1 ሳምባላጽ፥ ጾቢ፥ አራባ ጋድያ አሳ ግድያ ገሼምነ ሀራ ኑ ሞርከቱ ኑን ግምቢያ ድርሳ ኦꬂደ ፖሌዳዋነ ቃይ ኦሰትቤና ፓጫ ሳአይካ እቱነ አትቤናዋ ስሴድኖ። ግዶ ሽን፥ ኑን ግምቢያ ድርሳ ፐንገቱዋን ብሮ ሳንቃ ገልስበይኮ። 2 ሄዋ ኡንቱንቱ ስሴዳ ዎደ፥ ሳንባላጽነ ገሼም ሀዋዳን ያጊደ፥ ታኮ ኪቴድኖ፤ “ኦና ጌተትያ ደምባን ደእያ ቄር ካታማቱዋፐ እቱዋን ያደ ኑናና ጋከታ”። ሽን ኡንቱንቱ ታ ቦላ ኢታ ኦꬃናዉ ማቀቴድኖ።

3 ሄዋ ድራዉ፥ ታን ኡንቱንቶ ሀዋዳን ያጋደ ዛራ ኪታንቻቱዋ ኪታድ፤ “ታዉ ዳሮ ኪታይ ደኤ፤ ሄዋ ድራዉ፥ ታን ህንተንቱ ግያ ሳኣ ባናዉ ዳንዳይከ። ታን ዱገ ህንተንቱኮ ቢና፥ ኪታይ አያዉ ꬉበቲ?” 4 ሄ ኪታ ዛር ዛር ኦይዱ ገደ ታኮ ኪቴድኖ፤ ሽን ታን እት ማላ ዛሩዋ ኡንቱንቶ እማድ።

5 እቼሸንꬁዋን ሳምባላጽ ባረ ቆማ ቦላ ዶያ ደእያ ዳብዳቢያ ታኮ ኪቴዳ። 6 ዳብዳቢካ ሀዋዳን ያጌ፤ “ኔንነ ነ ዛርያ ግዴዳ አይሁዳቱ ማካላናዉ ቆፔዳዋነ ሄዋፐ ደንዴዳዋን ግምቢያ ድርሳ ግምቢያዋ ሾሮ ጋድያን ደእያ አሳይ ኡባይ ሃሳይያዋ ገሼም ታዉ ኦዴዳ። ቃይ ኔን ኔና ካትያ ከሳናዉ ኮይያዋነ፤ 7 ኔን ይሁዳ ካትያ ግድያዋ የሩሳላመን አዋያና ማላ፥ ትምቢትያ ኦድያዋንታ ነ ዎꬄዳዋካ እ ታዉ ኦዴዳ። ሀ ዋርያ ካቲ ስሱሳይ አተና። ሄዋ ድራዉ፥ ታናና ጋከታደ ዞረታናዉ ሃያ”።

8 ታንካ፥ “ሀ ኔን ግያ የዉዋ ኡባይ ኡባካ ቱማ ግደናዋነ ኔን ጮ መꬌዳዋ” ያጋደ ዛራድ።

9 ኑ ኦꬅያ ኪታይ ፖለተና ማላ፥ “ኡንቱንቱ ኩሺ ኦሶ ዳቡር ክቼዳ” ያጊደ ኡንቱንቱ ኑና ያሽሲደ ጋምኤድኖ።

ሄዋ ድራዉ፥ “ኑ ጾሳዉ ሀእ ታና ምንꬃርኪ” ያጋደ ታን ዎሳድ።

10 ሄዋፐ ጉይያን፥ ሶፐ ከሰናዳን ጎርድ ዎꬄዳ ማሄጻብኤላ ናኣ ናኣ ዳላያ ናኣ ሻማእያኮ ባድ። እ ታዉ ሀዋዳን ያጌዳ፤ “እት ቃማ አዉደንቶ ኡንቱንቱ ኔና ዎꬋናዉ ያና ደእያ ድራዉ፥ ኔንነ ታን ጾሳ ጎልያ ግዶ ገሊደ፥ ጾሳ ጌሻ ጎልያ ግዶን ጾሳ ጌሻ ጎልያ ፐንገቱዋ ጎርዲደ ጋከቶይተ”።

11 ታን ሀዋዳን ያጋደ ዛራድ፤ “ታና ማላትያ አሳይ ባቃቲ? ዎይ ቃይ ታና ማላትያ አሳይ ጌሻ ጎልያ ግዶ ገሊደ፥ ባረ ሸምፑዋ አሺ? ታን ሄዋ ኡባካ ኦꬅከ”። 12 ታ የዉዋ ቆፕያ ዎደ፥ ቱሙካ አ ጾሳይ ኪቴዳ ትምቢትያ ኦድያዋ ግደናዋነ ጾቢነ ሳንባላጽ አ ሚሻን ሻሜዳ ድራዉ፥ ታ ቦላ ዎርዶ ትምቢትያ ኦድያዋ ግድያዋ አኬካድ። 13 እ ሚሻን ሻመቴዳ ጋሱ ታን ያያደ፥ እ ግያዋዳን ኦꬃደ ታን ናጋራን ገላናዳና። ያትና፥ ኡንቱንቱ ኡባይ ሄዋ ስሴዳ ዎደ፥ ታና ካꬍስያባ ታ ቦላን ደማናሳ።

14 “ታ ጾሳዉ፥ ጾቢነ ሳንባላጽ ኦꬄዳዋ ቆፓ። ኖኣዶ ጌተትያ ማጫ ትምቢትያ ኦድያናነ ሀራ ትምቢትያ ኦድያዋንቱ ኡባይ ታና ያሽሳናዉ ኡንቱንቱ ኦꬄዳዋ ኡባካ ቆፓ” ያጋድ።

15 ግምቢያ ድርሳ ኪታይ እሻታማነ ላኡ ጋላሳን፥ ኤሉላ ጌተትያ አግናን ላታማነ እቼሻንꬆ ጋላሳን ፖለቴዳ። 16 ኑ ዩሹዋን ደእያ ካዉተꬃቱዋ ግዶን ደእያ ኑ ሞርከቱ ሄዋ ስሴዳ ዎደ ያዬድኖነ ዬላቴድኖ። አያዉ ጎፐ፥ ሀዌ ኪታይ ኑ ጾሳይ ማድና ኦሰቴዳዋ አኬኬድኖ።

17 ሄ ዎድያን አይሁዳቱዋ ካለꬅያዋንቱ ጾቢያዉ ጮራ ዳብዳበቱዋ ጻፌድኖ፤ ጾቢ ዛሪደ፥ ኡንቱንቶ ጻፌዳ። 18 አያዉ ጎፐ፥ እ አራሀ ናኣ ሻካንያ ናቶ አኬዳ ድራዉነ አ ናአይ ያሆሀናን በረክያ ናኣ ማሹላማ ናቶ አኬዳ ድራዉ፥ ይሁዳፐ ዳራቱ አናና ጫቀት ኡቴድኖ። 19 ኡንቱንቱ ጾቢ ኦꬄዳ ሎኦባ ኡባ ታ ስንꬃን ሃሳይኖ፤ ቃይ ታን ግያዋካ አዉ ኦዲኖ። ጾቢካ ታና ያሽሳናዉ ዳብዳበቱዋ ጻፍ የዴ።