1 ኡባፐ ዎልቃማ መꬍና ጎዳይ፥ “በእተ፥ ታ ብያ ኦግያ ጊግሳናዳን፥ ታን ኪትያ አሳ ካሰታደ የዳና፤ ቃይ ህንተ ኮይያ ጎዳይካ ህንተ ቆፐናን ደእሽን፥ ባረ ጌሻ ጎልያ ፑቱ ጋና። ህንተ ናሸትያ፥ ቃላ ጫቁዋ ኪታንቻይ ያና” ያጌ። ማቶሳ 11:10፤ ማር. 1:2፤ ሉቃሳ 1:76፤ 7:27

2 ሽን እ ብራነ ዎርቃ ሲልሲደ ጌሽያ ታማ ማላነ ማዩዋ ሜጭያ ሳሞና ማላ ግድያ ድራዉ፥ እ ይያ ጋላስ ዳንዳያናዌ ኦኔ? ቃይ እ ቆንጭያ ዎደ አ ስንꬃን ኤቃናዉ ዳንዳይያዌ ኦኔ?ኢዩ. 2:11፤ ሳፃ 6:17 3 እ ብራነ ዎርቃ ጌሽያዋዳንነ ትግያዋዳን ኡቲደ፥ ሌዊያ ዛራቱዋ ጌሻና፤ ኡንቱንቱ መꬍና ጎዳዉ ልከ ያርሹዋ ያርሻና ጋካናዉ፥ እ ኡንቱንታ ጌሻና። 4 ያቶፐ በን ዎደቱዋዳንነ አꬌዳ ላይꬃቱዋዳን፥ ይሁዳ አሳይነ የሩሳላመ አሳይ ያርሽያ ያርሹ መꬍና ጎዳ ናሸችያዋ ግዳናዋ።

5 ኡባፐ ዎልቃማ መꬍና ጎዳይ፥ “ሄዋፐ ጉይያን፥ ታን ፕርዳ ፕርዳናዉ ህንተኮ ያደ፥ ሙሩንያዋንቱ ቦላ፥ ዎሹምያዋንቱ ቦላ፥ ዎርዱዋን ጫቂያዋንቱ ቦላ፥ ኦሳንቻቶ በስያ ድርጉዋ እመናን ድግያዋንቱ ቦላ፥ አስናይ ሀይቄዳ አምአቶነ አታ አዉ ሀይቄዳ ናናቱዋ ቱጋይያዋንቱ ቦላ፥ በትያ ፕርዳ ጌላይያዋንቱ ቦላነ ታዉ ያየናዋንቱ ቦላ ኤለካ ማርካታና” ያጌ።

6 ቃይካ ኡባፐ ዎልቃማ መꬍና ጎዳይ፥ “ታን መꬍና ጎዳይ ላመትከ፤ ሄዋ ድራዉ፥ ህንተኖ ያቆባ ዛረቶ፥ ህንተ ꬋይክታ። 7 ህንተ ማይዛ አዎቱዋ ዎድያፐ ዶሚደ፥ ህንተ ታ ዎጋፐ ዎራ ስሜድታ፤ አካ ናግበይክታ። ሀእ ታኮ ስምተ፤ ታንካ ህንተኮ ስማና” ያጌ።

ሽን ህንተ፥ “ኑን ዋን ስማነ?” ያጊደ ኦቺታ።

8 መꬍና ጎዳይ፥ “አሳይ መꬍና ጎዳ ዉኢ? ሽን ህንተ ታና ዉኢታ” ያጌ።

ቃይካ ህንተ፥ “ኑን ኔና ዎት ዉኤቶ? ያጊታ” ያጌ።

ኡባፐ ዎልቃማ ጾሳይ፥ “ህንተ አስራታንነ እሞታን ታና ዉኢታ። 9 ህንተ እስራኤልያ አሳይ ኡባይ ታና ዉእያ ድራዉ፥ ህንተ ሸቀቴዳዋንታ። 10 ታ ጌሻ ጎልያን ቁማይ ደአናዳን፥ አስራታ ኡባ ዬስያን የግተ። ያቲደ ታን ሳሉዋ ማስኮትያ ዶያደ አንጁዋ ህንተንቶ ፓላህሳደ ጉሳና ꬋዮፐ፥ ታና ሄዋን ፓጭተ። ዎጋ 27:30፤ ፓይ. 18:21-24፤ ዛረ. 12:6፤ 14:22-29፤ ናህ. 13:12 11 ህንተ ቢታይ ሞክያ ካꬃ ባይዘናዳን፥ ታን ህንተ ድራዉ ካꬃ ባይዝያባ ኡባ ሴራና፤ ጋደን ደእያ ዎይንያ ቱራይካ አይፍያ ድገና። ታን ኡባፐ ዎልቃማ መꬍና ጎዳይ ሀዋ ኦዳይ። 12 ህንተ ቢታይ ደአናዉ ናሸችያ ቢታ ግድያ ድራዉ፥ ካዉተꬃቱ ኡባይ ህንተና፥ ‘አንጀቴዳዋንታ’ ያጋና” ያጌ።

13 መꬍና ጎዳይ ሀዋዳን ያጌ፤ “ህንተ ታ ቦላ ጻላ ቃላ ሃሳዬድታ።

“ያቲደ ቃይ፥ ‘ኑን ነ ቦላ ዋግ ሃሳዬዶ?’ ያጊደ ኦቺታ።

14 “ቃይካ ህንተ፥ ‘ጾሳዉ ኦꬅያዌ ሀዳ። አ አዛዙዋ ናግያዋንነ ኡባፐ ዎልቃማ መꬍና ጎዳ ስንꬃን ካዮቲደ ሀመትያዋን ኑን አያ ጎኤቴቶ? 15 ኑን ኦቶረትያዋንቱ አንጀቲና በኤቶ፤ ኢታ ኦꬅያዋንቱካ እሻሊደ ደእያዋ ጻላላ ግደናን፥ ጾሳ ፓጪደካ ከስ አኪኖ’ ያጊታ” ያጌ።

16 ሄ ዎደ መꬍና ጎዳዉ ያይያዋንቱ እቱ እቱዋና ሃሳዬድኖ፤ መꬍና ጎዳይካ ሀይዚደ ስሴዳ። መꬍና ጎዳዉ ያዬዳዋንቱነ አ ሱንꬃካ ቦንቼዳዋንታ ሀሳይስያ ማጻፋይ አ ስንꬃን ጻፈቴዳ። 17 ኡባፐ ዎልቃማ መꬍና ጎዳይ፥ “ኡንቱንቱ ታዋ ግዳናዋንታ፤ ታን ኦꬅያ ጋላስ ኡንቱንቱ ታዉ ዱማቴዳ አሳ ግዳናዋንታ፤ አዉ ባረዉ ኦꬅያ ባረ ናኣ ማርያዋዳን፥ ታን ኡንቱንታ ማራና። 18 ሄ ዎደ ህንተ ዛረꬂደካ ጽሉዋፐነ ናጋራንቻፐ ግዱዋን ደእያ ዛዋነ ጾሳዉ አዛዘትያዋንቱፐነ አዛዘተናዋንቱፐ ግዱዋን ደእያ ዛዋ በአና” ያጌ።