ሚልክያሳ ትምቢትያ
ገሉዋ
ትምቢትያ ኦድያ ሚልክያሳ ማጻፋይ ቤቴዳዌ ክርስቶስ የለታናፐ ካሰ እቼሸንꬆ ጼቱ ላይꬃና ግድሽን፥ የሩሳላመን ደእያ ጌሻ ጎሊ ላኤንꬆ ኦሰቴዳዋፐ ጉይያና። ሚልክያሳ ግያ ሱንꬃ ብለꬃይ፥ “ታን ኪቴዳዋ” ጉሳ። ትምቢትያ ኦድያዌ ምንሲደ ቆፍስያዌ ቄሳቱ ካ የንኮ አሳይካ ጾሳና ጫቀቴዳ ጫቁዋ ኦራꬃናዋ። ጾሳ አሳይ ባረ ደኡዋንካ ባረ ጎይናንካ የዳ ግዲደ፥ ባዬዳዌ ኤረቴዳዋ። ቄሳቱ ካ የንኮ አሳይካ በስያ ያርሹዋ ሺሸናን አግያዋንነ እ ኡንቱንቶ እሜዳ ካለሱዋን ቤናንነ ደኤናን እጽያዋን ጾሳ ናቄድኖ። ሄዋ ድራዉ፥ ጾሳይ ኦግያ ጊግሳናዉነ ባረ ጫቁዋ አዋያናዉ ኪተትያዋ ካሰቲደ ናብያ ባጋና ኦዴ፤ አሳ ቦላ ፕርዳናዉነ አሳ ጌሻናዉ እ ያና።
ሸምፓቱዋ ኡባቶ እመቴዳ ቃንꬃ ቆፋቱዋ
1. ጎዳይ እስራኤልያዉ ደእያ ቃላ ጫቁዋ ሲቁ ꬊሸቱሳ 1:1-5
2. እስራኤላታ አማነታቤና ድራዉ ሴራይ ጋኬዳ 1:6—2:16
3. ጎዳ ዩሳይ አዋየቱሳ 2:17—4:6
1
ጎዳይ እስራኤልያዉ ደእያ ቃላ ጫቁዋ ሲቁ ꬊሸቱሳ
(1:1-5)
1 መꬍና ጎዳይ ሚልክያሳ ባጋና እስራኤልያ አሳ ቦላ ኦዴዳ ትምቢትያ ኪታይ ሀዋ። 2 መꬍና ጎዳይ ባረ አሳ፥ “ታን ህንተና ሲቃድ” ያጌ። ሮመ 9:13ኢሳ. 34:5-17፤ 63:1-6፤ ኤር. 49:7-22፤ ህዝ. 25:12-14፤ 35:1-15፤ አሞጻ 1:11-12፤ አብድ. 1-14
ሽን ህንተ፥ “ኔን ኑና አያን ሲቃድ?” ያጊታ።
መꬍና ጎዳይ፥ “ኤሳይ ያቆባ እሻ ግደኔዬ? ግዶፐነ ታን ያቆባ ሲቃድ፤ 3 ሽን ኤሳ እጻድ። ታን ኤሳ ደረቱዋ መላ ኡዳድ፤ አ ጋድያካ ዎራካናቱ ደእያ ባዙዋ ኡዳድ” ያጌ።
4 ኤሳ ዘረꬃ ግድያ
ኤዶማቱ፥ “ኑ ካታማቱ ኮለቴድኖ፤ ሽን ኑን ኡንቱንታ ዛረꬂደ ኬጻና” ያጋና።
ኡባፐ ዎልቃማ መꬍና ጎዳይ፥ “ኡንቱንቱ ዛረꬂደ ኬጻናዋንታ፤ ሽን ታን ኮላና። አሳይ ኡንቱንታ፥ ‘ሀ ቢታይ፥ ኢታ ቢታ፤ ሀ ቢታ አሳይካ መꬍና ጎዳይ መꬍናዉ ሀንቀቴዳ አሳ’ ያጋና” ያጌ።
5 ሄዋ ህንተ ህንተ አይፍያን በኢደ፥ “መꬍና ጎዳይ እስራኤልያ ቢታ ዛዋፐ ካረናካ ዎልቃማ” ያጋና።
እስራኤላታ አማነታቤና ድራዉ ሴራይ ጋኬዳ
(1:6—2:16)
6 ኡባፐ ዎልቃማ መꬍና ጎዳይ፥ “ህንተኖ፥ ታ ሱንꬃ ካዉሽያ ቄሳቶ፥ ናአይ ባረ አዉዋ፥ ቆማይካ ባረ ጎዳ ቦንቼ። ያትና፥ ታን ህንተንቶ አዉዋ ግዶፐ፥ ህንተ ታና ቦንችያ ቦንቹ አነ? ቃይ ታን ህንተንቶ ጎዳ ግዶፐ፥ ህንተ ታዉ ያይያ ያሻይ አኔ? ያቲደ ቃይ፥ ‘ኑን ነ ሱንꬃ ዎቲደ ካዉሼዶ?’ ያጊታ። 7 ህንተ ታዉ ያርሽያ ሳ ቦላን ቱኔዳ ያርሹዋ ሺሽያዋን ታ ሱንꬃ ካዉሼድታ።
“ቃይካ ህንተ፥ ‘ኑን ኔና ዎቲደ ቱንሴዶ?’ ያጊታ።
“ህንተ መꬍና ጎዳዉ ሺሽያ ጋይታይ ካቴዳዋ ግደኔ ያጊደ ቆፕያዋን ታና ቱንሴድታ። 8 ህንተ ያርሹዋ ያርሽያ ዎደ፥ ቆቃ ዎይ ሀርጋንቻ ዎይ ዎባ ግዴዳ መህያ ያርሾፐ፥ ሄዌ ኢታባ ግደኔ? ህንተ ሄዋ ማላ መህያ ህንተ ካፖ እሞታ ኦꬂደ እምንቶ፥ እ ሄዋ ናሸቻን አካናዋ ህንተንቶ ማላቲ?” ያጌ መꬍና ጎዳይ። ዛረ. 15:21
9 ቃይካ ኡባፐ ዎልቃማ መꬍና ጎዳይ፥ “ጾሳይ ህንተንቶ ቃረታና ማላ፥ ሀእ አ ዎስተ። ዎን ህንተ ሄዋ ማላባ ኦꬅና፥ እ ህንተዉ ዛራናዋ ማላቲ?” ያጌ።
10 ኡባፐ ዎልቃማ መꬍና ጎዳይ፥ “ህንተ ታዉ ያርሽያ ሳ ቦላን ጮ ታማ ኤꬅያዋፐ፥ ህንተፐ እት ኡራይ ጌሻ ጎልያ ፐንግያ ጎርድያዋ ግዴረኔሻ! ታን ህንተናን ናሸትከ፤ ህንተ ያርሽያ ያርሹዋካ አክከ” ያጌ።
11 ቃይካ ኡባፐ ዎልቃማ መꬍና ጎዳይ፥ “አዋይ ዶልያሳፐ ቢደ ዉልያሳ ጋካናዉ፥ ታ ሱንꬃይ ካዉተꬃቱዋ ግዶን ዎልቃማ። ሳኣ ኡባን አሳቱ ታዉ እጻና ጩውሲኖ፤ ጌሻ ያርሹዋካ ያርሺኖ፤ አያዉ ጎፐ፥ ታ ሱንꬃይ ካዉተꬃቱዋ ግዶን ዎልቃማ” ያጌ።
12 ኡባፐ ዎልቃማ መꬍና ጎዳይ፥ “ሽን ህንተ፥ ‘መꬍና ጎዳዉ ሺሽያ ጋይታይ ቱና፤ አን ዎꬅያ ያርሹካ ካቴዳዋ’ ያጊደ አ ካዉሼድታ። 13 ቃይ ህንተ፥ ‘ሀዌ ዳቡርስያዋ’ ያግ ቅሊጪደ፥ ህንተ ሲꬍያን ስምኢታ።
“ህንተ ቦንቂ አኬዳዋ ዎይ ዎባ ዎይ ሀርጋንቻ እሞታ ኦꬂደ ሺሺታ። ያትና፥ ታን ህንተ ኩሽያፐ ሄዋ አኮ? 14 ታዉ ያርሻና ጊደ ሺቀቴዳ አቱማ ዶርሳይ አ ዉድያ ግዶን ደእሽን፥ ሸነይያባይ ደእያ ዶርሳ ያርሽያ ሄ ጭምያዌ ሸቀቴዳዋ ግዶ! አያዉ ጎፐ፥ ታን ኡባፐ ዎልቃማ መꬍና ጎዳነ ዎልቃማ ካትያ፤ ታ ሱንꬃይካ ካዉተꬃቱዋ ግዶን ያየቴዳዋ” ያጌ።