7
የሱስ አሳ ዎጋፐ ኮሸናዋ ጳልቄዳ
(ማቶሳ 15:1-9)
1 ፓርሳዋቱነ የሩሳላመፐ ዪደ፥ ሙሴ ህግያ ታማርስያ አማሬዳ አሳቱ የሱሳኮ ሺቄድኖ። 2 የሱሳ ካልያዋንቱፐ እቱ እቱ ቱና ኩሽያን፥ ሄዋ ግያዌ ሜጨተናን ቁማ ምያዋንታ *ሜጨተናን ቁማ ምያዋንታ፦ አይሁደ አሳቱዋ ዎጋን ሜጨተና ኩሽያን ቁማ ሙሳይ ቱናዳን ፓይደቴ። ሄዎ ቁማ ማናፐ ካሰና ኩሽያ ሜቻ ሎይꬅ ምንሲኖ። በኤድኖ።
3 አያዉ ጎፐ፥ ፓርሳዋቱነ አይሁዳ አሳይ ኡባይ ባረንቱ አዎቱዋ ዎጋ ናጊደ፥ ባረንቱ ኩሽያ ሎይꬅ ሜጨተናን ሚክኖ። 4 ቃይ ገያፐ ዪደካ ሜጨተናን ደኢደ ሚክኖ። ቃይ ኡንቱንቱ ባረንቱ አዎቱዋፐ አኬዳ ሀራ ጮራ ዎጋይ ደኤ፤ ሄዌካ ዋንጫ፥ ከርያ፥ ብራታፐ መꬌዳ ሚሻነ አርሳ ሜጭያ ዎጋ።
5 ፓርሳዋቱነ ሙሴ ህግያ ታማርስያዋንቱ የሱሳ፥ “ኔና ካልያዋንቱ አያዉ ኑ አዎቱዋ ዎጋ ካለናን እጺደ፥ ባረንቱ ኩሽያ ሜጨተናን ቁማ ሚኖ?” ያጊደ ኦቼድኖ።
6-7 የሱስ ኡንቱንታ ሀዋዳን ያጌዳ፤ “እስያስ ትምቢትያ ኦዴዳ ዎደ፥ ህንተንቱባ፥ ሎአ ማላትያ ኢታቱባ ጻፌዳዋዳንካ፥
“ ‘ጾሳይ፥ “ሀዌ አሳይ ታና፥
ባረ ቦላ ዶናን ቦንቼ።
ሽን ኡንቱንቱ ዎዛናይ ታፐ ሃኩዋን ደኤ፤
አሳይ ታዉ መላ ጎይኔ።
አያዉ ጎፐ፥ አሳይ ኦꬄዳ አዛዙዋ፥
ጾሳ ህግያ ማላትሲደ ታማርሴ” ጌዳ’
ያጊደ ትምቢትያ ቱሙዋ ኦዴዳ። ኢሳ. 29:13
8 “ጾሳ አዛዙዋ ህንተ አጊደ፥ አሳ ዎጋ ምንሲደ ናጊታ” ያጌዳ።
9 ቃይካ የሱስ፥ “ህንተንቱ ህንተ ዎጋ ናጋናዉ ጾሳ አዛዙዋ አጊታ። 10 አያዉ ጎፐ ሙሴ፥ ‘ነ አባነ ነ ዳዮ ቦንቻ’ ቃይ፥ ‘ባረ አባነ ባረ አቶ ቦርያዌ ሀይቁዋን ሙረቶ’ ያጌዳ። ከሳ 20:12፤ 21:17፤ ዎጋ 20:9፤ ዛረ. 5:16 11 ሽን እት ኡራዉ ባረ አዉዋ ዎይ ባረ አቶ ማድያባይ ደእሽን እ፥ ‘ሀዌ ቁርባንያ፤ ሀዋ ጉሳይ ጾሳባ ግያዋ’ ጎፐ፥ 12 እ ባረ አዉዋ ዎይ ባረ አቶ ዎደፐ ማዳናዋ አይነ ኮይክታ። 13 ሀ ሀኖታን ህንተ ህንተንቱ ዎጋ ናጋናዉ፥ ጾሳ ቃላ ኮሊደ፥ ሄዋ ማላ ዳሮባ ኦꬂታ” ያጌዳ።
አሳ ቱንስያዋንታ
(ማቶሳ 15:10-20)
14 የሱስ ጮራ አሳ ቃይካ ባረኮ ጼሲደ፥ “ኡባይ ታን ግያዋ ስስተነ አኬክተ። 15 አሳፐ ከስያዌ አሳ ቱንስያዋፐ አትን፥ ካረፐ አሳ ግዶ ገሊደ፥ አሳ ቱንስያባይ አይነ ባዋ፤ 16 ስሳናዉ ሀይꬃይ ደእያ ኡራይ ኦንነ ስሶ” ያጌዳ።
17 የሱስ ጮራ አሳ አጊደ ሶይ ገሌዳ ዎደ፥ አ ካልያዋንቱ ሄ ሌምሱዋባ አ ኦቼድኖ። 18 እ ኡንቱንታ፥ “ህንተንቶካ ቃይ ገልቤኔ? ካረፐ አሳ ዎዛናን ገልያባይ አይነ አሳ ቱንሳናዉ ዳንዳየናዋ አኬኪቴ? 19 አያዉ ጎፐ፥ ቁማይ አሳ ኡሉዋ ግዶ ገሊደ፥ ካረዉ ከስያዋፐ አትን፥ አሳ ዎዛና ግዶ ገለና” ያጌዳ። ሀዋዳንካ የሱስ ቁማ ኡባይ ቱና ግደናዋ ኤርሴዳ።
20 ቃይካ የሱስ ሀዋዳን ያጌዳ፤ “አሳ ቱንስያባይ አሳ ዎዛና ግዶፐ ከስያባ። 21 አያዉ ጎፐ፥ አሳ ዎዛና ግዶፐ ከስያዌ ኢታ ቆፋ፤ ዎሹምያዋ፤ ዉእያዋ፤ ዎꬍያዋ፤ ጫራተꬃ፤ 22 ዮራተꬃ፤ ኡዝያ ዎይ ባረና ዶስያዋ፤ ኢታተꬃ ዎይ ጭምያዋ፤ ገንያ፤ ማጫዋ አሞትያዋ፤ ቃናትያዋ፤ ቦርያዋ ዎይ ዝግርያዋ፤ አዩዋ፤ ኤያተꬃ። 23 ሀ ኢታባይ ኡባይ አሳ ዎዛና ግዶፐ ከሲደ፥ አሳ ቱንሴ” ያጌዳ።
እት ግሪከ ምሽራት አማኑዋ
(ማቶሳ 15:21-28)
24 የሱስ ሄዋፐ አጊደ፥ ጺሮሳነ ሲዶና ግያ ካታማቱዋ ማታን ደእያ ጋድያ ቢደ፥ እት ጎልያ ገሌዳ፤ ቃይ እ ያን ደእያዋ ኦንነ ኤራናዋ ኮይቤና፤ ሽን ቆሰቲደ ጋምአናዉ ዳንዳይቤና። 25 ሽን ባረ ጉꬃ ናት ቦላ ኢታ አያናይ ደእያ እት ምሽራታ የሱሳባ ስሳደ፥ ኤለካ አኮ ያነ አ ገድያን ጉፋና አጋዱ። 26 ሄ ምሽራታ አይሁዳ አሳ ግዱኩ፤ አ የለቴዳዌካ ሶርያ ግያ ጋድያና፤ አ ባረ ናትፐ ጻላህያ ከሳና ማላ፥ የሱሳ ዎሳዱ።
27 ሽን የሱስ ዛሪደ፥ “ናናይ ካሰቲደ ቁማ ካልኖ፤ አያዉ ጎፐ፥ ናና ቁማ አኪደ፥ ካናቶ †ካናቶ፦ ሀ ቃላ እት እት አይሁደ አሳይ፥ አይሁደ ግደና አሳቶ ጎኤትያዋ። ኦልያዌ ሎአ ግደና” ያጌዳ።
28 ምሽራታ ዛራደ፥ “ቱማካ ታ ጎዳዉ፥ ሀራይ አቶ ሳምፓ ምይያን ደእያ ካናቱካ ናናቱዋፐ አቴዳ ሱፓ ሚኖ” ያጋዱ።
29 የሱስ ቃይ እዞ፥ “ሀ ኔን ሃሳዬዳ ቃላ ድራዉ፥ ጻላሂ ነ ናትፐ ከሴዳ፤ ስም ነ ሶይ ባ” ያጌዳ።
30 ምሽራታ ባረ ሶይ ብያ ዎደ፥ እዝ ናትፐ ጻላሂ ከስና፥ ሂጻን ግሴዳዉኖ ደማዱ።
የሱስ ቱለነ ዱደ ግዴዳ እት ብታንያ ፓꬄዳ
31 የሱስ ጺሮሳ ጋድያፐ ከሲደ፥ ሲዶናናነ ታሙ ካታማ ግያ ጋድያና ካንꬂደ፥ ጋሊላ አባኮ ቤዳ። 32 አሳይ ቱለነ ዱደ ግዴዳ ብታንያ የሱሳኮ አሂደ፥ ባረ ኩሽያ አ ቦላን ዎꬃና ማላ፥ የሱሳ ዎሴድኖ። 33 የሱስ ባረካ ሄ ብታንያ ጮራ አሳፐ ጋጻ ከሲደ፥ ባረ ብራꬍያ አ ሀይꬃን የዴዳ፤ ቃይ ጩቻ ጩቺደ፥ አ እንጻርሳ ቦቼዳ። 34 ሳሉዋ ፑደ ጼሊደ፥ ቶክ ሸምፒደ፥ “ኤፍታህ”‡ኤፍታህ፦ ሀ ቃላይ የሱስ ሀ አላምያን ደኢደ ታማርስያ ዎደ፥ ጎኤትያ አራማይከ ያገትያ ቃላን ሃሳዬዳዋ። ያጌዳ፤ ሄዋ ግያዌ ዶየታ ግያዋ። 35 ብታንያ ሀይꬃይ ኤለካ ዶየት አጌዳ፤ ቃይ አ ሃሳየና እንጻርሳይካ ብለት አጌዳ፤ ብታኒ አይነ ዋየተናን ሃሳዪ አጌዳ።
36 የሱስ አሳዉ፥ “ሀዋ ኦስነ ኦዶፕተ” ያጊደ ኦዴዳ፤ ሽን እ ዳርስ ምንስ ኦድና፥ አሳይ ቃይ ኦዱዋ ያ ዳርሴዳ። 37 ሄዋ ስሴዳ አሳይ ኡባይ ዳሮ ማላለቲደ፥ “ኡባባካ እ ሎይꬅ ኦꬄ። ሀራይ አቶ ቱልያካ ስሴ፤ ቃይ ዱድያካ ሃሳይሴ” ያጌድኖ።