አብድዩ ትምቢትያ
ገሉዋ
አብድዩ ግያ ሱንꬃ ብለꬃይ፥ “ጾሳ ቆማ” ግያዋ። ሀ ቃንꬃ ማጻፋይ የሩሳላመ ኦላ ጋሱዋን ላለታናፐ ካሰ፥ ዳሪ ኤረተና ዎድያን ጻፈቴዳ። ሄ ዎደ ገድሳዉ ባቂያ አዋይ ዉልያ ባጋ ባጋን ደእያነ ይሁዳና አዱሳ ዎድያ ሞርከቲደ ደኤዳ ኤዶም የሩሳላመ ላለꬃን ናሸቲደ፥ አ ቦላን ኦላዉ ከሴዳ ሞርከቱዋ ማዲድነ ካታማ ዱረታካ ቦንቂደ ደኤ። አብድዩ፥ ኤዶም እስራኤልያ ሞርከቱዋ ሀራቱዋካ ጾነታናዉነ ኢታ ሙሩዋ አካናዉ ደእያዋ ኦዴዳ።
ሸምፓቱዋ ኡባቶ እመቴዳ ቃንꬃ ቆፋቱዋ
1. ኤዶማ ኦቶሩዋነ ሙሩዋ 1-9
2. ኤዶማ ጻላተꬃ 10-14
3. እስራኤልያ ጾኑዋ 15-21
1
ኤዶማ ኦቶሩዋነ ሙሩዋ
(1-9)
1 ኡባ ሞድያ መꬍና ጎዳይ ኤዶማ አሳባ አብድዩስ ቆንጭሴዳ ሳጻይ ሀዋ። ኢሳ. 34:5-17፤ 63:1-6፤ ኤር. 49:7-22፤ ህዝ. 25:12-14፤ 35:1-15፤ አሞጻ 1:11-12፤ ሚልክ. 1:2-5
ኤዶማባ መꬍና ጎዳይ ሀዋዳን ያጊደ፥ ባረ ኪትያ ኡራ ቦላን ካዉተꬃቱዋኮ ኪቴዳዋ ኑን ስሴዶ፤ “ደንድተ! ኤዶማ ቢታ ኦሌቶ” ያጊደ ኪቴዳ። 2 መꬍና ጎዳይ ኤዶማ ሀዋዳን ያጌ፤ “በአ፥ ካዉተꬃቱዋ ግዶን ታን ኔና ላፋ ከሳና፤ ኔን ሎይꬅ ካታና። 3 ኔኖ፥ ምኖ ዛላን ጌሱ ኬጸቴዳ ካታማ ግዶን ደእያዎ፥ ነ ጎልያ ꬎቃ ደረቱዋ ቦላን ኬጼዳዎ፥ ቃይ ነ ዎዛናን፥ ‘ታና ሀዋፐ ዱገ ኦን ዎꬂ?’ ያግያዎ፥ ኔና ነ ዎዛና ኦቶሩ ጭሜዳ። 4 ኔን አርጋንꬃ ጎልያዳን፥ ነ ጎልያ ꬎቃሳን ኬጾፐካ፥ ነ ደኢያሳ ጾልንተቱዋ ግዶን ኦꬆፐካ፥ ታን ኔና ሄዋፐ ዱገ ዎꬃና” ያጌ መꬍና ጎዳይ።
5 “ካይሳቱ ዎይ ቦንቂያዋንቱ ቃማ ዮፐ፥ ባረንቶ ኮሽያዋ ኬሻ ጻላላ ዉኢኖ፤ ዎይንያ ቴራ ማጽያዋንቱካ ማጺደ፥ ቃርምያ አሺኖ፤ ሽን ኔኮ ይያ ባይዛንቻቱ ኔና ኡባና ꬋይሳና። 6 ህንተን ኤዶማ አሳቶ ኤሳ ዘረꬃቶ፥ ዋን ቦንቀታንድቴሻ! ቆሱዋን ደእያ ህንተንቱ አቁካ ዋን ቆጭረታንዴሻ! 7 ኔናና ጫቁዋን ደእያዋንቱ ኡባይ ኔና ነ ቢታፐ ጋጻ የደርሳና፤ ቃይ ነ ላገꬃቱካ ጭሚደ ኔና ጾናና። ኔናና ምያዋንቱካ ነዉ ጲርያ ጲራና፤ ሽን ኔን ሄዋ አኬካካ” ያጌ።
8 መꬍና ጎዳይ ቃይካ ሀዋዳን ያጌ፤ “ኤዶምያሰ ሙረትያ ሄ ጋላስ ታን ኤዶማፐ አꬌዳ ኤራንቻቱዋነ ኤሳ ደርያፐካ ኤራ ꬋይሳና። 9 ህንተኖ፥ ተማና አሳቶ፥ ህንተ ኦላንቻቱ ዳጋማና፤ ኤሳ አሳ ቦላ ደእያ አሳይ ኡባይካ ሹከታና።
ኤዶማ ጻላተꬃ
(10-14)
10 “ያቆባ ዛረ ግድያ ነ እሻቱዋ ኔን ዎꬌዳነ ቦንቄዳ ድራዉ፥ ኔን ዬላ ማያና፤ ኔን መꬍናዉ ꬋያና። 11 ሞርከቱ ዪደ ኡንቱንቱ አቁዋ ቦንቂያ ዎደ፥ ሄ ጋላስ ኔን ጋጻ ሺቃደ ኤቃ ጼላዳ። ቃይ ፐንግያና ገሊደ፥ የሩሳላመ ካታማ ሳማ የጊደ ሻኬዳ አላጋቱዋፐ ኔን እቱዋ ማላታሳ። 12 ኔን ነ እሻይ መቶትያ ጋላስ አ መቱዋን ናሸታናዉ በሰና፤ ቃይ ይሁዳ ጋድያን ደእያ ነ እሻቱዋ ቦላ ባሻይ ጋክያ ጋላስ ሀሹ ጋናዉ በሰና። ኤ፥ ኡንቱንቱ ኡንኣ ጋላስ ኡንቱንቱ ቦላ ሚጫናዉነ ኦቶረታናዉ በሰና! 13 ኡንቱንቱ ቱጋ ጋላስ ታ አሳይ ደእያ ካታማ ገላናዉነ ኡንቱንቱ ዋይያ ጋላስ ኔን ናሸታናዉ በሰና ሽን! ቃይ ኡንቱንቱ ባሻ ጋላስ ኔን ኡንቱንቱ ዱረታ ቦንቃናዉ በሰና፤ 14 ኡንቱንቱፐ ባቃትያዋንታ ዎꬋናዉ ኔን ባላ ኦግያን ቆሰታ ኡታደ ናጋናዉነ አቴዳዋንታካ ኡንቱንቱ ኡንኣ ጋላስ ሞርከቶ አꬃደ እማናዉ በሰና ሽን!
እስራኤልያ ጾኑዋ
(15-21)
15 “አይሁዳ ግደና አሳቱዋ ኡባ ቦላ መꬍና ጎዳ ጋላሳይ ጋኬዳ። ኔኖ ኤዶማ፥ ኔን ሀራቱ ቦላ ኦꬄዳዌ ነ ቦላ ኦሰታና፤ ነ ኮባይካ ነ ሁጲያን ስማና። 16 ታ ጌሻ ደርያ ቦላን ኡሼዳዋዳን፥ ሄዋዳንካ ኡንቱንቱ ዩሹዋን ካዉተꬃቱ ዛር ዛሪደካ መቱዋ ጹኣ ኡሻና፤ ኡሺደ ኡንቱንቱ ኡባይካ ካሰ ሀን ኤረናዋ ሀናና።
17 “ሽን ጽዮነ ደርያን ባሻፐ ከስ አክያዋንቱ ደአና፤ ጽዮኒካ ጌሻ ግዳናዋ፤ ያቆባ ዛራቱካ ባረንቱ ቢታ ላታና። 18 ያቆባ ዘረꬃይ ታማ ግዳና፤ ዮሴፎ ዛራቱካ ላጮ ግዳና፤ ኤሳ ዛራቱ ኡቱላ ግዳናዋንታ። ታማይ ኡቱላ ምያዋዳን፥ ያቆባ ዛራቱነ ዮሴፎ ዛራቱ ኤሳ ዛራቱዋ ሚደ ኡባናካ ꬋይሳና” ያጌ መꬍና ጎዳይ።
19 ይሁዳፐ ገድሳ ባጋን ደእያ አሳይ ኤሳ አሳ ላታና፤ ጋꬋትያ ቢታን ደእያ አሳይ ፕልስጼማቱዋ ቢታ ላታና። ኡንቱንቱ ኤፍሬማ ቢታነ ሳማርያ ቢታ ላታና። ቃይ ቢንያማ ዛራቱካ ጋላኣደ ቢታ ላታና። 20 ኦሞደቲደ ደኤዳ እስራኤልያ አሳይ ስሚደ፥ ካናነ ቢታ ስራፍታ ግያ ካታማ ጋካናዉ ላታና፤ ቃይ የሩሳላመፐ ኦሞደቲደ፥ ሳፋራዳ ግያ ሳኣን ደእያ አሳቱ ይሁዳፐ ገድሳ ባጋን ደእያ ካታማቱዋ ላታናዋንታ። 21 አሽያ እስራኤልያ አሳቱ ኤሳ ቢታ ሞዳናዉ ጽዮነ ቢታ ቦላ ከሳና፤ ካዉተꬃይካ መꬍና ጎዳዋ ግዳናዋ።