን ዳሮ ዳኩዋ፥ ስንꬃ ይያ ካዉተꬃንካ መꬍና ደኡዋ አከናዌ ኦንነ ባዋ” ያጌዳ።
የሱስ ባረ ሀይቁዋባ ሄዘንꬁዋ ኦዴዳ
(ማቶሳ 20:17-19፤ ማር. 10:32-34)
31 የሱስካ ታማነ ላኡ ባረና ካልያዋንታ ባረኮ ጼሲደ፥ “ስም የሩሳላመ ባና፤ አሳ ናኣባይካ ናባቱ ማጻፋን ጻፈቴዳባይ ኡባይ ያን ፖለታና። 32 አይሁደ ግደናዋንቶ አ አꬅ እማና፥ ቅሊጫና፥ ዳሮ መቶꬃና፥ አ ቦላን ጩቻና፤ 33 ሾጮዋፐ ጉይያን ዎꬋና፥ ሄዘንꬅያ ጋላስ እ ደንዳና” ያጌዳ።
34 ኡንቱንቱካ ሀ የዉዋፐ አያነ አኬክበይክኖ፤ ሀይቁካ ኡንቱንቶ አኬከትቤና ድራዉ እ ሃሳዮባካ ኤርበይክኖ። 35 የሱስ እያርኮኮ ማቴዳ ዎድያን፥ እት ቆቃ ብታኒ ዎሲደ ኦግያ ጋጻን ኡቴዳ። 36 ጮራ አሳይ አꬍያዋ ስሲደ፥ “ሀዌ አዬሻ?” ያግ ኦቼዳ። 37 አሳይካ አዉ፥ “ናዝሬትያ የሱስ ሀዋና አꬍ ደኤ” ያግ ዛሬድኖ።
38 እካ፥ “ዳዊተ ናኣ የሱሳ፥ ታና ማራርኪ” ጊደ ዋሴዳ። 39 አፐ ስንꬃና ቢደ ደእያዋንቱካ፥ ጮኡ ጋናዳን ሀንቀቴድኖ። እ ቃይ፥ “ዳዊተ ናአዉ፥ ታና ማራርኪ” ጊደ ዳሪ ዋሴዳ።
40 የሱስካ ኤቂደ፥ ባረኮ አሀናዳን አሳዉ ኦዴዳ። 41 የሱሳኮ እ ጼቱዋ ዎድያን፥ የሱስ፥ “ታን ነዉ አያ ኦꬃናዳን ኮያይ?” ያጊደ አ ኦቼዳ።
እካ ዛሪደ፥ “ጎዳዉ፥ ጼላናዉ ኮያይ” ጌዳ።
42 የሱስካ፥ “ጼላ፥ ነ አማኑ ኔና ፓꬄዳ” ያጌዳ። 43 ሄ ዎድያንካ ጼል አጌዳ፤ ጾሳካ ቦንቺደ አ ጌዱዋ ካሌዳ።
አሳይ ኡባይ ብታንያ ጼሊደ፥ ጾሳ ጋላቴድኖ።