9
የሱሳ ማላይ ላመቴዳዋ ኦድያ ታርክያ
(ማቶሳ 17:1-13፤ ሉቃሳ 9:28-36)
1 የሱስ ኡንቱንታ፥ “ታን ህንተንቶ ቱሙዋ ጋይ፤ አማሬዳ አሳቱ ጾሳ ካዉተꬃይ ዎልቃና ይያዋ በኤናን ሀይቀናዋንቱ ሀዋን ደኢኖ” ያጌዳ።
2 የሱስ ኡሱፑን ጋላሳፐ ጉይያን፥ ባረናና ጰጽሮሳ፥ ያቆባነ ዮሃንሳ አኪደ፥ ኡንቱንቱ ጻላላ ዎልቃማ ደርያ ቦላ ከሴዳ፤ ኡንቱንቱ ስንꬃን ላመቴዳ፤ 2 ጰጽ. 1:17-18 3 አ ማዩካ ጶሌዳ፤ ሳኣን ማዩዋ ሜጭያ ኦንነ ጌሻናዉ ዳንዳየናዋ ኬና ዳሪ ቦጼዳ። 4 ሄ ሄዙ የሱሳ ካልያዋንቱ፥ ኤላስነ ሙሴ የሱሳና ሃሳይያዋንታ በኤድኖ።
5 ጰጽሮስ የሱሳ፥ “ታማርስያዎ፥ ኑን ሀዋን ደእያዌ ኑዉ ሎአ፤ ኑን ሄዙ ዳሳቱዋ እቱዋ ነዉ፥ እቱዋ ሙሴዉ፥ ቃይ እቱዋ ኤላሳዉ ኬጻና” ያጌዳ። 6 እ ዋጋነንቶነ ኤርቤና፤ አያዉ ጎፐ፥ እካ የኮንቱካ ዳሪ ያዬድኖ።
7 ሄዋፐ ጉይያን፥ ሻሪ ዪደ ኡንቱንታ ካምና ሻርያፐ፥ “ሀዌ ታን ሲቅያ ታ ናኣ፤ እ ግያዋ ስስተ” ግያ ቃላይ ዬዳ። 8 ኤለካ ኡንቱንቱ ዩሽ አꬅ ጼልያ ዎደ፥ የሱሳፐ አትን፥ ሀራ ኦናነ ባረንቱ ማታን በእበይክኖ።
9 ኡንቱንቱ ደርያፐ ዎꬍሽን፥ የሱስ ኡንቱንታ፥ “ታን፥ አሳ ናአይ፥ ሀይቁዋፐ ደንዳና ጋካናዉ፥ ህንተ በኤዳባ ኦስነ ኦዶፕተ” ያጊደ አዛዜዳ።
10 እ አዛዜዳዋ ኡንቱንቱ፥ “ ‘ኤኖ’ ጊደ፥ ሀ ሀይቁዋፐ ደንድያዋ ግያዌ ዋግያዌ” ያጊደ፥ ባረንቱ ግዶን ሃሳየቴድኖ።
11 ኡንቱንቱ የሱሳ፥ “ህግያ ታማርስያዋንቱ አያዉ፥ ‘ኤላስ ካሰቲደ ያናዉ በሴ’ ጊኖ?” ያጊደ ኦቼድኖ።
12 እ ዛሪደ ያጌዳ፤ “ቱማካ፥ ኤላስ ካሰት ዪደ፥ ኡባባ ጊግሴ፤ ያትና፥ አያዉ ጾሳ ማጻፋይ፥ ‘አሳ ናአይ ዳሪ ዋየታናነ እጸታና’ ያጊ? 13 ሽን ታን ህንተንቶ ኦዳይ፤ ኤላስ ዬዳ፤ ቃይ አባይ ጾሳ ማጻፋን ጻፈቴዳዋዳንካ፥ አሳይ አ ባረ ኮዬዳባ ኦꬄዳ” ያጌዳ።
የሱስ ኢታ አያናይ ኦይቄዳ ናኣ ፓꬄዳ
(ማቶሳ 17:14-21፤ ሉቃሳ 9:37-43)
14 የሱስ፥ ጰጽሮስ፥ ያቆብነ ዮሃንስ የኮ የሱሳ ካልያዋንቱኮ ስሚደ ይያ ዎደ፥ ጮራ አሳይ ሄ ካልያዋንቱ ዩሹዋን ኤቄዳዋነ ህግያ ታማርስያ አማሬዳ አሳቱ ኡንቱንቱና ፓሉመትያዋንታ በኤድኖ። 15 ሄ ጮራ አሳይ የሱሳ በኤዳ ዎደ ማላለት ዳጋሚደ፥ ኤለካ አኮ ዎጽ ዪደ፥ አ ሳሮቴዳ። 16 የሱስ ባረና ካልያዋንታ “ኡንቱንቱና አያ ፓሉመቲቴ?” ያጊደ ኦቼዳ።
17 ሄ ጮራ አሳ ግዶፐ እት ብታኒ ዛሪደ፥ “ታማርስያዎ፥ ታ ናኣ ቦላን ሃሳያ ድግያ ኢታ አያናይ ደእያ ድራዉ፥ አ ኔኮ አካደ ያድ። 18 ሀ ኢታ አያናይ አ ኦይቂያ ዎደ ኡባን፥ አ ኦሌ፤ አ ዶናናካ ሆሙ ፓሮቴ፤ ቃይ አቻ ጋርጭሴ፤ ቦላካ ዞልሴ። አፐ ሀ ኢታ አያና ከሳና ማላ፥ ኔና ካልያዋንቶ ኦዳድ፥ ሽን ከሳናዉ ዳንዳይበይክኖ” ያጌዳ።
19 የሱስ ዛሪደ ኡንቱንታ፥ “አማነና ሀ ዎድያ አሳዉ! ታን ህንተንቱና አዉደ ጋካናዉ ደአኔ? ቃይ ህንተንቱባ አዉደ ጋካናዉ ዳንዳያኔ? ናኣ ታኮ ሃ አክ ዪተ” ያጌዳ። 20 ኡንቱንቱ ናኣ አኮ አሄድኖ፤ ሄ ኢታ አያናይ የሱሳ በኢዴ ኤለካ ናኣ ኮኮርሲ አጌዳ፤ ናአይ ሳኣን ኩንዲደ፥ ዶናና ሆሙ ጎፑ ጊሽን ጎንዶረቴዳ። 21 የሱስ ሄ ናኣ አዉዋ፥ “ሀዌ ነ ናኣ ኦይቆደፐ ዎይሳ ዎደ ግዳኔ?” ያጊደ ኦቼዳ።
ናኣ አቡ፥ “እ ናአተꬃን ደእያ ዎድያፐ ዶሜዳ። 22 አ ዎꬋናዉ ዳሮ ዎደ ታማንነ ሃꬃን ኦሌዳ፤ ሽን ኔን ዳንዳዮፐ፥ ኑዉ ቃረታደ ኑና ማዳርኪ” ያጌዳ።
23 የሱስ አ፥ “ኔን ዳንዳዮፐ ጋይ? አማንያ አሳዉ ኡባባይ ዳንዳየቴ” ያጌዳ።
24 ኤለካ ናኣ አቡ ባረ ኮሻ ꬎቁ ኦꬂደ፥ “ታን አማናይ፤ ሽን ጉጃ አማናናዳን፥ ታና ማዳርኪ” ያጌዳ።
25 የሱስ አሳይ ዳር ዳር ብያዋ በኢደ፥ ኢታ አያና፥ “ናኣ ቱለነ ዱደ ኦꬄዳ አያናዉ፥ ሀ ናኣፐ ከሳ ጋደ ኔና ታ አዛዛይ፤ ቃይ ዛረꬃደ አን ገሎፓ” ያጌዳ።
26 ሄ ኢታ አያናይ ዋሲደ፥ ናኣ ዳርስ ኮኮርሲደ፥ አፐ ከሴዳ። ናአይ ሀይቄዳዋ ማላትና፥ ዳሮ አሳይ፥ “ናአይ ሀይቄዳ” ያጌዳ። 27 ሽን የሱስ ናኣ ኩሽያ ኦይቂደ ደንꬅና፥ ናአይ ደንድ ኤቄዳ።
28 የሱስ ሶይ ገሌዳዋፐ ጉይያን፥ አ ካልያዋንቱ የሱሳ ዱማ፥ “ኑን ሄ ኢታ አያና ከሳናዉ አያዉ ዳንዳይበይኮ?” ያጊደ ኦቼድኖ።
29 የሱስ ዛሪደ፥ “ሄዋ ማላይ ዎሳፐነ ጾማፐ አትን፥ ሀራባን ከሳናዉ ዳንዳየና” ያጌዳ።
የሱስ ባረና ጋካና መቱዋባነ ሀይቁዋባ ላኤንꬁዋ ኦዴዳ
(ማቶሳ 17:22-23፤ ሉቃሳ 9:43-45)
30 ኡንቱንቱ ሄዋፐ ደንዲደ፥ ጋሊላና አꬊደ ቤድኖ፤ የሱስ ባረ ደኢያሳ ኦንነ ኤራና ማላ ኮይቤና። 31 አያዉ ጎፐ፥ እ ባረና ካልያዋንታ “ታና፥ አሳ ናኣ፥ አሳይ አሳዉ አꬂደ እማናነ ዎꬋና፤ ታን ቃይ ሄዙ ጋላሳፐ ጉይያን፥ ሀይቁዋፐ ደንዳና” ያጊደ ታማርሴ።
32 ሽን ኡንቱንቶ እ ግያዌ ገልቤና፤ ቃይ አ ኦቻናዉካ ያዬድኖ።
ኡባፐ አꬍያዌ ኦኔ?
(ማቶሳ 18:1-5፤ ሉቃሳ 9:46-48)
33 ኡንቱንቱ ቅፍርናሆማ ግያ ካታማ ቤድኖ፤ ሶይ ገሌዳዋፐ ጉይያን፥ የሱስ ኡንቱንታ፥ “ኦግያን አያ ፓሉመቲቴ?” ያጊደ ኦቼዳ። 34 ሽን ኡንቱንቱ ቢደ ኦግያን፥ “ኑ ግዶን ኑ ኡባፐ አꬍያዌ ኦኔ?” ያጊደ ፓሉመቴዳ ድራዉ፥ ጮኡ ጌድኖ። 35 የሱስ ኡቲደ፥ ታማነ ላኡ ባረና ካልያዋንታ ጼሲደ ኡንቱንታ፥ “ኦንነ ስንꬃዉ አꬋና ኮዮፐ፥ ኡባፐ ጉየ አꬊደ፥ ሄ ኡባዉ ቆማ ግዳናዉ በሴ” ያጌዳ።
36 እት ጉꬃ ናኣ ኦይቂደ፥ ኡንቱንቱ ግዶን ኤሴዳ፤ ሄ ጉꬃ ናኣ እድሚደ ኡንቱንታ፥ 37 “ሀዋንቱ ማላ ጉꬃ ናናፐ እቱዋ ታ ሱንꬃን ሞክያ ኦንነ ታና ሞኬ፤ ቃይ ታና ሞክያ ኦንነ ታና ኪቴዳዋ ሞክያዋፐ አትን፥ ታ ጻላላ ሞከና” ያጌዳ።
የሱስ፥ “ኑባ ኤቀተና ኡራይ ኑ ባጋ” ያጌዳ
(ሉቃሳ 9:49-50)
38 ዮሃንስ አ፥ “ታማርስያዎ፥ እት አሳይ ነ ሱንꬃን ኢታ አያናቱዋ ከስያዋ ኑን በኢደ፥ ኑ ባጋ ግደና ድራዉ፥ አ ድጌዶ” ያጌዳ።
39 ሽን የሱስ ያጌዳ፤ “ኦንነ ታ ሱንꬃን ማላታ ኦꬂደ፥ ኤለካ ታ ቦላ ኢታባ ሃሳያናዉ ዳንዳይያዌ ባይና ድራዉ ድጎፕተ፤ 40 አያዉ ጎፐ፥ ኑባ ኤቀተና ኡራይ ኑ ባጋ። 41 ታን ህንተንቶ ቱሙዋ ኦዳይ፤ ህንተ ታዋንታ ክርስቶሳዋንታ ግድያ ድራዉ፥ ኦንነ ህንተንቶ ታ ሱንꬃን ቡልያ ሃꬃ ኡሻናዉ እሞፐካ፥ ባረ ጋትያ አካናዋ።
ናጋራ ጋሱዋ
(ማቶሳ 18:6-9፤ ሉቃሳ 17:1-2)
42 “ታና አማንያ ሀ ጉꬃቱዋፐ እቱዋ ባለꬅያ ኦናነ፥ ጋጭያ ዎጋ ዎጻ አ ቆꬍያን ቃቺደ፥ አባን አ ኦልያዌ አዉ ሎአ። 43-44 ነ ኩሺ ኔና ባለꬆፐ፥ ቃንጻ ኦላ፤ ኔን ላኡ ኩሽያና *ሀራ ጌሻ ማጻፋ ብለꬃቱ፥ ጉጹኒ ሙለ ሀይቀናሳነ ቃይ ሙለካ ቶኤና ጋናምያ ታማን፥ ያጌ። 9:45፣ 47 ጼልተ። ቃይ ኡባካ ቶኤና ጋናምያ ታማን ገልያዋፐ፥ ዱጻ ኩሽያና ደኡዋ ገልያዌ ነዉ ሎአ። 45-46 ነ ገዲ ኔና ባለꬆፐ፥ ቃንጻ ኦላ፤ ኔን ላኡ ገድያና ኡባካ ቶኤና ጋናምያ ታማን የገትያዋፐ፥ ዶማ ግዳደ ደኡዋ ገልያዌ ነዉ ሎአ። 47-48 ነ አይፊ ኔና ባለꬆፐ፥ ዎጫ ኦላ፤ ኔን ላኡ አይፍያና ኡባካ ቶኤና ጋናምያ ታማን የገትያዋፐ፥ እት አይፍያና ጾሳ ካዉተꬃ ገልያዌ ነዉ ሎአ።
49 “ቁማን ማጽንያ የግያዋዳን፥ ታማይ አሳ ኡባ ቦላ የገታና። 50 ማጽኒ ሎአ፤ ሽን እ ማልአና ꬋዮፐ፥ ዛሪደ አ ዎት ማልኤꬃንቴ? ህንተንቱን ማጽኒ ደኦ፤ †ህንተንቱን ማጽኒ ደኦ፦ ሀዋ ጉሳይ የሱሳን አማንያዋንቱ ባረንቱ አማኑዋፐ ደንዶ ጋሱዋን ኡንቱንቱ ቦላ መቱ ጋክንቶካ እቱ እቱዋና ሳሮተꬃን ደአናዉ በሴ። ያቲደ እቱ እቱዋና ሳሮተꬃን ደእተ” ያጌዳ።