1 ዮናስ ሞልያ ኡሉዋን ደኢደ፥ ሀዋዳን ያጊደ፥ መꬍና ጎዳኮ፥ ባረ ጾሳኮ፥ ዎሴዳ፤ 2 “ታን ታ ቱጋ ግዶን ደኣደ መꬍና ጎዳ ጼሳድ፤ ጼስና እ ታዉ ኮዬዳ። ታን ስኦልያ ኡሎ ግዶን ደኣደ ዋሳድ፤ ኔንካ ታ ዋሱዋ ስሳዳ። 3 ኔን ታና ጪማ አባ ጋርሳን ዱገ ኦላዳ፤ ሃꬃይ ታ ዩሹዋ ዶዴዳ፤ ነ ኡምቡለትያ ነ ቤታይ ታ ቦላና አꬌድኖ። 4 ሄዋ ግሻዉ፥ ታን ሀዋዳን ያጋድ፤ ‘ታን ነ ስንꬃፐ ዎራ ኦለታድ፤ ግዶፐነ፥ ታን ነ ጌሻ ጎልያ ዛራደ በአና’ ያጋድ።

5 “ሃꬃይ ታዉ ቆꬍያ ጋካናዉ ምቴዳ፤ ጪማ አባይ ታና ሙኬዳ፤ አባን ደእያ ማታይካ ታ ሁጲያን ጻጸቴዳ። 6 ታን ደር ባሰቴዳ ሳኣ ዱገ ዎꬋአድ፤ ቢታንነ አ ኩቡዋን መꬍናዉ ጎርደታድ። ሽን አቤት መꬍና ጎዳዉ፥ ታ ጾሳዉ፥ ኔን ታ ሸምፑዋ ጪማ ኦላፐ ከሳዳ።

7 “ታን ዎደ፥ ኔና መꬍና ጎዳ ሀሳያድ። ታ ዎሳይካ ኔኮ፥ ነ ጌሻ ጎልያ ማቅዳስያ ጋኬዳ። 8 ሀዳ ኤቃቶ ጎይንያዋንቱ ግኦድአን አማነትያዋ አጌድኖ። 9 ሽን ታን ጋላታና ነዉ ያርሻና፤ ታን ሺቄዳዋ ኡባካ ጋꬃና። አያዉ ጎፐ፥ አቶተꬃይ መꬍና ጎዳፐ ዬ” ያጌዳ።

10 ሄዋፐ ጉየ፥ መꬍና ጎዳይ ሞልያ አዛዝና፥ ሞሊ ዮናሳ ቢታ ቦላን ጮሼዳ።