1 አቱማዌነ ማጫዌ ባረንቱ ዛርያ ግዴዳ አይሁዳቱ ቦላን ዎልቃማ ጫቡዋ ከሴድኖ። 2 ኡንቱንቱ ሀዋዳን ያጌድኖ፤ “ኑን፥ ኑ አቱማ ናናይነ ኑ ማጫ ናናይ ጮራ፤ ሄዋ ድራዉ፥ ኑን ሚደ ፓጻ ደአና ማላ፥ ኑዉ ካꬃይ ኮሼ”።

3 ሀራቱ ቃይ፥ “ኑና ጋኬዳ ኢታ ኮሻፐ ኑና አሽያ ቁማ ደማና ጊደ፥ ኑ ጎሻይ፥ ኑ ዎይንያ ቱራ ሳአይነ ኑ ኬꬃይ አተናን አሳዉ ኦይꬄዶ” ያጌድኖ።

4 ሀራቱካ ቃይ ሀዋዳን ያጌድኖ፤ “ኑ ጎሻዉነ ኑ ዎይንያ ቱራ ሳቶ ካቲ ኦቼዳ ጊራ ጭጋናዉ ሚሻ ታልእያ አኬዶ። 5 አይሁዳ ዛራቱዋና ኑን እት አሹዋ፤ ኑ ናናይካ ኡንቱንቱ ናና ማላ። ሽን ኑን ኑ የሌዳ ናና አይለተꬃዉ አꬂደ እማናዉ ግደቴዶ፤ ኡባ ቃይ ኑ ማጫ ናናቱዋፐ እቱ እቱ አይለተꬃዉ ዛልኤቴድኖ። ግዶፐነ፥ ኑ ጎሻይነ ኑ ዎይንያ ቱራ ሳአቱ ኑፐ አከት ድጎ ድራዉ፥ ኑን አይነ ኦꬃናዉ ዳንዳዮኮ”።

6 ኡንቱንቱ ጫቡዋነ ሀ ቃላ ታን ስሴዳ ዎደ፥ ሎይꬃ ሀንቀታድ። 7 ኦꬃናዋ ታ ዎዛናን ቆፓደ፥ አሳ ካለꬅያዋንታነ ካፓቱዋ ጼሳደ፦ “ህንተንቱ ህንተንቱ ዛራቱዋ የሉዋ ጭግስያዋን ኡቁኒታ” ያጋደ ኡንቱንታ ሞታድ። ከሳ 22:25፤ ዎጋ 25:35-37፤ ዛረ. 23:19-20

ሄ መቱዋባ ሃሳዪደ ብላናዉ ዎልቃማ ሺቁዋ ኡንቱንቱና ኡዳድ። 8 ሀዋዳን ያጋድ፤ “አይሁዳ ግደናዋንቶ ዛልኤቴዳ አይሁዳ ዛርያ ግዴዳ ኑ እሻቱዋ ዎዛናዉ ኑን ኑ ዎልቃይ ዳንዳዬዳዋ ኡባ ኦꬄዶ። ሽን ህንተንቱ ቃይ፥ ህንተንቱ እሻቱዋ ግዴዳ ህንተንቱ ዛርያ ህንተንቶ ባረንታ ዛልአና ማላ ኦꬂደ ደኢታ”። ካለꬅያዋንቶ ዛርያ ቃላይ ꬋይና፥ ጮኡ ያጌድኖ።

9 ታን ቃይካ ሀዋዳን ያጋድ፤ “ህንተንቱ ኦꬅያባይ ልከ ግደና፤ ኑ ሞርከቱ፥ አይሁዳ ግደናዋንቱ ኑ ቦላን ቅሊጨና ማላ፥ ኑ ጾሳዉ ያያናዉነ ልከ ግድያባ ኦꬃናዉ ህንተንቶ በሰኔ? 10 ታን ታ ሁጲያዉ፥ ታ እሻቱዋነ ታ ቆማቱካ ኡንቱንቶ ሚሻነ ካꬃ ታልኤዶ፤ ግዶ ሽን፥ አነ ኡንቱንቱፐ የሉዋ አክያዋ አጎይተ። 11 ኡንቱንቱ ጎሻቱዋ፥ ዎይንያ ቱራ ሳአቱዋ፥ ዛይትያ ዎጋራቱዋነ ጎለቱዋ ኡባካ ኡንቱንቶ ሀቼ ዛርተ። ቃይ ሚሻን፥ ካꬃን፥ ዎይንያ ኤሳን ግድና ዛይትያን፥ ህንተንቱ ኡንቱንቱፔ አኬዳ ጼቱዋፐ እት ኩሽያ የሉዋ ኡባ ኡንቱንቶ ኤለካ ዛርተ”።

12 ኡንቱንቱካ ዛሪደ፥ ሀዋዳን ያጌድኖ፤ “ኑን ኡባባካ ኡንቱንቱዋ ዛሪደ፥ ኡንቱንቶ እማና፤ ኡንቱንታ አያነ ኦቾኮ። ኔን ጋደ ደእያዋዳን፥ ኑን ኦꬃና”።

ሄዋፐ ጉየ ቄሳቱ ዋ ሃ ታኮ ጼጋደ፥ ባረንቱ ጌዳ ቃላ ፖላና ማላ፥ ጫቀꬃናዳን ኦꬃድ። 13 ሄዋፐ ጉይያን፥ ታ ማዩዋ ቆቆፋደ ሀዋዳን ያጋድ፤ “ኦንነ ህንተፐ ባረ ጌዳ ቃላ ፖለናን ꬋዮፐ፥ ጾሳይ አ ሀዋዳን አ ጎልያፐነ አ አቁዋፐ ቆቆፎ፤ እካ ቆቆፈቲደ መላ አቶ”።

ሺቄዳ አሳይ ኡባይ እት ቃላን፥ “አመንእ” ያጊደ መꬍና ጎዳ ጋላቴድኖ። አሳይ ኡባይ ባረ ጫቄዳዋዳን ኦꬄዳ።

14 አርጸክስስ ካተቴዳ ላታማንꬆ ላይꬃፐ ቢደ፥ ሀታማነ ላኤንꬆ ላይꬃ ጋካናዉ፥ ታን ይሁዳ ሞድያዋ ግዳደ ሱንታድ። ሄ ታማነ ላኡ ላይꬃን፥ ታና ግድና ዎይ ታ እሻቱ ሞድያዎ በስያ ቁማ ድርጉዋ አክበይኮ። 15 ሽን ታፐ ካሰና ሞድያዋንቱ አሳዉ ዴጾ ቶኮ ግዲደ፥ ሀቼ ሀቼ ካꬃውነ ዎይንያ ኡሻው ኦይታሙ ጻጋራ ብራ ጭግሴድኖ። ሀራይ አቶ አይስያዋንቶ ቆማቱካ ባረንቱ አሳ ቦላን ጎዳ ማላትሲደ ጋምኤድኖ። ግዶፐነ፥ ታን ጾሳዉ ያዬዳ ድራዉ፥ ሄዋዳን ኦꬃበይከ። 16 ታናተꬃ ኡባ የሩሳላመ ግምቢያ ድርሳ ኦሶ እማድፐ አትን፥ ታ ሁጰው አይ ጋድያነ ሻማበይከ። ታ ቆማቱካ ኡባይ ታናና ሄ ኪታን እትፐ ጋምኤድኖ። 17 ኑ ሄራን ደእያ አይሁዳ ግደናዋንቱፐ ኑኮ ዬዳ አሳይ ባይናን ደእሽን፥ ሀቼ ሀቼ ታናና ታ ማሶፍያን ምያ አይሁዳቱነ ኡንቱንታ ካለꬅያዋንቱ ፓይዱ ጼታነ እሻታማ። 18 ሀቼ ሀቼ እት ቦራ፥ ኡሱፑን ዶረቴዳ ዶርሳቱዋነ ዳሮ ኩቶቱዋ ሹክ ሹኪደ፥ አሳዉ ሺሽኖ፤ ቃይ ታሙ ጋላሳን እት ገደ ዳሮ ባꬃ ዎይንያ ኤሳ ኡንቱንቶ አጊኖ። ሽን አሳ ቦላን ደእያ ቶኩ ዴጹዋ ግድያዋ ታን ኤርያ ድራዉ፥ ጋድያ ሞድያዎ በስያ ቁማ ድርጉዋ ኦቻበይከ።

19 “ታ ጾሳዉ፥ ታን ሀ አሳዉ ኦꬄዳ ሎኦተꬃ ኡባ ቆፓደ፥ ታዉካ ሎኦተꬃ ኦꬃ” ያጋድ።