1 እዮኣታም፥ አካዝነ ህዝቂያስ ካል ካሊደ ይሁዳን ካተቴዳ ዎደ፥ ሞረሸታ ካታማ አሳ ግድያ ሚክያሳኮ ዬዳ መꬍና ጎዳ ቃላይ ሀዋ፤ እ በኤዳ ሳጻይ ሳማርያዋነ የሩሳላመባ። 2 ካታ. 15:32—16:20፤ 18:1—20:21፤ 2 ኦዱዋ 27:1-7፤ 28:1—32:33

2 ህንተኖ፥ አሳዉ ኡባዉ፥ ስስተ! ቃይ ሳአዉነ ሳኣን ደእያ ኡባ ገደ፥ ሀዋ ስስተ! ኡባ ሞድያ መꬍና ጎዳይ ህንተ ቦላ ማርካቴ፤ እ ባረ ጌሻ ጌሻ ጎልያን ህንተዋ ሃሳየ። 3 በእተ፥ መꬍና ጎዳይ ባረ ደእያ ጌሻ ሳኣፐ ዬ፤ ዱገ ዪደ፥ ደረቱዋ ሁጲያን ሀመቴ። 4 ኤሳ ሙቃዳይ ታማን ሴርያዋዳን፥ ደረቱ አ ገድያፐ ጋርሳና ሲላና፤ ኡንቱንቱ ደርያፐ ዛንጋራይ ዱገ ጎግያ ሃꬃዳን ጎጋና።

5 ሀዌ ኡባይ ሀንያዌ ያቆባ ዛራቱዋ ባይዙዋ ግሻሳነ እስራኤልያ አሳ ናጋራ ግሻሳ። ያቆባ ዛራቱዋ ባይዞ ጋሱዋ ግዴዳዌ ኦኔ? ኡንቱንቱ ካታማ ሳማርያ ግደኔ? ይሁዳ አሳይ ጎይንያ ꬎቃ ሳአይ ሀቄ? የሩሳላመ ግደኔየ? 6 ሄዋ ድራዉ፥ ጾሳይ ሀዋዳን ያጌ፤ “ታን ሳማርያ፥ ደምባን ኬለቴዳ ቡርጨ ሹቻነ ዎይንያ ቱራ ቶክያ ሳ ኦꬃና። ቃይ ታን አ ሹቻ ቡርጭያ ዱገ ዛንጋራዉ ኦላና፤ አ ባሱዋካ ካሎያና። 7 አ ኤቃ ምስለቱ ኡባይ ክንቼታና፤ አ ኤቃ ጎልያን ኦꬅያ ሻርሙጻቶ እመቴዳ ሻርሙጻ የዉ ኡባይ ታማን ጹገታናዋ፤ ታን አ ኤቃቱዋ ኡባ ꬋይሳና። አያዉ ጎፐ፥ ሄ የዉ ኡባይካ ሻርሙጺደ ደሜዳዋ ግድያ ድራዉ፥ እካ ቃይ ስሚደ፥ ሀራ ሻርሙጻዉ እመታና” ያጌ።

8 ሄዋ ድራዉ፥ ታን ዬካናነ ዋሳና፤ ካሎ ጺራነ መላ ገድያን ሀመታና፤ ዎራካናዳን ዋሳና፤ ቃይ ሶጎንያዳንካ አየ ጋና። 9 አያዉ ጎፐ፥ ሳማርያ ማዱꬃይ ፓጻናዉ ዳንዳየናዋ። ሄ ቱጋይ ይሁዳ ጋድያ ጋኬዳ፤ ቃይ ታ አሳይ ደእያ የሩሳላመ ካታማ ፐንግያካ ማቴዳ።

10 ጋተ ካታማን ደእያ ኑ ሞርከቶ ሄዋ ኦዶፕተ፤ ኡንቱንቱ ስንꬃን ሙለ ዬኮፕተ። ቤት-ኦፍራ ካታማን ባናን ጎንዶረትተ። 11 ህንተኖ፥ ሻፊራ ካታማን ደእያዋንቶ፥ ካሎቲደ ዬላቲደ፥ ኦሞዶ ቢተ። ጻእናና ካታማን ደእያዋንቱ ያፐ ከሳናዉ ጻልክኖ። ቤት-ኤጼላ ካታማይ ዬኩ ደኢያሳ ግድያ ድራዉ፥ እ ህንተንቶ አትያሳ ግዳናዉ ዳንዳየና። 12 መቱ መꬍና ጎዳፐ የሩሳላመ ፐንገ ጋካናዉ ዬዳ ድራዉ፥ ማሮታን ደእያ አሳይ፥ “ሎኦባይ ያንዴሻ!” ጊደ ናጊደ ዳቡሬዳ።

13 ህንተኖ፥ ላክሻ ካታማን ደእያዋንቶ፥ ጋርያ ጎችያ ፓራቱዋ ዋጽተ። የሩሳላመ አሳይ ናጋራ ኦꬃናዳን ጋሱዋ ግዴዳዌ ህንተና፤ አያዉ ጎፐ፥ ጽዮነ አሳ ናጋራይ ኮይሮ ህንተ ቦላ ቤቴዳ። 14 ሄዋ ድራዉ፥ ህንተኖ ይሁዳ አሳቶ፥ ህንተ ቢደ፥ ሞረሸታ-ጋተ ካታማ አሳዉ እሞታ እማና። አክዚባ ካታማ አሳይካ እስራኤልያ ካተቱዋ ጭምያዋንታ ግዳና።

15 ህንተኖ፥ ማሬሻ ካታማን ደእያዋንቶ፥ መꬍና ጎዳይ ህንተና ጾንያዋ ህንተ ቦላ አሀና፤ ቦንቼቴዳ እስራኤልያ ካለꬅያዋንቱ አዱላማ ጎንጎሉዋን ቆሰታና። 16 ህንተኖ፥ ይሁዳ አሳቶ፥ ህንተ ሲቅያ ናናይ ህንተፐ ኦሞደቲደ ባናዉ ደእያ ድራዉ፥ ህንተ ሁጲያ ሜደትተ፤ ህንተ ሁጲያካ አንኩዋ ሁጲያዳን ቦአይተ።