1 ሳምንታፐ ኮይሮ ጋላሳ፥ ማጫዋንቱ ጊግሴዳ ሽቱዋ ኦይቂደ ዳሪ ጉሪደ ዱፉዋኮ ቤድኖ። 2 ሹቻይካ ዱፉዋ ዶናፐ ጎንዶረትና በኤድኖ። 3 ኡንቱንቱ ዱፉዋ ጋርሳ ኦላ ገሎ ዎደ፥ ጎዳ የሱሳ አሃ ደምበይክኖ። 4 ማጫዋንቱ ስꬊደ ደእሽን፥ ዋጭዋጭያ ማዩዋ ማዬዳ ላኡ አሳቱ፥ ቆፐናን ኡንቱንቱ ምይያን ኤቄድኖ።

5 ማጫዋንቱካ ያሻፐ ደንዶዋን ሳኣ ጼሊደ ደእሽን፥ ላኡ አሳቱ፥ “ደኡዋን ደእያዋ፥ አ አያዉ ሀይቆዋንቱ ግዶፐ ኮዪቴ? 6-7 እ ደንዴዳ፤ ሀዋን ባዋ። ቃይካ ጋሊላን ደእያ ዎድያን፥ ‘አሳ ናአይ ናጋራንቻቱዋ ኩሽያን አꬍ እመታናዋ፤ ማስቃልያ ቦላን ካቀታናዋ፥ ሄዘንꬆ ጋላስ ሀይቁዋፐ ደንዳናዋ’ ያገቶዋ ቆፕተ” ያጌድኖ።

8 ማጫዋንቱካ ሄ ዎደ ቃላ አኬኬድኖ። 9 ኡንቱንቱካ ዱፉዋፐ ስሚደ ሀ ኡባ የዉዋ ታማነ እት ኪተቶዋንቶነ ኡንቱንታ ካልያዋንቶ ኡባቶ ኦዴድኖ። 10 ሀዋ የሱስ ኪቶዋንቶ ኦዴዳዋንቱ: ማግዳላፐ ዬዳ ማይራሞ፥ ዮሃኖ፥ ያቆባ ዳዮ ማይራሞነ ኡንቱንቱና እትፐ ደእያ ሀራ ማጫዋንታ። 11 ኡንቱንቶ ማጫዋንቱ ኦድያ ቃላይ ቃጅያዋ ማላትና አማንበይክኖ።

12 ሽን ሄ ዎደ ጰጽሮስ ደንዲደ ዱፉዋኮ ዎጼዳ። ያ ጋኪደ ሆክ ጼልያ ዎደ፥ ጋርሳን ሞጉዋ ማዮ ጻላላይ ደእያዋ በኤዳ። ሀኖ የዉዋንካ ማላለቲደ፥ ጎለ ስሜዳ።

13 ሄ ጋላስ የሱሳ ካልያዋንቱፐ ላኡ አሳቱ የሩሳላመፐ ላኡ ሳትያ ሃክያ ኤማሁሳ ጌተትያ ሄራ ቢደ፤ 14 እቱ እቱዋና ሀኔዳ የዉዋ ኡባ ሃሳይ ደኢኖ። 15 ኡንቱንቱ ሃሳዪድነ ዞረቲደ ደእሽን፥ የሱስ ባረ ሁጰዉ ዪደ ኡንቱንቱ ምይያ ሺቂደ ኡንቱንቱና ቢደ ደኤ። 16 ሽን ኡንቱንቱ ባረ አይፍያን ጼሊደ አ ግድያዋ ሻክ ኤራናዉ ዳንዳይበይክኖ።

17 የሱስ፥ “ህንተንቱ ኦግያ ቦላን እቱ እቱዋና ሃሳይያዌ አዬ?” ያግ ኦቼዳ። ኡንቱንቱካ ዳጋማን ለቹሚደ ኤቄድኖ። 18 ኡንቱንቱፐ እቱ ቀልዮጳ ጌተትያዌ፥ “ሀ ግዱዋን የሩሳላመን ሀኖ የዉዋ ኤረናዌ ነ ጻላላይ ሀ ጋደዉ እማꬄ?” ያግ ዛሬዳ።

19 የሱስ፥ “እ አዬ?” ያግና፥ ኡንቱንቱካ፥ “ጾሳ ስንꬃንነ አሳ ኡባ ስንꬃን ቃላንነ ኪታን ምኖ ናብያ ግዴዳ ናዝሬትያ የሱሳባ ሃሳዬቶ። 20 አካ ቄሳቱዋ ካፓቱነ ኑና ሞድያዋንቱ ሀይቁዋ ፕርዳዉ አꬅ እሜድኖ፤ ማስቃልያ ቦላን ዎꬌድኖ። 21 ኑን ካሰና፥ ‘እስራኤልያ አሳ ዎዛናዋ’ ያግ ህዶቶዌ አ፤ ሽን ሀ የዉ ሀነቲደ አꬎደፐ ሄዙ ቃማ ግዴዳ። 22 ኑ ግዶፐ እት እት ማጫዋንቱ ኑና ማላልሴድኖ። ኡንቱንቱ ጉራን ህን ዱፉዋ ቤድኖ፥ 23 ሽን የሱሳ አሃ ኡንቱንቱ ꬋዮ ዎደ ሽረት ስሚደ፥ እ ደንዴዳ፤ ያግያዋ ኪታንቻቱ ኦድሽን በኤዶ ያግ ኦዴድኖ። 24 ኑ ግዶፐካ እት እት አሳይ ዱፉዋ ቢደ ኡንቱንቱ ጎዋዳን ሀንና በኤድኖ፤ ሽን የሱሳ አሃ ደምበይክኖ” ያጌድኖ።

25 የሱስ ኡንቱንቶ፥ “ህንተኖ፥ አኬከና አሳቶ፥ ህንተንቱ ዎዛናን ናባቱ ኦዶዋ ኡባ ኤለ አማነናዋንቶ፤ 26 ክርስቶስ ሀ መቱዋ አካናዉነ ባረ ቦንቹዋኮ ገላናዉ በሰኔ?” ያጌዳ። 27 ሄዋፐ ስሚደ የሱስ ሙሴ ማጻፋቱዋፐነ ናባቱ ጻፌዳ ማጻፋቱዋፐ ዶሚደ፥ ጾሳ ማጻፋቱዋ ኡባን ጻፈቴዳ ባረባ ኡንቱንቶ ብሊደ ኦዴዳ።

28 ኡንቱንቱ ብደእያ ሄራ ማቴዳ ዎደ፥ የሱስ ሀራሳ ብያዋ ማላቴዳ። 29 ሄ ዎደ ኡንቱንቱ አ፥ “ጋላሳይ ቃሚደ ደእያ ድራዉ፥ ኦማርሳይ ማቴዳ፤ ኑናና እትፐ አቃ!” ያግ ምንስ ዎሴድኖ። ሀዋ ድራዉ፥ እካ ኡንቱንቱና እትፐ አቃናዉ ገሌዳ። 30 ኡንቱንቱ እትፐ ጋይታን ኡቴዳ ዎደ፥ ዳቡዋ ደንꬂደ አንጄዳ፤ መንꬂደ ኡንቱንቶ እሜዳ። 31 ኡንቱንቱ አይፊካ አ አኬካና ማላ ዶየትና፥ የሱሳ ግድያዋ ኤሬድኖ። እካ ኡንቱንቱ ስንꬃፐ ጌሜዳ። 32 ኡንቱንቱካ እቱ እቱዋ፥ “ቃꬋአን እትፐ ኑ ደእሽን፥ ኑና እ ሃሳይስያ ዎድያንነ ጾሳ ማጻፋቱዋካ ኑዉ ቆንጭሲደ እ ኦድያ ዎድያን፥ ኑ ዎዛና ግዶን ታማዳን ሴሌ ግደኔ?” ጌተቴድኖ።

33-34 ሄ ዎድያንካ ደንዲደ የሩሳላመ ስሜድኖ። የሱስ ኪቶ ታማነ እታቶነ ኡንቱንቱና እትፐ ደእያዋንቶ፥ “ጎዳይ ቱሙዋካ ደንዴዳ፥ ስሞናዉካ ቤቴዳ” ያጊደ ሄዋን እትፐ ሺቅ ኡቴዳዋንታ ደሜድኖ።

35 ሄ ላአቱ፥ ቃꬋአን ሀኔዳዋነ የሱስ ዳቡዋ መንꬅያ ዎደ ዎት አ ኤሬድኖንቶ ኡንቱንቶ ኦዴድኖ።

36 ሀዋ ኡንቱንቱ ሃሳይ ደእሽን፥ የሱስ ኡንቱንቱ ግዶን ኤቂደ፥ “ሳሮተꬃይ ህንተዉ ግዶ” ያጌዳ። 37 ኡንቱንቶ ሞይትልያ በኦዋ ማላትና ዳጋሚደ፥ ያሻን ኩሜድኖ። 38 እካ ኡንቱንታ፥ “አያዉ ዳጋሚቴ? አያ ድራዉ ህንተንቱ ዎዛናይ ስꬊ? 39 ታን የሱሳ ግድያዋ ኤራናዉ፥ አነ ታ ኩሽያነ ታ ገድያ በእተ፤ ታናን ህንተንቱ በእያዋዳን፥ ሞይትለዉ አሹነ መቀꬃይ ባዋ። አነ ታና ህንተንቱ ኩሽያን ኦይቂ በእተ” ያጌዳ።

40 ሀዋ ያግ ስሚደ፥ ባረ ኩሽያነ ባረ ገድያ በሴዳ። 41 ኡንቱንቱካ ናሸቻፐ ደንዶዋን፥ አማነናን ማላለት ደእሽን እ፥ “ሀዋን ሜተትያዌ ህንተንቶ ደኢ?” ያግ ኡንቱንታ ኦቼዳ። 42 ኡንቱንቱካ፥ ጺጸቴዳ ሞልያፐ ላፋ ፑሩዋ አዉ እሜድኖ። 43 እካ አኪደ ኡንቱንቱ ስንꬃን ሜዳ።

44 እካ፥ “ታን ህንተንቱና እትፐ ደኣደ፥ ‘ሙሴ ማጻፋን፥ ናባቱዋ ማጻፋንነ ቃላን ጻፈቶ ማዝሙረቱዋን ታ ድራዉ ጻፈቴዳ ኡባይ ፖለታናዉ በሴ’ ያጋደ ህንተንቶ ኦዴዳ የዉ ሀዋ” ያጌዳ።

45 ሄ ዎድያንካ ጾሳ ማጻፋቱዋን ጌተቶዋ አኬካና ማላ፥ ኡንቱንቱ ዎዛና ዶዬዳ። 46 ኡንቱንቶ፥ “ ‘ክርስቶሳ መቱ ጋካናዋ፤ ሄዘንꬅያ ጋላስ ሀይቁዋፐ ደንዳናዋ። 47 አ አ ሱንꬃን ናጋራ ፓጸꬃይነ ማሮታ ደሙሳይ የሩሳላመፐ ዶሚደ አሳዉ ኡባዉ ኦደታናዋ’ ያገቲደ ጻፈቴዳ።

48 “ህንተንቱካ ሀዎ ማርካቱዋ። 49 ታ ህንተንቶ፥ ታ አቡ ቃላ ገሌዳ ህዶታ የዳና፤ ሄዌ ጋካናዉነ ህንተንቶ ዎልቃይ ሳሉዋፐ እመታና ጋካናዉ፥ የሩሳላመ ካታማን ናግሽተ” ያጌዳ።

50 ሀዋፐ ጉይያን፥ ቢታንያ ጌተትያ ካታማ ጋካናዉ፥ ኡንቱንታ አፌዳ፤ ባረ ኩሽያ ምጪደ ኡንቱንታ አንጄዳ። 51 ኡንቱንቱፐ ሻከቲደ፥ ሳሉዋ ቤዳ። 52 ኡንቱንቱ አዉ ጎይኒደ፥ ዳሮ ናሸቻን የሩሳላመ ስሜድኖ። 53 ቃይ ፓጨናን ጾሳ ጋላቲደ፥ ጌሻ ጎልያን ደኤድኖ።