1 መꬍና ጎዳ ቃላይ ላኤንꬁዋ ዮናሳኮ ሀዋዳን ያጊደ ዬዳ፤ 2 “ደንዳ! ሄ ዎልቃማ ካታማ ነነዌ ባ፤ ታን ነዉ ኦድያ ቃላ ኡንቱንቶ ማርካታ” ያጌዳ።

3 ዮናስ ደንዲደ፥ መꬍና ጎዳ ቃላዳን ነነዌ ቤዳ። ናናዌ ሎይꬅ ዎልቃማ ካታማ፤ ሀ ጋጻፐ ያ ጋጻ ጋካናዉ ሄዙ ጋላሳ ሀመትሴ። 4 ዮናስ ካታማ ብ ጋኪደ፥ እት ጋላሳ ኦግያ ካታማ ግዱዋኮ ሀመቴዳ፤ ሀመቲደ፥ “ኦይታሙ ጋላሳፐ ጉየ፥ ናናዌ ꬋያና” ያጊደ አዋዬዳ። ማቶሳ 12:41፤ ሉቃሳ 11:32

5 ያትና፥ ነነዌ አሳይ ጾሳ አማኔዳ፤ ጾማ አዋዬዳ። ዎጋፐ ቄራ ጋካናዉ፥ ኡባይካ ማቅያ ማዬድኖ።

6 ኦዱ ነነዌ ካትያኮ ጋኬዳ፤ እ ባረ ካዉተꬃ አራታፐ ዎꬊደ፥ ካዉተꬃ ማዩዋ ማዬዳዋካ ቃሪደ፥ ማቅያ ማዪደ፥ ብድንꬃን ኡቴዳ። 7 ያትደ ነነዌ አሳዉ ሀዋዳን ያጊደ አዋይሴዳ፤ “ካትያፐነ ካትያ ኦሳንቻቱዋፐ እመቴዳ አዛዙዋ ማራን፥ ሀቼፐ ዶሚደ፥ አሳይነ መሂ፥ ሚዛይነ ዶርሳይካ ኡባይ አያነ እንጻርሳን ላጮፕኖ፤ ሃꬃካ ጋንጾፕኖ። 8 አሳይካ መሂካ ማቅያ ማዮ፤ አሳይ ኡባይ ምንሲደ ጾሳኮ ዋሶ፤ ባረንቱ ኢታ ኦግያፐነ ናቆ ኦሱዋፐካ ስምኖ። 9 ያትንቶ ኦን ኤሪ፥ ጾሳይ ኑዉ ቃረቲደ፥ ኑን ꬋየናዳን፥ ባረ ዎልቃማ ሀንቁዋፐ ስማነንቶነ” ያጌዳ።

10 ኡንቱንቱ ባረንቱ ኢታ ኦግያፐ ስሜዳዋ ጾሳይ በኤዳ ዎደ፥ ኡንቱንቶ ቃረቲደ፥ ኡንቱንቱ ቦላ አሀና ጌዳ ኢታባ አግ ባሼዳ።