1 ሽን ሄዌ ዮናሳ ኡባካ ናሸችቤና። ሄዋ ግሻዉ፥ እ ሎይꬅ ሀንቀቴዳ፤ 2 መꬍና ጎዳ ሀዋዳን ያጊደ ዎሴዳ፤ “አቤት መꬍና ጎዳዉ፥ ታን ብሮ ታ ጋደን ደኣደ ጌዳዌ ሀዋ ግደኔ? ታን ነ ስንꬃፐ ባቃታደ ታርሴሰ ባናዉ ኤሌሌዳዌ ሀዋሳ። ኔን ቃረታይነ ማሮተꬃይ ኩሜዳ ጾሳ ግድያዋ፥ ሀንቆ ኤሌለናዋነ አገና ሲቁዋን ኩሜዳዋ፥ ቃይ አሀና ጌዳ ኢታባካ አግያ ጾሳ ግድያዋ ታን ካሰካ ኤራድ። ከሳ 34:6 3 አቤት መꬍና ጎዳዉ፥ ሀእ ስም ሀይ ሀያና ታና ዎꬋ፤ ፓጻ ደእያዋፐ ሀይቂያዌ ታዉ ሎአ” ያጌዳ። 1 ካታ. 19:4

4 መꬍና ጎዳይ አ ሀዋዳን ያጌዳ፤ “ቱሙ ኔን ሀዎ ሀንቀታናዉ በሲ?” ያጌዳ።

5 ዮናስ ካታማፐ ከሲደ ቤዳ፤ ቢደ ካታማፐ አዋይ ዶልያ ባጋን ኡቴዳ። ሄዋን ባረዉ ዳስያ ዳሴዳ፥ አ ኩዋን ኡቲደ፥ ካታማ ቦላ ጋክያዋ በአናዉ ናጌዳ። 6 አዋ ሱሉዋፐ ዮናሳ አሻና ማላ፥ መꬍና ጎዳይ ጾሳይ እት ጎስያ ዶልሲደ ጊግሴዳ፤ ሄ ጎስያ ሀይꬃይካ ዮናሳ ሁጲያፐ ቦላ ባጋና ኩዋ ግዳናዳን ኦꬄዳ። ዮናስ ሄ ጎስያ ጋሱዋን ሎይꬅ ናሸቴዳ። 7 ሽን ዎንተꬃ ጋላስ ዎንታ ጾሳይ ጉጹንያ ጊግሴዳ፤ ሄ ጉጹኒ ጎስያ ሞዋን፥ ጎሲ መል አጌዳ። 8 አዋይ ከሶ ዎደ፥ ጾሳይ ምችያ ጫርኩዋ አዋይ ዶልያ ባጋፐ የዴዳ፤ ሄዋፐ ደንደዳዋን ዮናስ ላባናና ጋካናዉ፥ አዋይ ዮናሳ ሁጲያ ጹጌዳ። ያትና እ፥ “ፓጻ ደእያዋፐ ሀይቂያዌ ታዉ ሎአ” ያጊደ ሀይቃናዉ ዎሴዳ።

9 ጾሳይ ዮናሳ ሀዋዳን ያጌዳ፤ “ቱሙ ኔን ሀ ጎስያ ግሻዉ ሀንቀታናዉ በሲ?” ያጌዳ።

ዮናስ፥ “ኤ በሰ፤ ኡባ ሀይቃና ጋካናዉ ሀንቀታናዉ በሰ” ያጌዳ።

10 መꬍና ጎዳይ ዮናሳ ሀዋዳን ያጌዳ፤ “እት ቃማን ዶላደ፥ ላኤንꬆ ቃማ መሌዳ ጎስያዉ፥ ኔን አን ዳቡራቤናባዉነ ድቻቤናባዉ ሀዋ ኬሻ ቃረታዳ። 11 ኡሸቻነ ሀድርሳ ሻክ ኤርቤና ጼታነ ላታሙ ሻአ አሳይነ ዳሮ መሂ ናናዌን ደኤ። ያትና ታን ሀ ዎልቃማ ካታማዉ ቃረታናዉ በሰኔ?” ያጌዳ።