ዮናሳ ትምቢትያ
ገሉዋ
ዮናሳ ማጻፋይ ጾሳ አዛዙዋ ፖልከ ጊደ እት ናብያ ቦላ ጋኬዳ ዱማ ዱማ መቱዋ ኦድያ ታርኪያ ማጻፋ ግድያ ግሻዉ፥ ሀራ ማጻፋቱዋፐ እ ዱማቴ። ጾሳይ ዮናሳ፥ “እስራኤልያዉ ዋና ሞርከ ግዴዳነ ዎልቃማ፥ አሶረ ካዉተꬃዉ ዋና ካታማ ግዴዳ ነነዌ ባ” ያጊደ አዛዜዳ፤ ሽን ዮናስ፥ “ጾሳይ ካሰ ሄ ካታማ ꬋይሳና ጊደ ኦዴዳ ምኖ ኦዱዋ ኪታን ፔሸናን አጋናዉ ሀኔዳ” ጊደ ቆፔዳ ድራዉ፥ ጾሳ ቃላ አኪደ ነነዌ ባናዉ ኮይቤና። ዳሮ ታርከባቱ ፖለቴዳዋፐ ጉየ ናሸተናን ደኢደ አዛዘቴዳ። ካሰ ኦደቴዳ ባሻ ሀናናዌ ፖለትቤና ግሻዉ ሀንቀቴዳ።
ሀ ማጻፋይ ኡባባ ቦላን ጾሳዉ ማታይ ደእያዋ ኦዴዳ። ኡባ ቃይ ጎዳይ ሲቁነ ማሮተꬃይ ኩሜዳ ጾሳ ግድያ ግሻዉ፥ ባረ አሳ ሞርከቱዋ ሙርያዋፐነ ꬋይስያዋፐ፥ ኡንቱንቶ አቶ ግያዋን ኡንቱንታ አሽያዋ ዶስያዋ ቆንጭሴዳ።
ሸምፓቱዋ ኡባቶ እመቴዳ ቃንꬃ ቆፋቱዋ
1. ዮናሰ ጎዳፐ ባቃቱሳ 1:1-17
2. ዮናሳ ዎሳ 2:1-10
3. ዮናሰ ናናዌ ቡሳነ አሳ ናጋራ ፓጸꬃ 3:1-10
4. ጾሳይ እሜዳ ማሮታን ዮናሳ ሀንቁዋ 4:1-11
1
ዮናስ ጎዳፐ ባቃቱሳ
(1:1-17)
1. 1 መꬍና ጎዳ ቃላይ አሚታያ ናኣ ዮናሳኮ ሀዋዳን ያጊደ ዬዳ፤ 2 ካታ. 14:25 2 “ደንዳ! ሄ ዎልቃማ ካታማ ነነዌ ባ፤ ባደ ሄ ካታማ አሳ ኢታተꬃይ ታ ስንꬃ ጋኬዳ ግሻዉ፥ ኡንቱንቶ ማርካታ” ያጌዳ። 3 ሽን ዮናስ መꬍና ጎዳ ስንꬃፐ ባቃቲደ፥ ታርሴሰ ግያ ጋድያ ባናዉ ደንዴዳ፤ እ ዮጰ ካታማ ዎꬊደ፥ ታርሴሰ ብያ ማርካብያ ደሜዳ። መꬍና ጎዳ ስንꬃፐ ባቃቲደ፥ ኡንቱንቱና ታርሴሰ ባናዉ ሚሻ ጭጊደ፥ ማርካብያን ገሌዳ።
4 ሽን ማርካቢ ቢሽን፥ መꬍና ጎዳይ አባ ቦላ ዎልቃማ ጫርኩዋ ደንꬄዳ፤ ደንꬅና አባ ቤታይ ሎይꬅ ዳሬዳ ግሻዉ፥ ማርካቢ መአና ሀኔዳ። 5 ያትና፥ ማርካብያ ላግያዋንቱ ያዪደ፥ ኡባይካ ባረንቱ ጾሳኮ ጾሳኮ ዋሴድኖ። ቃይ ማርካቢ ካዉሻና ማላ፥ አ ግዶን ደእያ ጫና ደንꬂደ፥ አባን ኦሌድኖ። ሽን ዮናስ ማርካብያዉ ግዶ ክፍልያ ገሊደ፥ ያን ግሲደ፥ ገምእሹዋ ፓኑሬዳ።
6 ማርካብያ ካፑ ገምእሻድ ቢደ፥ “አያዉ ገምእሻዲ? ደንዳ፥ ነ ጾሳ ዎሳ! ኦን ኤሪ፥ እ ባረ ሎኦ አይፍያን ጼሊደ፥ ኑና አሻናዌንቶነ” ያጌዳ።
7 ማርካብያ ላግያዋንቱ እቱ እቶ ሀዋዳን ያጌድኖ፤ “ሃይተ፤ ሀ ኢታባይ ኑና ኦ ጋሱዋን ጋከደንቶነ ኤራናዉ ሳማ የጎይተ” ያጌድኖ። ሳማ የግና፥ ሳማይ ዮናሳ ቦላን ዎꬌዳ። 8 ኡንቱንቱ ዮናሳ ሀዋዳን ያጊደ ኦቼድኖ፤ “ሀ ኢታባይ ኦ ጋሱዋን ኑ ቦላ ጋከደንቶነ፥ አነ ኑዉ ኦዳ። ነ ኪታይ አዬ? ሀቃፐ ያድ? ነ ጋዲ ሀቄ? ኔን ኦ ዛረ?” ያጌድኖ።
9 ዮናስ ዛሪደ፥ ሀዋዳን ያጌዳ፤ “ታን እብራዌ አሳ፤ አባነ ጋድያ መꬌዳ መꬍና ጎዳዉ፥ ሳሉዋ ጾሳዉ ጎይናይ” ያጌዳ።
10 መꬍና ጎዳ ስንꬃፐ እ ባቃትያዋ እ ኡንቱንቶ ኦዴዳባፐ አሳቱ ኤሬዳ ግሻዉ ያዬድኖ። አ፥ “ላ አይባ ፓላባ ኦꬃዲ?” ያጌድኖ።
11 ቃይ አባ ቤታይ ካሰዋፐ ሃ ዳሬዳ ግሻዉ፥ አሳቱ ዮናሳ፥ “ኑዉ አባይ ዎፓና ማላ፥ ኔና ኑን ዋታነ?” ያጊደ ኦቼድኖ።
12 እ ኡንቱንቶ፥ “ሀ ዎልቃማ ቤታይ ህንተንቱ ቦላን ደንዲደ ታ ጋሱዋና ግድያዋ ታን ኤራይ። ሄዋ ግሻዉ፥ ታና ደንꬂደ፥ አባን ኦልተ። ያቶፐ፥ አባይ ህንተንቶ ዎፑ ጋናዋ” ያጌዳ።
13 ሽን ማርካብያ ላግያዋንቱ ማርካብያ ጉየ አባ ዶናዉ ከሳናዉ ዎልቃፐ ባጸቴድኖ፤ ግዶፐነ፥ አባ ቤታይ ሎይꬅ ዳሬዳ ግሻዉ፥ ከሳናዉ ዳንዳይበይክኖ። 14 ሄዋ ግሻዉ፥ ኡንቱንቱ ሀዋዳን ያጊደ፥ መꬍና ጎዳኮ ዋሴድኖ፤ “አቤት መꬍና ጎዳዉ፥ ሀ ብታንያ ሸምፑዋ ግሻዉ፥ ኔን ኑና ꬋይሰናዳንነ ሀ ጌሻ ሱꬃ አጩዋ ኔን ኑፐ አቼናዳን፥ ኑን ኔና ምንሲደ ዎሴቶ። አያዉ ጎፐ፥ መꬍና ጎዳዉ፥ ኔን ነ ኮዮዋዳን ኦꬃዳ” ያጌድኖ።
15 ሄዋፐ ጉየ፥ ዮናሳ ደንꬂደ፥ አባን ኦሌድኖ፤ ኦልና አባ ቤታይ ዎፑ ጌዳ። 16 ያትና፥ አሳቱ መꬍና ጎዳዉ ሎይꬅ ያዬድኖ፤ መꬍና ጎዳዉ ያርሹዋ ያርሼድኖ፤ ሺቁዋካ ሺቄድኖ።
17 ዮናሳ ምታና ማላ፥ እት ዎልቃማ ሞልያ መꬍና ጎዳይ ጊግሴዳ፤ ሄ ሞልያ ኡሉዋን ዮናስ ሄዙ ጋላሳነ ሄዙ ቃማ ደኤዳ። ማቶሳ 12:40