1 የሱስ ሄዋፐ ደንዲደ፥ ዮርዳኖሳ ሻፋፐ ሄፍንꬃ ባጋና ይሁዳ ጋድያ ቤዳ። ጮራ አሳይ ሽረቲደ አኮ ሺቅና፥ ካሰ እ ኦꬅያዋዳንካ ሄ አሳ ታማርሱዋ ዶሜዳ።

2 እት እት ፓርሳዋቱ ፓጫናዉ የሱሳኮ ዪደ፥ “እት አሳይ ባረ ማቻቶ የዳናዉ ኑዉ ህጊ አዛዚ?” ያጊደ አ ኦቼድኖ።

3 እ ዛሪደ፥ “ሙሴ ህንተንታ ዋግ አዛዜዴ?” ያጌዳ።

4 ኡንቱንቱ፥ “ሙሴ፥ ‘እት አሳይ ባረ ማቻቶ ፓራማ እሚደ የዶ’ ጌዳ” ያጌድኖ። ዛረ. 24:1-4፤ ማቶሳ 5:13

5 የሱስ ዛሪደ ኡንቱንታ፥ “ህንተንቱ ኦድና ስሰናዋንታ ግድያ ድራዉ፥ ሙሴ ሀ አዛዙዋ ህንተንቶ ጻፌዳ። 6 ሽን ጾሳይ ኮይሮ መꬍያ ዎደ፥ አቱማ አሳነ ማጫ አሳ ኦꬂደ፥ ኡንቱንታ መꬌዳ።ዶመꬃ 1:27፤ 5:2 7 ሄዋ ድራዉ፥ እት አሳይ ባረ አባነ ባረ ዳዮ አጊደ፥ ባረ ማቻትና እቱዋ ግዴ፤ 8 ኡንቱንቱ ላአቱ እት አሾ ግዲኖ፤ ሄዋ ድራዉ፥ ኡንቱንቱ እት አሳ ግድያዋፐ አትን፥ ላኡ አሳ ግድክኖ። ዶመꬃ 2:24 9 ሄዋ ድራዉ፥ ጾሳይ እትፐ ጋꬄዳዋ አሳይ ሻኮፖ” ያጌዳ።

10 ኡንቱንቱ ሶይ ስሜዳ ዎደ፥ የሱሳ ካልያዋንቱ ሀ የዉዋባ የሱሳ ዛር ኦቼድኖ። 11 የሱስ ኡንቱንታ፥ “ባረ ማቻቶ የዲደ፥ ሀራሮ አክያ ኡራይ ኦንነ እዝና ዎሹሜ። 12 ቃይ ማጫዉናካ ባረ አስናፐ ከሳደ ሀራ አስና ገሎፐ ዎሹማዉ” ያጌዳ።

13 የሱስ ጉꬃ ናና ቦቻና ማላ፥ እት እት አሳይ ናና አኮ አሄዳ፤ ሽን የሱሳ ካልያዋንቱ ሄ አሳ ሴሬድኖ። 14 የሱስ ሄዋ በኢደ፥ ባረና ካልያዋንታ ሀንቀቴዳ፤ ኡንቱንታ፥ “ጉꬃ ናናይ ታኮ ይያዋንታ ድጎፕተ፤ አያዉ ጎፐ፥ ጾሳ ካዉተꬃይ ሀዋንቱ ማላሳ። 15 ታን ህንተንቶ ቱሙዋ ጋይ፤ ጾሳ ካዉተꬃ ጉꬃ ናኣዳን አከና ኡራይ ኦንነ ሄ ካዉተꬃ ኡባካ ገለና” ያጌዳ። 16 ጉꬃ ናና እድሚደ፥ ባረ ኩሽያ ኡንቱንቱ ቦላ ሁጲያን ሁጲያን ዎꬂደ፥ ኡንቱንታ አንጄዳ።

17 የሱስ ባናዉ ከሴዳ ዎደ፥ እት ብታኒ ዎጺደ ይ አ ስንꬃን ጉልባቲደ፥ “ሎኦ ታማርስያዎ፥ መꬍና ደኡዋ ላታናዉ ታን አያ ኦꬆ?” ያጊደ አ ኦቼዳ።

18 የሱስ፥ “አያዉ ታና ሎኦ ጋይ? ጾሳ ጻላላፐ አትን፥ ሀራ ሎኡ ኦንነ ባዋ። 19 ጾሳ አዛዙዋ፥ ‘ዎꬎፓ፤ ዎሹሞፓ፤ ዉኦፓ፤ ዎርዱዋ ማርካቶፓ፤ ጭሞፓ፤ ነ አባነ ነ ዳዮ ቦንቻ’ ያግያዋ ኤራሳ” ያጌዳ። ከሳ 20:12-16፤ ዛረ. 5:16-20

20 ብታኒ የሱሳ፥ “ታማርስያዎ፥ ታን ሄዋ ኡባ ናአተꬃፐ ዶማደ ሀእ ጋካናዉካ ናጋይ” ያጌዳ።

21 የሱስ ብታንያ ዶሴዳ፤ አ ጫድ ጼሊደ፥ “ነዉ እትባይ ፓጬዳ፤ ባደ ነዉ ደእያባ ኡባ ዛልኣደ፥ ሄ ሚሻ ህዬሳዉ እማ፤ ኔን ሳሉዋን ዱረታና። ያቶዋፐ ጉይያን ያደ ታና ካላ” ያጌዳ። 22 ሽን ብታኒ ሄዋ ስሲደ፥ እ ዳሮ ዱረ ግድያ ድራዉ፥ ባረ ሶምእያ ꬉምሲደ፥ ናሸተናን አጊደ ቤዳ።

23 የሱስ ባረና ካልያዋንታ ዩሽ አꬅ ጼሊደ፥ “ዳሮ ዱረ አሳይ ጾሳ ካዉተꬃ ገላናዉ ዋን መታንዴሻ!” ያጌዳ።

24 አ ካልያዋንቱ አ ሃሳያ ስሲደ ማላለቴድኖ፤ ሽን የሱስ ቃይካ ኡንቱንታ፥ “ናቶ፥ ጾሳ ካዉተꬃ ገላናዉ ዎት መታንዴሻ!*ዎት መታንዴሻ፦ ሀዋ እት እት ብለꬃይ ባረዉ ደእያባን አማነትያ አሳ ያጌ። 25 ዱረ አሳይ ጾሳ ካዉተꬃ ገላናዋፐ፥ ጋሉ ማርፕያ ጾእያና አꬋናዌ ማታቴ” ያጌዳ።

26 የሱሳ ካልያዋንቱ ማላለቲደ፥ “ያትና፥ ኦኔ አታናዉ ዳንዳይያዌ?” ያጊደ እቱ እቱዋ ኦቼድኖ።

27 የሱስ ኡንቱንታ ጫድ ጼሊደ፥ “ሀዌ ጾሳዉ ዳንዳየትያዋፐ አትን፥ አሳዉ ዳንዳየተና፤ አያዉ ጎፐ፥ ጾሳዉ ኡባባይካ ዳንዳየቴ” ያጌዳ።

28 ጰጽሮስ የሱሳ፥ “በአ፤ ኑን ኑባ ኡባ አጊደ፥ ኔና ካሌዶ” ያጌዳ።

29 የሱስ፥ “ታን ህንተንቶ ቱሙዋ ጋይ፤ ታ ድራዉነ ዎንጋላ ምሽራቹዋ ድራዉ፥ ጎልያ ዎይ እሻቱዋ ዎይ ምቻቱዋ፥ ዎይ አዉዋ ዎይ አቶ ዎይ ማቻቶ፥ ዎይ ናና ዎይ ጋድያ አጌዳ አሳይ ኦንነ፥ 30 ሀእ ሀ ዎድያን ጼቱ ዳኩዋፐ ዳርያ ጎለቱዋ፥ እሻቱዋ፥ ምቻቱዋ፥ አቶ፥ ናና፥ ጋድያ፥ ቃይ መቱዋካ አካናዋ። ስንꬃፐ ያና ዎድያንካ መꬍና ደኡዋ አካናዋ። 31 ሽን ጮራቱ ሀእ ስንꬃን ደእያዋንቱ ጉየ አꬋና፤ ቃይ ጮራቱ ሀእ ጉየን ደእያዋንቱ ስንꬃዉ አꬋና” ያጌዳ።

32 ኡንቱንቱ የሩሳላመ ቢደ፥ ኦግያን ደኢኖ፤ የሱስ ባረና ካልያዋንቱፐ ስንꬃና ሀመቴ። ኡንቱንቱ ማላለቴድኖ፤ አ ካልያዋንቱ ያዬድኖ። ዛሪደ ታማነ ላኡ ባረና ካልያዋንታ ጋጻ ከሲደ፥ ባረና ጋካናባ ዱማዪደ ኡንቱንቶ ሀዋዳን ያጊደ ኦዴዳ፤ 33 “በእተ፤ ኑን የሩሳላመ ሀእ ከሶይተ፤ ያን ታና፥ አሳ ናኣ፥ ቄሳቱዋ ካፓቶነ ሙሴ ህግያ ታማርስያዋንቶ አꬂደ እማና። ኡንቱንቱ ታ ቦላን ሀይቁዋ ፕርዳ ፕርዳና፤ ቃይ አይሁዳ ግደና አሳዉካ ታና አꬂደ እማና። 34 ሄ አይሁዳ ግደና አሳይ ታ ቦላ ቅሊጫናነ ጩቻና፤ ታና ልሱዋን ሾጫናነ ዎꬋና፤ ታን ቃይ ሄዙ ጋላሳፐ ጉይያን፥ ሀይቁዋፐ ደንዳና።”

35 ዛብድዮሳ ናናይ ያቆብነ ዮሃንስ የሱሳኮ ዪደ፥ “ታማርስያዎ፥ ኑን ኔና ዎስያባ ኡባባ ኑዉ ኦꬃርኪ” ያጌድኖ።

36 የሱስ ኡንቱንታ፥ “ታን ህንተንቶ አያ ኦꬆ?” ያጌዳ።

37 ኡንቱንቱ አ፥ “ነ ቦንቾ ካዉተꬃን ኔን ኡትያ ዎደ፥ ኑፐ እቱዋ ኔፐ ኡሸቻ ባጋና ቃይ እቱዋ ሀድርሳ ባጋና ኡትሳርኪ” ያጌድኖ።

38 ሽን የሱስ ኡንቱንታ፥ “ህንተንቱ አያ ዎሳናዉ በስንቶካ ኤርክታ፤ ታን ኡሻናዉ በስያ መቱዋ ጹኣ ኡሻናዉ ዳንዳዪቴ? ቃይ ታን ጻማቀታናዉ በስያ ጽንቃታ †ጽንቃታ፦ ሀዋ ጉሳይ የሱሳ ጋኬዳ መቱዋ ጹኣ ጉሳ። ጻማቀታናዉ ዳንዳዪቴ?” ያጌዳ።

39 ሄዋፐ ጉየ ኡንቱንቱ ዛሪደ፥ “ኤ ዳንዳዬቶ” ያጌድኖ።

የሱስ ቃይ፥ “ታን ኡሻናዉ በስያ መቱዋ ጹኣ ህንተ ኡሻና፤ ታን ጻማቀታናዉ በስያ ጽንቃታካ ህንተ ጻማቀታና። 40 ሽን ታፐ ኡሸቻ ባጋናነ ሀድርሳ ባጋና ኡታናዋንታ ዶርያዌ ታና ግድከ፤ ሽን ሄ ሳአይ ጾሳይ እማናዉ ጊግስ ዎꬄዳዋንቱሳ” ያጌዳ።

41 የኮ ታሙ የሱሳ ካልያዋንቱ ሄዋ ስሴዳ ዎደ፥ ያቆባነ ዮሃንሳ ሀንቀቴድኖ። 42 የሱስ ኡንቱንታ ኡባ ባረኮ ጼሲደ፥ ሀዋዳን ያጌዳ፤ “ ‘አይሁዳ ግደናዋንታ ሞድያዋንታ’ ጊደ ቆፕያዋንቱነ ሄዋንታ ካለꬅያ አሳቱ ባረንቱ አሳ ሞድያዋ ኤሪታ። 43 ሽን ህንተ ግዶን ሄዋ ማላ ግደና፤ ህንተ ግዶን ዎጋታና ኮይያ ኦንነ ህንተንቶ ቆማ ግዳናዉ በሴ። 44 ቃይ ህንተ ግዶን ኡባፐ ቦላ ግዳና ኮይያ ኦንነ ህንተ ኡባዉ አይለ ግዳናዉ በሴ። 45 አያዉ ጎፐ፥ ሀራይ አቶ ታን፥ አሳ ናአይካ፥ አሳዉ ኦꬃናዉነ ጮራቱዋ ዎዛናዉ ዬዳዋፐ አትን፥ አሳይ ታዉ ኦꬃና ማላ ያበይከ” ያጌዳ።

46 ኡንቱንቱ እያርኮ ግያ ካታማ ቤድኖ፤ የሱስ ባረና ካልያዋንቱናነ ጮራ አሳና እያርኮፐ ከስሽን፥ ጽሞሳ ናአይ ቆቃይ፥ ባርጻሞሳ ግያዌ፥ ኦግያ ዶናን ዎሲደ ኡቴዳ። 47 ባርጻሞስ ናዝሬትያ የሱሳ ግዴዳዋ ስሲደ፥ ባረ ኮሻ ꬎቁ ኦꬂደ፥ “ዳዊተ ናኣ ‡ዳዊተ ናኣ፦ አይሁደ አሳቱ ጾሳን ኦከቶዌ ዳዊተ ዘረꬃፐ የለታናዋ ያጊደ ቆፕያ ድራዉ፥ ጾሳን ኦከቶዌ “ዳዊተ ናኣ” ያገት ጼሰቴ። የሱሳ፥ ታና ማራርኪ!” ያጉሳ ዶሜዳ።

48 ጮራ አሳይ አ፥ “ሀይዛ!” ጊደ ሀንቀቴዳ።

ሽን፥ እ ባረ ኮሻ ካሰዋፐካ ዳርስ ꬎቁ ኦꬂደ፥ “ዳዊተ ናአዉ፥ ታና ማራርኪ!” ያጌዳ።

49 የሱስ ኦግያን ኤቂደ፥ “አ ሃ ጼስተ” ያጌዳ።

ኡንቱንቱ ቆቃ፥ “አይነ ባዋ፤ ደንዳ ኤቃ፤ ኔና ጼሴ” ያጊደ ጼሴድኖ። 50 ቆቃይ ባረ ማዩዋ ኦል አጊደ፥ ጉፕ ደንድ ኤቂደ፥ የሱሳኮ ቤዳ።

51 የሱስ አ፥ “ታን ነዉ አያ ኦꬃናዉ ኮያይ?” ያጌዳ።

ቆቃይ፥ “ታማርስያዎ፥ ታን ጼላናዋ ኮያይ” ያጌዳ።

52 የሱስ አ፥ “ባ፤ ነ አማኑ ኔና ፓꬄዳ” ያጌዳ። ኤለካ አ አይፊ ጼል አግና፥ ኦግያን የሱሳ ካል አጌዳ።