1 ኔኖ ናናዌ ካታማዉ፥ ꬋይስያባይ ዬዳ! ሄዋ ድራዉ፥ ነ ጌሱዋ ናጋ፤ ነ ኦግያካ ዎቻ፤ ነ ዳንጩዋ ምንሳ፤ ነ ዎልቃካ ሎይꬃ ምንሳ።

2 ꬋይስያዋንቱ፥ እስራኤልያ አሳነ ዎይንያ ቱራ ꬋይሶፐካ፥ መꬍና ጎዳይ እስራኤልያ ቦንቹዋነ ያቆባ ቦንቹዋ ዛራና።

3 ኦላንቻቱዋ ጎንዳላቱ ዞኦ፤ ኦላንቻቱካ ዞኦ ማዩዋ ማዬድኖ። ኡንቱንቱ ኦላዉ ጊግያ ዎደ፥ ፓራ ጋረቱዋ ብራታይ ታማ ላጩዋዳን ጶልቁ ጊኖ፤ ኡንቱንቱ ባረንቱ ቶራ ቶማካ ጊግሴድኖ። 4 ፓራ ጋረቱ ኦግያን አንዳራሱዋ ክንቺኖ፤ ኡንቱንቱ ያነ ሃነ ጃሚደ፥ ካታማ ኦግያን ዩዪኖ። ቃይ ኡንቱንቱ ላጩ ፖዱ ግያ ጾምፕያ ማላቲኖ፤ ዋልቃንꬃዳንካ ኤሌሊኖ። 5 እ ባረ ኦላ ካፓቱዋ ጼሲደ ሺሼ፤ ሽን አ ካፓቱ ሀመቲደ ꬉበቲኖ። ኡንቱንቱ ካታማ ግምቢያ ድርሳኮ ኤሌሊኖ፤ ኡንቱንታ ሞርከቱዋ ቆሁዋፐ ናግያ ዎልቃማ ጎንዳሊ ጊጌዳ። 6 ሻፋ ባጋና ደእያ ካታማ ድርሳ ፐንገቱ ዶየቴድኖ፤ ካትያ ጎሊካ ሻቢረቴዳ። 7 ካታማታ ኦሞደታደ ባዱ፤ እዝ ማጫ ቆማቱካ ካዮቲደ፥ ሀራጰቱዋዳን ዋሲኖ፤ ባረንቱ ትራካ ባቂኖ።

8 ዳጋት ኡቴዳ ሃꬃይ ፖክ በስና ጎግያዋዳን፥ ነነዌ አሳይ ካታማፐ ባቃታና። አሳይ ኡንቱንቱ ባረ ቃላ ꬎቁ ኦꬂደ፥ “ኤቂተ፤ ኤቂተ!” ያጊደ ጼሳና፤ ሽን ኦንነ ጉየ ጼለና። 9 ሄ ካታማ አቆ፥ አን ምንጀቴዳ ቦንቾ ሚሻስካ ፓይዱ ባዋ። ሄዋ ድራዉ፥ ሄ ብራ ቦንቂተ! ሄ ዎርቃካ ቃይ ቦንቂተ!

10 ነነዌ ካታማይ መላ ግዴዳ፤ ቃይ ኦኒደ ባዬዳ! አሳ ዎዛናይ ያሻን ሲሌዳ፤ ጋዱካ ኮኮሬዳ፤ አሳ ኡባ ጼሳይ ጋጅ ጋጄዳ፤ ሶምኢካ ቡላቴዳ! 11 ጋማቱዋ ጌሱዋ ማላ፥ ዎዳላ ጋማቱ ደኢያሳ ማላነ አቱማነ ማጫ ጋማቱ ባረንቱ ማራቱዋና ኡንቱንቱ ያሽስያዌ ባይናን፥ ዩይያ ዎራ ማላ ግዴዳ ናናዌ ካታማይ ሀእ ሀቃን ደኢ? 12 ጋሙ ባረ ማራቶ ግድያባ ኦይቄዳ፤ ማጫ ጋማትስካ መንሬꬂደ እሜዳ። ባረ ጌሱዋ ሃስ ኦይቄዳዋን፥ ባረ ጎንጎሉዋካ ሃስ አሄዳ አሹዋን ኩንꬄዳ።

13 ኡባፐ ዎልቃማ መꬍና ጎዳይ ሀዋዳን ያጌ፤ “በአ፥ ታን ነ ቦላን ደንዳድ! ታን ነ ፓራ ጋረቱዋ ታማን ጹጋና፤ ነ ዎዳላ ጋማቱዋካ ማሻይ ማና። ኔን ሃሳይያዋ ታን ቢታ ኡባፐ ꬋይሳና፤ ነዉ ኪተትያዋንቱ ቃላይካ ላኤንꬆ ሙለካ ስሰተና” ያጌ።