23
ጵላጾስ የሱሳ ኦቼዳ
(ማቶሳ 27:1፣ 2፣ 11-14፤ ማር. 15:1-5፤ ዮሃ. 18:28-38)
1 ሄዋን ሺቄዳ ኡባቱካ እትፐ ደንዲደ፥ የሱሳ ጵላጾሳኮ አፌድኖ። 2 ኡንቱንቱካ፥ “ሀ ብታኒ ኑ አሳ ባለꬂደ፥ አሳይ ሮመ ቢታ ካትያ ቄሳራዉ ጊራ እመና ማላ ድጊደ፥ ቃይ፥ ‘ታን ካትያ’ ያግሽን ደሜዶ” ያጊደ ሞቱዋ ዶሜድኖ።
3 ጵላጾስካ የሱሳ፥ “ሀዎ፥ አይሁዳቱዋ ካቲ ኔኔ?” ያጊደ ኦቼዳ።
የሱስ ዛሪደ አ፥ “ኔን ጋ ደኣሳ” ያጌዳ። 4 ጵላጾስ ቄሳቱዋ ካፓቶነ አሳዉ ኦዲደ፥ “ታን ሀ ብታንያ ቦላን አይነ ኢታ ኦሱዋ ደማበይከ” ያጌዳ።
5 ግዶፐ አትን ኡንቱንቱ፥ “ሀ ብታኒ ጋሊላፐ ዶሚደ፥ ሀራይ አቶ ሀዋ ጋካናዉካ፥ ይሁዳ ጋድያ ኡባ ባረ ትምርትያን ቃꬂደ ደኤ” ያጊደ ምንስ ኦዴድኖ።
የሱስ ሄሮድሳ ስንꬃ ሺቄዳ
6 ጵላጾስካ ሀዋ ስሲደ፥ “እ ጋሊላ አሴ?” ያጊደ ኤራናዉ ኦቼዳ። 7 ጵላጾስ ሄሮድሰ ሞድያ ጋድያፐ የሱስ ዬዳዋ ኤሬዳ ዎደ፥ ሄሮድሰካ ቃይ ሄ ዎድያን የሩሳላመን ደእያ ድራዉ፥ አኮ የሱሳ የዴዳ።
8 ሄሮድሰ ዳሮ ዎድያፐ ዶሚደ የሱሳ በአናዉ አሞት ደእያ ድራዉ፥ አ በኤዳ ዎደ ዳሮፐ ናሸቴዳ። የሱሳ ዋርያ ስሴዳዋ ድራዉ፥ እ ኦራꬃባ ኦꬅሽን በአናዉ ህዶታን ጋምኤዳ። 9 ሄሮድሰ የሱሳ ዳሮባ ኦቼዳ፤ ሽን የሱስ አዉ አያነ ዛርቤና። 10 ቄሳቱዋ ካፓቱነ ሙሴ ህግያ ታማርስያዋንቱ ሄዋን ኤቂደ፥ የሱሳ ሎይꬅ ሞቲደ ደኢኖ። 11 ሄሮድሰነ አ ዎታዳራቱ የሱሳ ካꬊደ፥ አ ቦላ ቅሊጬድኖ። ቦንቼቴዳ ማዩዋ አ ማይዚደ፥ ጵላጾሳኮ ዛሪደ የዴድኖ። 12 ሄሮድሰነ ጵላጾስ ሀዋፐ ካሰና ሞርክያን ደኢኖ፤ ሽን ሄ ጋላስ ስገቴድኖ።
የሱሳ ሀይቃና ማላ ሞቴድኖ
(ማቶሳ 27:15-26፤ ማር. 15:6-15፤ ዮሃ. 18:39—19:16)
13 ጵላጾስ ቄሳቱዋ ካፓቱዋ፥ አይስያዋንታነ ሀራ ጮራ አሳ እትፐ ጼሲደ፥ 14 ሀዋዳን ያጌዳ፥ “ ‘ሀ ብታኒ አሳ ማካላተꬃዉ ደንꬄ’፥ ያጊደ ታኮ አሄድታ፤ ታንካ ህንተንቱ ስንꬃን ብዳ ጼላደ፥ ህንተንቱ ሺሼዳ ሞቱዋን እት ባላነ አ ቦላን ደማበይከ። 15 ቃይ ሄሮድሰካ አ ቦላን አይነ ደምቤና ድራዉ፥ ሃ ኑኮ ዛር የዴዳ፤ ህንተንቱ በእያዋዳንካ፥ ሀ ብታኒ አ ሀይቆ ጋꬅያባ አይነ ኦꬅቤና። 16 ሀዋ ድራዉ ታን አ ሙራደ ብላና” ያጌዳ። 17 *ሀ ፓይዱ፦ “ጵላጾሳዉ ፓስጋ ባላ ቦንቹዋ ጋላሳን እት ኡራ ቃሹዋፐ ብልያ ዶያይ ደኤ” ያጌ። ሽን፥ ዳዉሮꬁዋ ጌሻ ማጻፋ ኦራꬃ ጫቁዋ ግዱዋን ሀ ፓይዱ ጻፈትቤና ጋሱ፥ ሀራ ጌሻ ማጻፋቱዋ ብለꬃቱዋን ኡባቱዋንካ ጻፈትቤና ድራሳ።
18 አሳይ ኡባይ እትፐ ግዲደ፥ “ሀ ብታንያ ያ ድጋ! ባርባና ግያ የሱሳ ኑዉ ብላ!” ያጊደ ጫቦቴድኖ። 19 ባርባን ካታማን ዋላሳ ደንꬂደ፥ አሳ ዎꬌዳ ድራዉ፥ ቃሸቴዳዋ።
20 ጵላጾስ የሱሳ ብላናዉ ኮዪደ፥ አሳዉ ላኤንꬁዋ ጉጂደ ሃሳዬዳ። 21 ሽን ኡንቱንቱ፥ “ማስቃልያ ቦላ ምስማርያን ꬍሻደ ካቃ! ካቃ!” ያግ ዋሴድኖ።
22 ጵላጾስካ ሄዘንꬁዋ ኡንቱንታ፥ “አያዉ? ሀ ብታኒ ኦꬄዳ ኢታ ኦሱ አዬ? ታን አ ሀይቆ ጋꬅያ ናቁዋ አይነ አፐ ደማበይከ፤ ሀዋ ድራዉ፥ አ ሙራደ ብላ የዳና” ያጌዳ። 23 ሽን ኡንቱንቱ ባረንቱ ኮሻ ꬎቁ ኦꬂደ፥ ካቀታናዳን ዳሪ ዋሴድኖ። ኡንቱንቱ ዋሱካ ጵላጾሳ ቆፋ ላሜዳ። 24 ሀዋ ድራዉ፥ ጵላጾስካ ኡንቱንቱ ኦሻይ ስማናዳን የሱሳ ቦላን ፕርዴዳ። 25 አሳ ማካላዉ ደንꬂደነ ሸምፑዋ ዎꬊደ፥ ቃሸቴዳ ብታንያ ብለታናዳን ኡንቱንቱ ዎሶ ድራዉ፥ ሄ ብታንያ ብሌዳ። ሽን የሱሳ ባረንቱ ሸንያዳን ኮዮዋ ኦꬃና ማላ፥ አꬅ እሜዳ።
የሱስ ማስቃልያን ካቀቴዳ
(ማቶሳ 27:31-44፤ ማር. 15:21-32፤ ዮሃ. 19:17-27)
26 የሱሳ ኦይቂ አፊደ ደእሽን፥ ስሞና ጌተትያ ቀሬና ብታኒ ሄራፐ ዪደ ደእሽን ደሚደ፥ ማስቃልያ ቶሲደ የሱሳና ባና ማላ ኦꬄድኖ። 27 ዳሮ ጮራ አሳይነ ዬክያ ማጫዋንቱ ጉየና ካሊኖ። 28 የሱስ ጉየ ስሚደ ኡንቱንቶ፥ “ህንተኖ፥ የሩሳላመ ማጫዋንቶ፥ ህንተንቱ ሁጰዉነ ህንተንቱ ናናዉ ዬክተፐ አትን፥ ታዉ ዬኮፕተ፤ 29 ‘ማንꬃ ግዴዳዋንቱነ የልቤና ኡሉ፥ ꬋንꬅቤና ꬋንꬃይ፥ አንጀቴዳዋንታ’ ጌተትያ ዎዲ ያናዋ። 30 ሄ ዎድያን፥ ‘ዞዛቶ፥ ኑ ቦላ ዎድተ፤ ዙኩላቱዋካ፥ ኑና ቆስተ’ ያጋንታ። ሆሰ 10:8፤ ሳፃ 6:16 31 ስም ቃየ ምꬃን ሀዋዳን ሀኖፐ፥ መላ ምꬃን ዋናናዌ?” ያጌዳ።
32 የሱሳና እትፐ ካቀታና ማላ፥ ኢታ ኦሱዋ ኦꬄዳ ሀራ ላኡ አሳቱዋካ አፌድኖ። 33 ቄራነዉ ጌተትያሳ ጋኬዳ ዎድያን፥ የሱሳ ካቄድኖ። ኢታ ኦꬆዋንታካ፥ እቱዋ ኡሸቻና፥ የኩዋ ሀድርሳና ካቄድኖ።
34 የሱስ፥ “ታ አቦ፥ ኡንቱንቱ ባረንቱ ኦꬅያዋ ኤረና ድራዉ፥ ኡንቱንቱ ናጋራ አቶ ጋ” ያጌዳ።
ኡንቱንቱካ አ ማዩዋ ሳማ የገቲደ ግሸት አኬድኖ። 35 አሳይ ኤቂ ጼልሽን፥ ጋድያ ሞድያዋንቱ፥ “ሀራንታ አሼ፤ ጾሳን ዶረቴዳ ክርስቶስ አ ግዶፐ፥ አነ ባረ ሁጲያ አሸኔ?” ያጊደ ቅሊጬድኖ።
36 ቃይ ዎታዳራቱካ ሺቂደ ቅሊጬድኖ፤ ጫሜዳ ዎይንያ ኤሳ አዉ አህ እሚደ፥ 37 “ሀዎ፥ ኔን አይሁዳ ካትያ ግዶፐ፥ ነ ሁጲያ አሻ!” ያጌድኖ።
38 ሁጲሳናካ፥ “ሀዌ አይሁዳ ካትያ” ያግያ ጻፉዋ ጻፌድኖ። 39 ኢታ ኦꬂደ ካቀቴዳዋንቱፐ እቱ፥ ቦሪድነ ቶቺደ፥ “ሀዎ ኔን ክርስቶሳ ግድኪ? አነ አ ግዶፐ፥ ነ ሁጲያነ ኑና አሻ” ያጌዳ።
40 የኩ ቃይ አ፥ “ኔን ሀዋ ማላትያ ፕርዳ ቦላ ደኣደካ ጾሳዉ ያይኪ? 41 ኑን ኪተቴዳ ባላን ሙራ አኪደ ደኤቶ፤ ኑዉ በስያ ሙራ ቦላን ደኤቶ፤ ሽን ሀ ብታኒ እት ኢታባነ ኦꬅቤና” ያግ ዛሬዳ።
42 እ የሱሳ፥ “ኔን ነ ካዉተꬃ ዎልቃን ይያ ዎደ፥ ታና ቆፓ” ያጌዳ። 43 የሱስካ፥ “ታን ነዉ ቱሙዋ ኦዳይ፥ ሀቼ ታናና እትፐ ጋናትያን ደአናሳ” ያጌዳ።
የሱሳ ሀይቁዋ
(ማቶሳ 27:45-56፤ ማር. 15:33-41፤ ዮሃ. 19:28-30)
44 ሄ ዎደ ኡሱፑን ሳተ ግድያ ኬና፤ ሄዋፐ ኡዱፑ ሳትያ ጋካናዉ፥ ቢታ ኡባ ቦላን ꬉማ ግዴዳ። 45 አዋይካ ባረ ፖኡዋ ድጌዳ፤ ጌሻ ጎልያ ጋርዱካ ፔቲደ ላኡዋ ከሴዳ። 46 የሱስካ ዳሮ ꬎቁ ጌዳ ቃላን ዋሲደ፥ “ታ አቦ፥ ታን ታ ሸምፑዋ ነ ኩሽያን አꬃ እማይ!” ያግ ስሞዋፐ ጉይያን እ ሀይቄዳ።
47 ጼቱዋ ካፑ ሀኔዳ የዉዋ በኤዳ ዎደ፥ “ሀ ብታኒ ቱማካ ጽሎ አሳ” ያጊደ ጾሳ ጋላቴዳ። 48 ሀዋ በአናዉ እትሳ ሺቄዳ አሳይ ኡባይ ሀኔዳ የዉዋ በኢደ፥ ባረንቱ ትራ ባቂደ ስሜድኖ። 49 የሱሳ ኤርያ አሳይ ኡባይነ ጋሊላፐ ዶሚደ አ ካሌዳ ማጫዋንቱ ሀዋ ጼሊደ፥ ሃኩዋን ኤቄድኖ።
የሱስ ሞገቴዳ
(ማቶሳ 27:57-61፤ ማር. 15:42-47፤ ዮሃ. 19:38-42)
50 አይሁዳ ሻንጋቱዋ ግዴዳዋንቱፐ እቱ፥ ዮሴፎ ጌተትያ ሎአነ ጽሎ ብታኒ ደኤ። 51 ሀ ብታኒ ሻንጋቱዋ ማቁዋነ ኡንቱንቱ ኦሱዋን እትፐተꬃ ኦꬅቤና። ጾሳ ካዉተꬃ ዩሳ ህዶታን ናጊደ ደኤ። 52 ዮሴፎካ ጵላጾሳኮ ቢደ፥ የሱሳ አሃ አካናዉ ዎሴዳ። 53 አካናዳን ጌተቶዋፐ ጉየ፥ አሃ ቦላፐ ዎꬂደ፥ ሎኦ ሞጉዋ ማዩዋን ጻጺደ፥ ሹቻፐ ዎጨቲደ መቴዳ፥ ኦንነ ካሰ ሞገትቤና ኦላ ግዶን ዎꬄዳ። 54 ጋላሳይካ ሳምባታ ሞካናዉ ጊግያ ጋላሳ፤ ሳምባታይካ ገላና ሀኔ።
55 ጋሊላፐ ዶሚደ የሱሳና እትፐ ዬዳ ማጫዋንቱ ካሊደ፥ ዱፉዋን አ አሃ ዎቲደ ዎꬄድኖንቶ በኤድኖ። 56 ኡንቱንቱ ሀዋፐ ሶይ ስሚደ፥ ሽቱዋነ ኦክያዋ አንሀዉ ጊግሴድኖ።
ህግያ ማራዳን ሳምባታ ጋላስ ሸምፔድኖ።