7
እስራኤልያ አሳ ቱናተꬃ
1 አየ አና ታኖ! ታን ቴራይ ማጸት ዉር ክችና ዪደ፥ ዎይንያ ቱራፐነ ባላስያ ምꬃፐ ባረ አሞቴዳዋ ደማናዉ ዳንዳይቤና ኮሻቴዳ ብታንያ ማላ ግዳ ክቻድ። 2 ጾሳ ዶስያ ኬካ አሳይ ጋድያን ሙለካ ባዋ፤ አሳ ጋርሳን ሱረ አሳይ ꬋዬዳ። አሳይ ኡባይ አሳ ሱꬃ ጉሳናዉ ዙጊድ ናጌ፤ ቃይ ኡባይካ ባረ እሻ ግትያን ኦይቃናዉ ካሌ። 3 ኡንቱንቱ ኩሸቱ ላኡካ ኢታባ ኦꬃናዉ ሎህ ኡቴድኖ። ካፑነ ዳናይ ማታይያ ኦቺኖ፤ ዎልቃማ አሳቱ ባረንቱ አሞቴዳዋ ኦዲኖ፤ ኡንቱንቱ ኡባይካ እትፐ ኢታ ኦꬂኖ። 4 ኡንቱንቱ ጋርሳን ኤበሎ ኬካ ግያዌ አጉንꬃ ማላ፤ ቃይ ኤበሎ ሱረ ግያዌ ጎምኦርያ ማላ። ጾሳይ ትምቢትያ ኦድያዋንቱ ባጋና ኦዴዳዋዳን፥ እ ባረ አሳ ሙሪያ ጋላሳይ ጋኬዳ፤ ኡንቱንቱ ሻቢረትያ ዎዲካ ሀአ።
5 ነ ሾሩዋ አማኖፓ፤ ነ ላግያካ አማነቶፓ። ኔን ቆማደ አቅያ ነ ማቻትዉካ ኦድያዋካ አኬካደ ኦዳ። 6 አያዉ ጎፐ፥ ናአይ ባረ አዉዋ ካꬌ፤ ናታ ባረ ዳይ ቦላ፥ ናኣ ማቻታካ ባረ ቦሎታት ቦላ ደንድኖ፤ አዎ አዉ ሶ አሳይ ሞርከ ግዴ። ማቶሳ 10:35-36፤ ሉቃሳ 12:53
7 ሽን ታና ግዶፐ፥ ታን ህዶታን መꬍና ጎዳ ጼላሻና፤ ታና አሽያ ጾሳ ታን ናጋሻና፤ ታ ጾሳይ ታዋ ስሳና።
አሳይ ጾሳኮ ስሙሳ
(7:8-20)
8 ታ ሞርክያዉ፥ ታ መቱዋን ናሸቶፓ። ታን ኩንዶፐካ ደንዳና፤ ታን ꬉማን ኡቶፐካ፥ መꬍና ጎዳይ ታዉ ፖአና። 9 ታን ጾሳ ናቃድ፤ ሄዋ ድራዉ፥ እ ታዉ ሞተቲደ፥ ታ ፕርዳ ከሳና ጋካናዉ፥ ታን አ ሀንቁዋ ዳንዳያና። እ ታና ፖኡዋ ከሳና፤ ታንካ እ አሽያ አሹዋ በአና። 10 ሄ ዎደ ታ ሞርኪካ በአና፤ ቃይ ታና፥ “መꬍና ጎዳይ ነ ጾሳይ ሀቃን ደኢ?” ያግ ያግ ቅሊጭያዌ ዬላ ማያና፤ እ ኦግያን ደእያ ኡርቃዳን የትሽንካ ታን ታ አይፍያን በአና።
11 ህንተኖ፥ እስራኤልያ አሳቶ፥ ህንተ ካታማ ግምቢያ ድርሳቱ ድረትያ ጋላሳይ ያና፤ ሄ ጋላስ ህንተ ዛዋይካ አካና። 12 ሄ ጋላስ ህንተ አሳይ ህንተኮ ስማና። ኡንቱንቱ አሶረ ጋድያፐ፥ ግብጼ ካታማቱዋፐ፥ ኤፍራጺሳ ሻፋ ሄራን ደእያ ሳአቱዋፐነ ቃይ ሃኮ ሳን ደእያ አባቱዋ ዶናፐነ ꬎቃ ደረቱዋፐ ህንተኮ ስማና። 13 ሽን ቢታይ አን ደእያ አሳ ኢታተꬃ ጋሱዋን አሳይ ባይና መላ ግዳና።
መꬍና ጎዳይ እስራኤልያዉ ቃረቴዳ ቃረታ
14 ኔን ነ አሳ፥ አራዳ ቢታይ ዩሹዋን ደእያ ባዙዋን ባረካ ደእያ ነ ቡዞ ዶርሳ ዉድያ ነ ጋትማን ሄማ። ኡንቱንቱ ካሰዋዳንካ ባሳነንነ ጋላኣደን ሄመትኖ።
15 መꬍና ጎዳይ፥ “ህንተ ግብጼ ጋድያፐ ከሴዳ ዎድያዳን፥ ታን ህንተና ማላልስያባ በሳና” ያጌ።
16 ካዉተꬃቱ ኡባይ ሄዋ በኢደ ዬላታና፤ ኡንቱንቱ ዎልቃይካ ሀዳ ግድያ ድራዉ፥ ኡንቱንቱ ዬላቲደ፥ ባረንቱ ዶና ኦይቃና፤ ኡንቱንቱ ሀይꬃይካ ቱላና። 17 ኡንቱንቱ ሾሻዳን፥ ቢታ ላጫና፤ ሳኣና ትራን ጎሸትያ መታቱዋዳን ኮኮሪደ፥ ባረንቱ ጌሱዋፐ ከሳና። ዎልቃማ ዳጋማን መꬍና ጎዳኮ፥ ኑ ጾሳኮ፥ ስማና፤ ኡንቱንቱ ኔና ያዪደ ደአና።
18 ናቁዋ አቶ ያግያዌ፥ ባረ አሳ አቴዳዋንቱ ማካላ ፓይደናዌ ነ ማላ ጾሳይ ኦኔ? ኔን ሀንቁ ሀንቆሽን፥ መꬍናዉ ደአ አጋካ፤ አያዉ ጎፐ፥ ኔን ነ አሳዉ ነ አገና ሲቁዋ በስያዋን ናሸታሳ። 19 ኔን ኑዉ ቃይካ ቃረታና፤ ኑ ናቁዋ ነ ገድያን የꬋና፤ ኤ ኑ ናጋራካ አባ ጪሙዋን ኦላና። 20 ኔን በንፐካ ዶማደ ኑ ማይዛ አዋቶ ገፓደ ጫቄዳዋዳን፥ አብራሃማነ ያቆባ ዛረ ግዴዳ ነ አሳዉ ነ አማነትያዋነ ነ አገና ሲቁዋ በሳና።