11
የሱስ ዎልቃማ ቦንቹዋን የሩሳላመ ገሌዳ
(ማቶሳ 21:1-11፤ ሉቃሳ 19:28-40፤ ዮሃ. 12:12-19)
1 ኡንቱንቱ የሩሳላመ ማቲደ፥ ደብረ ዛይተ ደርያ ማታን ደእያ ቤተፋገነ ቢታንያ ጋኬድኖ፤ የሱስ ባረና ካልያዋንቱፐ ላኡዋ ስንꬃዉ ኪቲደ፥ 2 “ህንተንቱፐ ስንꬃን ደእያ ሄራ ቢተ፤ ያ ገሎሳና ኦንነ ኡባ ቶግቤና ቃሹዋን ደእያ ሀረ ማራ ህንተ ደማና፤ አ ብል ሃ አኪደ ዪተ። 3 ኦንነ ህንተንታ፥ ‘ሄዋ አያዉ ኦꬅተ?’ ያጊደ ኦቾፐ፥ ‘ጎዳዉ*ጎዳ፦ ሀዋ ጉሳይ ሀርያ ጎዳ። ሀዌ ኮሼ፤ ኤለካ ዛር ሃ የዳናዋ’ ያግተ” ያጌዳ።
4 ኡንቱንቱ ቢደ፥ ሀረ ማራ ፐንግያ ማታን ኦግያን ቃች ዎꬄዳዋ ደሚደ ብሌድኖ። 5 ሄዋን ኤቄዳ እት እት አሳቱ ኡንቱንታ፥ “ሀረ ማራ ዎታናዉ ብሊቴ?” ያጌድኖ። 6 የሱሳ ካልያዋንቱ የሱስ ባረንታ አዛዜዳዋ ኦድና፥ አሳቱ የድ አጌድኖ። 7 ኡንቱንቱ ሀረ ማራ የሱሳኮ አሂደ፥ ባረንቱ ማዩዋ አ ዞክያን ዎꬄድኖ፤ የሱስ ሄ ሀረ ማራ ቶጌዳ። 8 ጮራ አሳይ ባረንቱ ማዩዋ ኦግያን ሂጼዳ፤ ቃይ ሀራንቱ ምꬃ ሀይꬃ ካር ካሪደ፥ ኦግያን ሂጼድኖ። 9 የሱሳፐ ስንꬃና ሀመትያ አሳይነ አ ጌዱዋ ካልያ አሳይ ባረንቱ ኮሻ ꬎቁ ኦꬂደ፥
“ጾሳይ ጋላተቶ!
ጎዳ ሱንꬃን ይያዌ አንጀቴዳዋ። ማዝ. 118:25-26
10 ጎዳ ሱንꬃን ይያ ኑ አዉዋ
ዳዊተ ካዉተꬃይ አንጀቴዳዋ።
ሳሉዋ ኡባፐ ቦላ ሳሉዋን
ደእያ ጾሳይ ጋላተቶ”
ያጌድኖ።
11 የሱስ የሩሳላመ ቢደ፥ ጌሻ ጎልያ ገሌዳ፤ ቃይ ኡባባ ዩይ ዩይ ጼሌዳዋፐ ጉይያን፥ ሳአይ ቃምያ ድራዉ፥ ታማነ ላኡ የሱሳ ካልያዋንቱና ቢታንያ ቤዳ።
የሱስ ሸቄዳ ባላስያ ምꬃቶ
(ማቶሳ 21:18-19)
12 ዎንተꬃ ጋላስ ኡንቱንቱ ቢታንያፐ ከሲደ ቢሽን፥ የሱስ ኮሻቴዳ። 13 ሃኩዋን እት ባላስያ ግያ ምꬃቶ ሀይꬃ ማያ ኡቴዳዉኖ በኢደ፥ ኦን ኤር እ ቦላ አይፊ ቤቶፐነ ጊደ፥ በአናዉ እዝኮ ቤዳ፤ ሽን እዝኮ እ ብያ ዎደ፥ ሀይꬃ ጻላላፐ አትን፥ አይነ አይፍያ ደምቤና፤ አያዉ ጎፐ፥ ባላሲ አይፍያ ዎዲ ጋክቤና። 14 የሱስ ሄ ባላሳቶ፥ “ኔፐ ሽረቲደ መꬍናዉ ኦንነ አይፍያ ሞፖ” ያጌዳ። የሱሳ ካልያዋንቱ እ ግያዋ ስሴድኖ።
የሱስ ጌሻ ጎልያን ዛልእያዋንታ ከሴዳ
(ማቶሳ 21:12-17፤ ሉቃሳ 19:45-48፤ ዮሃ. 2:13-22)
15 ኡንቱንቱ የሩሳላመ ቤድኖ፤ የሱስ ጌሻ ጎልያ ገሊደ፥ ሄዋን ዛልእያዋንታነ ሻምያዋንታ ካረ የደርሱዋ ዶሜዳ፤ ቃይ ሚሻ ላምያዋንቱ ጻራጴዛነ ዶጎሙዋ ዛልእያዋንቱ ኦይድያ አꬅ የጊደ፥ 16 ኦንነ አየንቶ ቶኪደ፥ ጌሻ ጎልያ ግቢያ ግዶና አꬋናዋ ድጌዳ። 17 የሱስ አሳ ሀዋዳን ያጊደ ታማርሴዳ: “ጾሳ ማጻፋን፥ ‘ታ ጎሊ አይሁዳ ግደና አሳይ ኡባይ ጾሳ ዎስያ ጎለ ጌተታና’ ያገቲደ ጻፌት ኡቴዳ፤ ሽን ህንተ አ ቦንቃንቻቱ ቆሰትያ ጎንጎሉዋ ከሴድታ።”ኢሳ. 56:7፤ ኤር. 7:11
18 ቄሳቱዋ ካፓቱነ ሙሴ ህግያ ታማርስያዋንቱ ሄዋ ስሲደ፥ አ ዎꬋና ኦግያ ኮሻ ዶሜድኖ፤ ሽን ጮራ አሳይ እ ታማርስያዋን ማላለትያ ድራዉ፥ አዉ ያዬድኖ።
19 ሳአይ ኦማርሴዳ ዎደ፥ የሱስነ አ ካልያዋንቱ ካታማፐ ጋጻ ከሴድኖ።
ባላስያ ግያ ምꬃታ መላዱ
(ማቶሳ 21:20-22)
20 ኡንቱንቱ ዎንተꬃ ጋላስ ጉራ ኦግያና አꬊደ፥ ሄ ባላሳታ ጻጱዋና መላ ድጌዳዉኖ በኤድኖ። 21 ጰጽሮስ ሀሳዪደ፥ “ታማርስያዎ፥ በአ፤ ኔን ሸቄዳ ባላሳታ መላ ድጋዱ” ያጌዳ።
22 የሱስ ዛሪደ፥ ኡንቱንታ ሀዋዳን ያጌዳ፤ “ጾሳ አማንተ። 23 ታን ህንተንቶ ቱሙዋ ጋይ፤ ኦንነ ባረ ዎዛናን ስናን ባረ ጌዳባይ ሀናናዋ አማኒደ፥ ሀ ደርያ፥ ‘ደንዳደ አባን ኩንዳ’ ጎፐ ሀናና። 24 ሄዋ ድራዉ፥ ጾሳ ህንተ ዎስያባነ ኦችያባ ኡባ አክ ድጎዋዳን አማንተ፤ ህንተ አካና። 25 ጾሳ ዎሳናዉ ህንተ ኤቂያ ዎደ፥ ሳሉዋን ደእያ ህንተ አዉ ህንተ ናጋራ አቶ ጋና ማላ፥ ኦንነ ህንተንታ ናቄዳባይ ደኦፐ፥ አዉ አቶ ጊተ። 26 ሽን አሳ ናጋራ ህንተ አቶ ጋና ꬋዮፐ፥ ሳሉዋን ደእያ ህንተ አዉካ ህንተ ናጋራ ህንተንቶ አቶ ጌና።”
የሱስ አያ ማታን ኦꬂ ግያ ኦሻ
(ማቶሳ 21:23-27፤ ሉቃሳ 20:1-8)
27 ኡንቱንቱ ቃይካ የሩሳላመ ቤድኖ፤ የሱስ ጌሻ ጎልያን ሀመትሽን፥ ቄሳቱዋ ካፓቱ፥ ሙሴ ህግያ ታማርስያዋንቱነ ጭማቱ የሱሳኮ ዬድኖ። 28 አ፥ “ኔን ሀዋ ኦꬃናዉ ነዉ አይ ማታይ ደኢ? ዎይ ነዉ ሀ ማታ እሜዳዌ ኦኔ?” ያጌድኖ።
29 የሱስ ዛሪደ ኡንቱንታ፥ “ታንካ ህንተንታ እትባ ኦቻና፤ ታዉ ኦድተ፤ ታን ቃይ ሀዋ አይ ማታን ኦꬃይታንቶ፥ ህንተንቶ ኦዳና። 30 ዮሃንስ ጻማቅያ ማታ አኬዳዌ ጾሳፔየ ዎይ አሳፔ? ታዉ ኦድተ” ያጌዳ።
31 ኡንቱንቱ ባረንቱ ግዶን ፓሉማ ዶሚደ፥ “ኑን፥ ‘ጾሳፐ ዬዳ’ ያጎፐ፥ እ ኑና፥ ‘ያትና፥ ዮሃንስ ኦዴዳዋ አያዉ አማንበይክቴ?’ ያጋና። 32 ሽን፥ ‘አሳፐ ዬዳ ጋኔ?’ ” ያጌድኖ፤ ቃይ አሳይ ኡባይ ዮሃንስ ናብያ ግዴዳዋ ኤርያ ድራዉ፥ አሳዉ ያዬድኖ። 33 ሄዋ ድራዉ፥ ኡንቱንቱ የሱሳዉ፥ “ኑን ኤሮኮ” ያጊደ ዛሬድኖ።
የሱስ፥ “ታንካ ሀዋ አይ ማታን ኦꬃይታንቶ፥ ህንተንቶ ኦድከ” ያጌዳ።