2
1 ቃይካ ኡባፐ ዎልቃማ ጾሳይ ሀዋዳን ያጌ፤ “ቄሳቶ፥ ሀእ ሀ አዛዙ ህንተሳ። 2 ታ ሱንꬃ ቦንቻናዉ ህንተ ስሰናን እጾፐነ ህንተ ዎዛናን ቆፐናን እጾፐ፥ ታን ህንተ ቦላ ሸቃ ኪታና፤ ህንተ አንጁዋካ ታን ሸቃና። ህንተ ህንተ ዎዛናን ታና ቦንቻናዉ ቆፕቤና ድራዉ፥ ታን ሀእካ ህንተና ሸቃ ድጋድ። 3 በእተ፥ ታን ህንተ ዘረꬃቱዋ ሙራና። ህንተ ያርሾ አሄዳ መህያ ቶጭያካ ህንተ ሶምእያን ላላና፤ ህንተካ ሄ ቶጭያና እትፐ አ ኦልያ ሳ ባና። 4 ሄ ዎደ ታ ጫቁ ሌዊያና ምኒደ ደአናዳን፥ ታን ህንተንቶ ሀ አዛዙዋ ኪቴዳዋ ህንተ ኤራና” ያጌ። ፓይ. 3:11-13
5 “ታን ሌዊያና ጫቀቴዳ ጫቁ ደኡዋነ ሳሮተꬃ ጫቁዋ፤ እ ታዉ ያያናዳን፥ ታን ኡንቱንታ አዉ እማድ፤ እካ ታዉ ያዬዳነ ታ ሱንꬃካ ቦንቼዳ። ፓይ. 25:12 6 ቱሙዋ ህጊ አ ዶናን ደኤዳ፤ አ እንጻርሳንካ ዎርዱ ቤትቤና። እ ታናና ሳሮተꬃንነ ሱረተꬃን ሀመቴዳ፤ ቃይ ጮራቱዋካ ናጋራፐ ዛሬዳ። 7 ቄሳይ ኡባፐ ዎልቃማ መꬍና ጎዳይ ኪቴዳዋ ግዴዳ ድራዉ፥ አ ዶናይ ኤራተꬃን ኩማናዉ ኮሼ፤ አሳይካ ህግያ አ ዶናፐ ታማራናዉ በሴ” ያጌ ኡባፐ ዎልቃማ መꬍና ጎዳይ።
8 ኡባፐ ዎልቃማ መꬍና ጎዳይ ሀዋዳን ያጌ፤ “ሽን ቄሳቶ፥ ህንተ ኦግያፐ ዎራ ስሜድታ፤ ህንተ ትምርትያንካ ጮራቱዋ ꬉቤድታ፤ ታን ሌዊያና ጫቀቴዳ ጫቁዋካ ኮሌድታ። 9 ሄዋ ድራዉ፥ ህንተ ታ ኦግያን ሀመተናን እጼዳንዳን፥ ህንተ ታማርስያ ህግያንካ አሳ ኡባ እት ልከ ጼለናን እጼዳንዳን፥ ታን ህንተና አሳ ኡባ ስንꬃን ካቴዳዋንታነ ካዉሼዳዋንታ ኡዳድ” ያጌ።
አሳይ መꬍና ጎዳን አማነትቤና
10 ኑዉ ኡባዉ እት አዉ ደኤ ግደኔየ? ኑና እት ጾሳይ መꬌዳ ግደኔየ? ያትና፥ ኑን ኑ ማይዛ አዎቱዋ ጫቁዋ ኮልያዋን እቱ እቶ አያዉ አማነተናን እጼቶ? 11 ይሁዳ አሳይ አማነትቤና፤ ቃይ እስራኤልያንነ የሩሳላመን አሳይ ቱናተꬃ ኦꬄዳ፤ አያዉ ጎፐ፥ ይሁዳ አሳይ ጾሳይ ዶስያ ጌሻ ጎልያ ቱንሴዳ፤ ቃይ አላጋ ጾሳዉ ጎይንያ ማጫ ናናቱዋካ አኬዳ። 12 ሀዋ ኦꬅያዌ ኦና ግዶፐካ፥ መꬍና ጎዳይ አ ያቆባ ማባራፐ ꬋይሶ፤ ሄ አሳይ ኡባፐ ዎልቃማ መꬍና ጎዳዉ ያርሹዋ አህያዋ ግዶፐካ፥ መꬍና ጎዳይ አ ሾዶ።
13 ቃይ ህንተ ኦꬅያ ሀራባይ አዬ ጎፐ፥ መꬍና ጎዳይ ህንተ ያርሹዋኮ ጼለና ድራዉ፥ ዎይ አ አከና ድራዉ፥ ያርሽያ ሳኣ ዬኩዋን፥ አፎꬃንነ ዝላሳን ኩንꬂታ። 14 ህንተ፥ “እ አያዉ ኑ ያርሹዋ አከኔ?” ያጊደ ኦቾፐ፥ ጋሱ ሀዋ: ህንተ ህንተ ያላጋተꬃን አክና እታ ግዴዳ ማቻትና ማቻትና ሄ ዎደ ጫቀቴዳ ጫቁዋ ኮሌድታ፤ ሄዎ መꬍና ጎዳይ ማርካ። 15 መꬍና ጎዳይ ህንተዉነ ህንተ ማቻትዉካ ማቻትዉካ እት ቦላይነ እት አያናይ ደአናዳን ኦꬅቤኔየ? ሄዋ አያዉ ኦꬄዴ? ጌሻ ዘረꬃይ ደአናዳና ግደኔ? ሄዋ ድራዉ፥ ህንተፐ ኦንነ ባረ ያላጋተꬃን አኬዳ ማቻትና ጫቀቴዳ ጫቆ አማነተናዋ ግደናዳን ናገቶ። 16 አያዉ ጎፐ፥ “ታን መꬍና ጎዳይ፥ እስራኤልያ ጾሳይ፥ አስናይነ ማቻታ ብለትያዋ እጻይ፤ ሄዌ ኢታባ” ያጌ። ሄዋ ድራዉ፥ ኡባፐ ዎልቃማ መꬍና ጎዳይ፥ “ህንተ ማቻትና ማቻትና ጫቀቴዳ ጫቆ አማነተናዋንታ ግደናዳን ናገትተ” ያጌ ኡባፐ ዎልቃማ መꬍና ጎዳይ።
ጎዳ ዩሳይ አዋየቱሳ
(2:17—4:6)
17 ህንተ ህንተ ሃሳያን መꬍና ጎዳ ዳቡርሴድታ።
ሽን ህንተ፥ “ኑን አ ዎቲደ ዳቡርሴዶ?” ያጊታ።
ህንተ አ ዳቡርሴዳዌ፥ “ኢታ ኦꬅያዋንቱ ኡባይ መꬍና ጎዳ ስንꬃን ሎአ፤ ቃይ እካ ኡንቱንቱን ናሸቴ” ያግያዋን ዎይ፥ “ቱሙዋ ፕርድያ ጾሳይ ሀቃን ደኢ?” ያግያዋና።