ናሆማ ትምቢትያ
ገሉዋ
ናሆማ ግያ ሱንꬃ ብለꬃይ፥ “ጾሳይ ምንꬅያዋ ግያዋ።” ናሆማ ማጻፋይ በንፐ ዶሚደ እስራኤልያዉ ሞርከ ግዲደ ደኤዳ አሶረ ካዉተꬃ ዋና ካታማ ነነዌ ኩንደꬃ ናሸቻ ግጽምያን ኦዴ። መቀꬃ ኢታነ ኦቶራንቻ ግዴዳ ነነዌ ካታማይ፥ የሱሳ የለታፐ ካሰ ላፑንꬃ ጼቱ ላይꬃ ዉርሰꬃን ኦላን ባዬዳ። ሄዌካ መቀꬃ ኢታነ ኦቶራንቻ አሳ ቦላ ጾሳይ ዎት ፕርድንቶ በሴ።
ሸምፓቱዋ ኡባቶ እመቴዳ ቃንꬃ ቆፋቱዋ
1. ያሽያ ጾሳ ሀንቁዋ 1:1-6
2. አሶራ ቦላ አꬌዳ ፕርዳይ እስራኤልያ አሳዉ ህዶታ ቤትሴዳ 1:7-15
3. አሶራ ሁጰ ካታማ ናናዌ ባየꬃ 2:1—3:19
1
ያሽያ ጾሳ ሀንቁዋ
(1:1-6)
1 ኤልቆሻ ጌተትያ ሳን ደእያ ናሆመ ነነዌ ቦላ ጾሳፐ አኬዳ ኪታይነ በኤዳ ሳፃ ማጻፋይ ሀዋ። ኢሳ. 10:5-34፤ 14:24-27፤ ሶፎ. 2:13-15
ነነዌ ቦላን ጾሳይ ሀንቀቴዳ ሀንቁዋ
2 መꬍና ጎዳይ ቃናትያነ ሀሉዋ ከስያ ጾሳ፤ መꬍና ጎዳይ ሀሉዋ ከስያዋነ ሀንቁዋን ኩሜዳዋ፤ መꬍና ጎዳይ ባረናና ኤቀትያዋንቶ ሀሉዋ ከሴ፤ ቃይ ባረ ሞርከቱዋ ሙራናዉ ባረ ሀንቁዋ ጊግስ ዎꬄዳ። 3 መꬍና ጎዳይ ሀንቀታናዉ ኤሌለና፤ ዎልቃይካ አዌ ዎልቃማ፤ እ ባይዛንቻ አያ ግዶፐነ፥ ሙረናን አገና።
መꬍና ጎዳዉ ጎቱዋንነ ቤታ ግዶን ኦጊ ደኤ፤ ሻሪካ አ ገዲ የꬍና ደንድያ ባና። 4 እ አባ ሴሪደ መልሴ፤ ሻፋቱዋ ኡባካ ቶይሴ። ባሳነንነ ቃርመሎሳን ደእያ ምꬃቱነ ማታቱ ሹሊኖ። ሊባኖሳ ጪሻይካ ቆቆፈቴ። 5 አ ስንꬃን ደረቱ ቃጺኖ፤ ዞዘቱካ ሲሊኖ። እ ቆንጭያ ዎደ ቢታይ ሳአይ ቃጻና፤ ሳኣን ደእያባይ ኡባይካ ኮኮራና። 6 አ ሀንቁዋ ስንꬃን ኤቃናዌ ኦኔ? አ ሀንቁዋ ሱሉዋካ ዳንዳያናዌ ኦኔ? አ ሀንቁ ታማዳን ቡክያ ዎደ፥ ዛላቱ ዛኢደ ጳልቀቲኖ።
አሶረ ቦላ አꬌዳ ፕርዳይ እስራኤልያ አሳዉ ህዶታ ቤትሴዳ
(1:7-15)
7 መꬍና ጎዳይ ኬካ፤ መቱዋ ጋላስካ ባቃት አትያሳ፤ እ ባረኮ ባቃት አታናዉ ኮይያዋንታ ኤሬ። 8 ሽን እ ባረ ሞርከቱዋ ድኡዋን ሙክሲደ ꬋይሳና፤ ባረናና ኤቀትያዋንታካ ꬉማዉ የደርሳና።
9 ህንተ መꬍና ጎዳ ቦላ ማቀትያዌ እ አዬ? እ ህንተና ኡባና ꬋይሳና፤ ላኤንꬁዋ ꬋይሳናዉ ደንደና። 10 ህንተንቱ፥ ባጽባለቴዳ አጉንꬃ ማላቱ፥ ቃይ ኡሺደ ማꬆቴዳዋዳን ጋንድጋርያዋንቱ፥ መላ ኡቱላዳን ታማን ጹገት ꬋያና። 11 ነነዌ፥ መꬍና ጎዳ ቦላ ኢታባ ቆፕያዌ፥ ኢታ ዞርያ ዞርያዌ ነ ግዶፐ ከሴዳ።
12 መꬍና ጎዳይ ሀዋዳን ያጌ፤ “ናናዌቱ ምኖነ ጮራ ግዶፐካ፥ ꬎቆለቲደ ꬋያና። ይሁዳ አሳዉ፥ ታን ህንተና ካሰ ቱጋያድ፤ ሽን ሀዋፐ ስንꬃናዉ ቱጋይከ። 13 ሀእ ታን አሶረቱዋ ሞርገ ምꬃ ህንተ ሞርግያፐ መንꬃና፤ ህንተ ኡቁና ቃሹዋካ ታን ዱሰረꬃና” ያጌ።
14 ነነዌ፥ መꬍና ጎዳይ ነ ቦላ ፕርዴዳ ፕርዳይ ሀዋዳን ያግያዋ፤ “ሀዋፐ ስንꬃናዉ ነ ሱንꬃ ጼስስያ ዘረꬃይ ነዉ ደኤና። ነ ጾሳቱዋ ጎልያን ደእያ ምስለቱዋነ ኤቃቱዋ ታን ꬋይሳና። ኔን ዳምበናዋ ግዴዳ ድራዉ፥ ታን ነ ዱፉዋ ቦካና” ያግያዋ።
15 በእተ፥ እት ኪተቴዳዌ ሎኦ ምሽራቹዋ ኦዲድነ ሳሮተꬃ አዋዪደ፥ ꬎቃ ደረቱዋ ቦላና ጋኬዳ። ህንተኖ፥ ይሁዳ አሳቶ፥ ህንተና ꬋይስያ ሞርከቱ ኡባና ꬋዬድኖ፤ ኡንቱንቱ ላኤንꬆ ህንተ ቢታ ዎራጅክኖ። ሄዋ ድራዉ፥ ህንተ ባላቱዋ ቦንችተ፤ ህንተ ሺቄዳዋካ ጋꬅተ።ኢሳ. 52:7