1 መꬍና ጎዳይ እስራኤልያ አሳና ሞተትያዋ ስስተ።

“ደንዳ! ደንዳደ ꬎቃ ደረቱዋ ስንꬃን ፕርደታ፤ ኔን ግያዋ ደረቱካ ስስኖ። 2 ህንተኖ ደረቶ፥ ህንተኖ፥ ሳአይ ኤቄዳ ምኖ ባሶቶ፥ መꬍና ጎዳይ ሞትያ ሞቱዋ ስስተ። መꬍና ጎዳይ ባረ አሳና ሞተቴ፤ እስራኤልያ አሳና እ ፓሉመቴ።”

3 መꬍና ጎዳይ ኡንቱንታ ሀዋዳን ያጌ፤ “ታ አሳዉ፥ ታን ህንተና ዋታድታ? ታን ህንተንቶ ዋናደ ቶኩዋ ግዳድታ? አነ ታዉ ኦድተ! 4 ታን ህንተና ግብጼ ጋድያፐ ከሳድ፤ ቃይ ህንተና አይለተꬃፐ ዎዛድ። ህንተና ካለꬃና ማላ ሙሳ፥ አሮናነ ሚርያሞ ህንተዉ ኪታድ። ከሳ 4:10-16፤ 12:50-51፤ 15:20 5 ታ አሳዉ፥ ሞኣባ ካትያ ባላቅ ሀልቼዳዋነ ብኦራ ናአይ ባላም አዉ ዛሬዳዋ ሀሳያ። ሺጽማ ግያ ሳፐ ገልጋል ኔን ብያ ዎደ፥ ኦግያን ሀኔዳዋ አነ ሀሳያ። ሄዋ ሀሳዮፐ፥ ታን መꬍና ጎዳይ ኔና አሻናዉ ኦꬄዳ ኦሱዋ ኔን አኬካና” ያጌ። ፓይ. 22:2—24:25፤ ኢያሳ 3:1—4:19

6 መꬍና ጎዳ፥ ꬎቃ ሳኣን ደእያ ጾሳ ስንꬃን ጎይናናዉ ያደ ታን አያ አካደ ሺቆ? አዉ ጹገትያ ያርሹዋ ግዳና ማላ፥ እት ላይꬃ ግዴዳ ኮሩማቱዋ አካደ፥ አ ስንꬃ ዮሻ? 7 መꬍና ጎዳይ ሻአ ዶርሳ ኦርገቱዋን ዎይ ታሙ ሻአ ሻፋቱዋን ደእያ ሃꬃ ኬሻ ዎጋራ ዛይትያን ናሸታንዴ? ታ ናቁዋ ድራዉ፥ ታ ባይራ ናኣ፥ ታ ሸምፑዋ ናጋራ ግሻዉካ ታ የሉዋ እሞሻ?

8 ሀይ አሳዉ፥ መꬍና ጎዳይ ነዉ ሎኦባ ኦድ ዎꬄዳቴ። መꬍና ጎዳይ ኔፐ ኮይያዌ አዬ ጎፐ፥ ኔን ሱረባ ኦꬃናዋ፥ አገና ሲቁዋ በሳናዋነ አሽከተꬃን ነ ጾሳና ሀመታናዋ።

9 መꬍና ጎዳዉ ያይያዌ አꬌዳ ኤራተꬃ። የሩሳላመ ካታማ አሳ ጾሳይ ሀዋዳን ያጌ፤ “ሙራና ጋትማነ ሄ ጋትማ ጊግሴዳዌካ ኦነንቶ አኬክተ። 10 ናጋራንቻ ጎልያን ደእያ ናጋራን ሺሼዳ ሻሉዋነ ታ እጽያ ዎርዶ ማክያ ሚሻቱዋ ታን ዶጋኔየ? 11 ያትና፥ ሀ ዎርዶ ሚዛናን ልክያዋነ ዎርዶ ሚሻን ማክያ አሳ ናጋራ ታን ዋታደ አቶ ጋናዉ ዳንዳያይታ? 12 ሄ ካታማ ዱረቱ ማካላን ኩሜዳዋንታ፤ አን ደእያ አሳይ ኡባይ ዎርዱዋ። ኡንቱንቱ ዶና ግዶን ደእያ ኡንቱንቱ እንጻርሳይካ ባረ ሁጲያዉ ጌላ።

13 “ሄዋ ድራዉ፥ ታን ህንተ ናጋራ ጋሱዋን ህንተና ꬋይሳናዉነ ድጋናዉ ደንዳድ። 14 ህንተ ማና፥ ሽን ካልክታ፤ ናፍሳይካ ህንተፐ ዱጸና። ህንተ ቡሪደ ሺሻና፥ ሽን ህንተንቶ ዳጋተና፤ ህንተ ዳጋዬዳዋካ ታን ኦላ የዳደ ꬋይሳና። 15 ህንተ ካꬃ ዘራና፥ ሽን ጋክና ጫክክታ፤ ዎጋራ ቴራ ጉምአና፥ ሽን ሄ ዛይትያ ኦከትክታ፤ ዎይንያ ቴራካ ህንተ ጉምአና፥ ሽን አ ኤሳ ኡሽክታ። 16 ህንተ ካትያ ኦምራ ዎጋ፥ አ ናኣ ካትያ አካባ ጎለ ኢታ ኦሱዋነ ኡንቱንቱ ዞርያ ካሌዳ ድራዉ፥ ታን ህንተና ꬋይሳና፤ ታን ህንተና አሳይ ኡባይ ቦርያባ ኦꬃና። አሳይ ኡባይ ህንተና ሸቂያ ሸቃካ ህንተ ቶካና” ያጌ። 1 ካታ. 16:23-34፤ 21:25-26