1 ኢታባ ሀልችያዋንቶ፥ ቃይ ባረንቱ ሂጻን ደኢደ፥ ኢታባ ዎት ኦꬃነንቶ ቆፕያዋንቶ አየ አና! ዎልቃይ ኡንቱንቱ ኩሽያን ደእያ ድራዉ፥ ሳአይ ዎንትያ ዎደ፥ ባረንቱ ሀልቹዋ ፖሊኖ። 2 ኡንቱንቱ ጎሻ ጋድያ አሞቶፐ፥ አሳዋ ዎልቃን አክ አጊኖ፤ ጎለቱዋ ኮዮፐካ አክ አጊኖ። አሳ ማታ የꬊደ፥ አ ላታ ጮ ቦንቂኖ።

3 ሄዋ ድራዉ፥ መꬍና ጎዳይ ሀዋዳን ያጌ፤ “በእተ፥ ታን ህንተ ቦላን ኢታባ አሀናዉ ሀልቻይ፤ ሄዋፐ ህንተ ከስ አካናዉ ዳንዳይክታ። ሄዌ ኢታ ዎደ ግድያ ድራዉ፥ ህንተ ኦቶረቲደ ስመረታናዉ ዳንዳይክታ። 4 ሄ ጋላስ ኡንቱንቱ ህንተ ቦላን ሌምስ ሌምሲደ ቅሊጫና፤ ቃይ ሀዋዳን ያግ ዝላሊደ፥ ህንተና ህዶታ ቃንጽሳና፤

5 ሄዋ ድራዉ፥ ጋድያ ኤጻን ግሽያ ዎደ፥ መꬍና ጎዳ ሺቁዋ ግዶን ነ ሳማ ከስያ እት አሳይነ ደኤና።

6 አሳይ ታና ሀዋዳን ያጌ፤ “ኑ ቦላ ትምቢትያ ኦዶፓ። ‘ሀዌ ሀዌ ህንተ ቦላ ሀናና’ ጊደ ኦንነ ሃሳያናዉ ኮሸና። ሄዋ ማላ ካዉሻይ ኑ ቦላ ሙለካ ዬና” ያጊኖ።

7 ታን ኡንቱንታ፥ “ህንተኖ ያቆባ ዛረቶ፥ ‘መꬍና ጎዳ አያናይ ዳንዳያንቻ ግደኔየ? እ ሄዋ ማላባ ኦꬂየ?’ ያጊደ ህንተ ኦቻናዉ በሲ?” ያጋድ።

ጾሳይ ሀዋዳን ያጌ፤ “ሱረ ኦግያን ብያዋንቶ ታ ቃላይ ሎኦባ ኦꬄ ግደኔ? 8 ሽን ማታ ዎድያፐ ዶሚደ፥ ታ አሳይ እቱ እቱዋ ቦላ ሞርክያዳን ደንዴዳ። ህንተ ሳሮ አሳቱዋ ማዩዋ፥ ኦላ ቆፋይ ሙለካ ባይናን አማነቲደ አꬍያ አሳቱዋ ማዩዋ ቃር አኪታ፤ 9 ታ አሳ ግዶን ደእያ ማጫ አሳቱዋ ኡንቱንቱ ሎኦ ጎልያፐ ላግ ከሲታ፤ ታ አንጁዋካ ኡንቱንቱ ናናቱ ቦላፐ መꬍናዉ አክ ድጊታ። 10 ደንዲደ ቢተ! ሀዌ ህንተንቶ ሸምፕያ ሳ ግደና። አያዉ ጎፐ፥ ሀ ሳአይ ቱናተꬃፐ ደንዴዳዋን ዳሮ ባዬዳ።

11 “እት ጭምያ ዎርዳንቻይ ዪደ፥ ‘ህንተዉ ስንꬃፐ ዎይንያ ኤሳይነ ማꬆይያ ኡሻይ ጉፈታና’ ያጊደ ዎርዱዋ ትምቢትያ ኦድንቶ፥ እ ህንተንቶ ትምቢትያ ኦድያዋ ግዳና።

12 “ህንተኖ፥ ያቆባ ዛረቶ፥ ታን ህንተና ኡባካ ሺሻና፤ ታን እስራኤልያ አሳፐ አቴዳዋንታ ቱሙዋፐ ኡባካ ሺሻና። ዶርሳቱ ካሉዋን ሺቅያዋዳንነ ዶርሳ ዉዲ ሄንꬃ ጋደን ሺቅያዋዳን፥ ታን ኡንቱንታ እትፐ ሺሻደ ዎꬃና። ሄ ሳአይ ዳሮ አሳ ሻባረቱሳን ኩማና። 13 ኡንቱንታ ከስያዌ ኡንቱንቱፐ ስንꬃቲደ ከሳና፤ ኡንቱንቱካ ፐንግያ መንꬂደ፥ ሄዋና ከሲደ ባና። መꬍና ጎዳይ ባረ ሁጲያን ኡንቱንቶ ካትያ ግዲደ፥ ኡንቱንታ ስንꬃዉ አꬊደ፥ ኡንቱንታ ካለꬃና” ያጌ።