1 ኑን ግምቢያ ድርሳ ኪታ ዶሜዳዋ ሳንባላጽ ስሴዳ ዎደ ሀንቁዋ ኤጽ ከሴዳ፤ ቃይ ሎይꬅ ይሎቲደ፥ ኑና ቅሊጬዳ። 2 ባረ ላገቱዋነ ሳማርያ ኦላንቻቱ ስንꬃን እ ሀዋዳን ያጌዳ፤ “ሀዋንቱ፥ ሀ ፓና አይሁዳቱ አያ ኦꬂኖ? ካታማ ዛረꬂደ ግምባናዉ ኮዪኖየ? ያርሹዋካ ያርሻናዉ ኮዪኖ? ኦሱዋ እት ጋላስ ዉርሳናዋ ኡንቱንቶ ማላቲየ? ግምቢያዉ ሹቻ ዛር ደኡዋን ዎꬃናዉ ዳንዳየት?”

3 አ ምይያን ኤቄዳ አሞና ጋድያ አሳ ግዴዳ ጾቢካ ቃይ ሀዋዳን ያጌዳ፤ “ኡንቱንቱ ቃይ አያነ ግምቢያ ግምባናዉ ዳንዳዪዬ? ኡንቱንቱ ግምቢያ ድርሳ ግምቢያ ቦላን ዎራካናይ ከስንቶነ ኩንድ አጋና”።

4 ሄዋፐ ጉይያን፥ ታን ሀዋዳን ያጋደ ዎሳድ፤ “ኑ ጾሳዉ፥ ኡንቱንቱ ኑና ዎት ዎት ቅሊጭንቶ ሀዋ ስሳ! ኡንቱንቱ ኑና ሸቂያ ሸቃይ ኡንቱንቱ ሁጲያን ስሞ። ባረንቶ ደእያ አቁዋ ቦንቀት ክቺደ፥ አላጋ ጋድያን ኦሞደቴዳ አሳ ግድኖ። 5 ኡንቱንቱ ናቁዋ ገንꬆፓ፤ ኡንቱንቱ ናጋራካ ነ ስንꬃፐ ሙለ ቁጮፓ። አያዉ ጎፐ፥ ግምቢያ ግምቢያዋንታ ኑና ሸቃን ካዉሼድኖ”።

6 ኑን ግምቢያ ድርሳ ኦሱዋ አገናን ኦꬄዳ። ቃይ አሳይካ ኦሱዋ ምኖተꬃን ኦꬅያ ድራዉ፥ ግምቢያ ድርሳ ꬎቃተꬃይ ኤለካ ባካ ኬሻ ግድ አጌዳ።

7 ሳንባላጽ፥ ጾቢ፥ አራባ ጋድያ አሳይ፥ አሞና ጋድያ አሳይነ አሽዶዳ ካታማ አሳይ የሩሳላመ ግምቢያ ድርሳ ኪታይ ሎኦ ሀኖተꬃን ኦሰቲደ ደእያዋነ ኮለቴዳ ሳአቱካ ባረቴዳ ዎደ ሎይꬅ ሀንቀቴድኖ። 8 ሄዋፐ ደንዴዳዋን እትፐ የሩሳላመ ዪደ ኑና ኦላናዉነ ሻቢርሳናዉ ማቀቴድኖ። 9 ሽን ኑን ኑ ጾሳኮ ዎሴዶ፤ ኡንቱቱፐ ደንዴዳዋን ቃማነ ጋላስ ናግያ ናጋንቻቱዋካ ዎꬄዶ።

10 ሄ ዎድያን ይሁዳ አሳይ ሀዋዳን ያጌድኖ፤ “ቶኩዋ ቶክያዌ ካሰዋፐ ኑና ላባንꬄ፤ ቃይ ደንꬃናዉ ኮሽያ ግምቢያፐ ኮለቴዳ ዳሮ ሹቻይካ ብሮ ደኤ። ያትና፥ ኑን ሀቼ ሀ ግምቢያ ዋቲደ ግምባናዉ ዳንዳዬቶ?”

11 ኑ ሞርከቱ፥ “ኑን ቢደ ኡንቱንቱ ግዶ ጋካናዉ፥ ኡንቱንቱ ኦሱዋ ኦናዳን ተአናዉነ ኡንቱንታ ዎꬋና ጋካናዉ፥ ኡንቱንቱ ኤርክኖ” ያጌድኖ።

12 ግዶ ሽን፥ አይሁዳቱ ዛር ዛር ኑኮ ዪደ፥ “ኡንቱንቱ ሙለ ባጋና ዪደ፥ ኑና ኦላናዋንታ” ያጊደ ኑዉ ኦዴድኖ።

13 ሄዋ ድራዉ፥ ኑ አሳፐ ማሻ፥ ቶራነ ዎንዳፍያ ኦይቂደ አሳ ኡንቱንቱ ዛርያን ዛርያን ማራደ፥ ኪታይ ዉርቤና ሄራን ግምቢያፐ ዞኮ ባጋና ናጋናዳን ዎꬃድ። 14 አሳይ ሻቢረቴዳዋ ታን በኤዳ ዎደ፥ ደንዳ ኤቃደ፥ ኡንቱንታ፥ ኡንቱንቱ ካለꬅያዋንታነ ሀራ ካፓቱዋ ኡባ ሀዋዳን ያጋድ፤ “ኑ ሞርከቶ ያዮፕተ! ጎዳይ ዎልቃማነ ሆላ ጌተትያዋ ግድያዋ ሀሳይተ። ሄዋ ድራዉ፥ ህንተንቱ ዛረቶ፥ ህንተንቱ አቱማ ናናቶ፥ ህንተንቱ ማጫ ናናቶ፥ ህንተንቱ ማችያዉነ ህንተንቱ ጎልያዉ ኦለትተ” ያጋድ።

15 ኑ ሞርከቱ ኑና ቆሀናዉ ማቀቴዳዋ ኑን ኤሬዳዋ ኡንቱንቱ ስሴድኖ። ቃይ ጾሳይካ ኡንቱንቱ ማቁዋ ሀዳ ከሴዳዋ አኬኬድኖ።

ሄዋፐ ጉይያን፥ ኑን ኡባይካ ስሚደ፥ ኑ ግምቢያ ድርሳ ኦሱዋ ዶሜዶ። 16 ሄ ዎድያፐ ዶሚደ፥ ታ ቆማቱዋፐ ባካይ ኦሱዋ ኦꬅያ ዎደ፥ ባካይ ትራን ዎꬅያ ኦላ ሚሻ ማዪደ፥ ቶራ፥ ጎንዳልያነ ዎንዳፍያ ኦይቂደ ናጋናዳን ኦꬃድ። ቃይ ካፓቱካ ይሁዳ አሳ ኡባፐ ጉየና ኤቂደ ምንꬂኖ። 17 ግምቢያ ድርሳ ግምቢያዋንቱነ ኮሽያዋ ቶክያዋንቱ ኡባይ እት ኩሽያን ኦላ ሚሻ ኦይቂደ፥ እት ኩሽያን ኦሱዋ ኦꬅኖ። 18 ግምቢያ ኦሱዋ ኦꬅያ ኡባይ ማሻ ባረ ጼሳን ዳንጭ ዳንጭ ኡቴዳ። ማላካታ ፑንያዌካ ኡባ ዎደ ታፐ ሻከት ኤረና።

19 አሳ ካለꬅያዋንታ፥ ካፓቱዋነ አሳ ኡባ ታን ሀዋዳን ያጋድ፤ “ግምቢያ ድርሳ ኪታይ ዎልቃማነ ሎይꬅ አካ ግድያዋፐ ደንዴዳዋን፥ ኑን እቱ እቱዋፐ ሻከቲደ ሃኬዶ። 20 ሄዋ ድራዉ፥ ህንተንቱ ማላካታ ፑና ስስያ ዎደ፥ እ ፑነትያ ሳኣ ታኮ ሃ ሺቅተ። ኑ ጾሳይካ ኑ ድራዉ ኦለታናዋ”። 21 ኦሱዋ ዎንቱማꬃ ሳሉ ዞእያ ዎድያፐ ዶሚደ፥ ኦማርስ ጾልንቲ ከሳና ጋካናዉ ኦꬅያ ዎደ ኡባን፥ ባጋይ ኦꬅያ ዎደ፥ ባጋይ ቶራ ኦይቂደ ናጊኖ።

22 ሄ ዎደ ታን አሳዉ ሀዋዳን ያጋድ፤ “ቃማን ኑና ናጋናዉነ ጋላስ ቃይ ኪታ ኦꬃናዉ ህንተንቱ ኡባይካ ህንተንቱ ቆማቱካ የሩሳላመን አቅተ”። 23 ሄዋ ድራዉ፥ ታና ግድና፥ ታ እሻቱዋ ግድና፥ ታ ቆማቱዋ ግድና፥ ዎይ ቃይ ታና ናግያዋንታ ግድናካ፥ ኑን ኡባይካ ኑ ማዩዋ ከሰናን አቄቶ፤ ቃይ ኑ ኦላ ሚሻይካ፥ ኑፐ ኡባካ ሻከተና።