1 ህንተኖ፥ የሩሳላመ አሳቶ፥ ህንተ ኦላንቻቱዋ ሺሽተ! አያዉ ጎፐ፥ ኑን ሞርከቱዋን ዳደቴዳ፤ ኡንቱንቱካ እስራኤልያ ካለꬅያዋ ጋፓታ ጋትማን ሾጫናዉ ሀኒኖ።

2 መꬍና ጎዳይ ሀዋዳን ያጌ፤ “ኔኖ ኤፍራታ፥ ቤተሌመ ካታማዉ፥ ኔን ይሁዳ ካታማቱዋ ግዶን ጉꬃ፤ ሽን አዉ ደንዱ በንፐ ዶሚደ፥ መꬍናፐ ግዴዳዌ፥ እስራኤልያ አሳ ሞድያዌ ታዉ ኔፐ ከሳና” ያጌ። ማቶሳ 2:6፤ ዮሃ. 7:42

3 ሄዋ ድራዉ፥ የሉዋ ኦይቀትያ ምሽራታ ሄ ናኣ የላና ጋካናዉ፥ መꬍና ጎዳይ እስራኤልያ አሳ ሞርከቱዋ ኩሽያን አꬂደ እማና። ሄዋፐ ጉይያን፥ ኦሞዱዋን ደእያ አ እሻቱ ስሚደ፥ ባረንቱ አሳና ዋላከታና። 4 እ ያና፤ መꬍና ጎዳ ምኖተꬃን፥ መꬍና ጎዳ ባረ ጾሳ ሱንꬃ ግታተꬃን ባረ አሳ ሄማና። እ ሳኣ ጋጻ ጋካናዉ ዎልቃማ ግድያ ድራዉ፥ ኡንቱንቱ ሳሮተꬃን ደአና። 5 እ ኡንቱንቶ ሳሮተꬃ ግዳናዋ።

አሶረ ጋድያ አሳቱ ኑ ጋድያ ዎራጅያ ዎደነ ኑ ጌሱዋካ የደርሲደ ገልያ ዎደ፥ ኑን አሳ ሄማናዉነ ካለꬃናዉ ግድያነ ግዲደ ፓላህያ አሳ ደንꬂደ፥ ኡንቱንቱና ኦላ ጋከታና። 6 ኡንቱንቱ አሶረ ጋድያ ኦላን ጾናና፤ ቃይ ሄ ጋድያን ደእያ ናምሩድ ኬጼዳ ጋድያ ሞዳና። አሶረ ጋድያ አሳቱ ኑ ጋድያ ዎራጅያ ዎደነ ኑ ዛዋካ የꬍያ ዎደ፥ ኑ ጋድያ ሞድያዌ ኑና ኡንቱንቱፐ አሻና። ዶመꬃ 10:8-11

7 ያቆባ ዛራቱ አትያዋንቱ ዳሮ ጋደ አሳ ግዶን መꬍና ጎዳይ ኪቴዳ ጮኩዋ ማላነ ማታ ቦላን ዎꬍያ ፑስያ ማላ ግዳናዋ። ጮኩነ ፑስ ያናዉ አሳ አዛዙዋ ናገናዋዳን፥ እስራኤልያ አሳይካ መꬍና ጎዳፐ አትና፥ አሳ ናገና። 8 ያቆባ ዛራቱ አትያዋንቱ ካዉተꬃቱዋ ግዶን፥ ዳሮ አሳ ግዶን፥ ባዙዋ ዶአቱዋ ግዶን ደእያ ጋሙዋ ማላነ ዶርሳ ዉድያ ግዶን ደእያ ዎዳላ ጋሙዋ ማላ ግዳናዋ። እ ሄዋና ካንꬅያ ዎደ የረረቴነ መንሬꬄ፤ ኦንነ አሻናዉ ዳንዳየና። 9 ነ ኩሺ ኔናና ኤቀትያዋንቱ ቦላ ደንዳና፤ ነ ሞርከቱ ኡባይካ ꬋያና።

10 መꬍና ጎዳይ ሀዋዳን ያጌ፤ “ሄ ጋላስ ታን ነ ፓራቱዋ ነ ግዶፐ ꬋይሳና፤ ነ ፓራ ጋረቱዋካ መንሬꬃና። 11 ታን ነ ጋድያ ካታማቱዋ ꬋይሳና፤ ነ ጌሱዋካ ኡባ ላላና። 12 ቃይ ነ ካዩዋ ታን ꬋይሳና፤ ሙሩንያዋንቱካ ሀዋፐ ስንꬃናዉ ነ ግዶን ደእክኖ። 13 ታን ነ ኤቃ ምስለቱዋነ ነ ጎይናናዉ ኤሴዳ ሹቻቱዋ ነ ግዶፐ ꬋይሳና፤ ሀዋፐ ስንꬃናዉ ኔን ነ ኩሽያን መꬌዳባዉ ጎይናካ። 14 ታን አሼሮ ግያ ጾሳት ምስልያ ነ ግዶፐ ꬎቆላና፤ ነ ካታማቱዋካ ꬋይሳና። 15 ታዉ አዛዘትቤና ካዉተꬃቱዋ ቦላ ይሉዋንነ ሀንቁዋን ታን ሀሉዋ ከሳና” ያጌ።