1 ላፑንꬃ አግናይ ጋኮ ዎደ፥ እስራኤልያ አሳይ ኡባይካ ባረንቱ ካታማን ካታማን ኡቴድኖ። ሄ አግናን ኡንቱንቱ ኡባይካ እትፐ ሃꬃ ፐንግያ ስንꬃን ደእያ ዳባባን ሺቄድኖ። መꬍና ጎዳይ ሙሴ ባጋና እስራኤልያ አሳዉ እሜዳ ህግያ ማጻፋ አሀና ማላ፥ ጻፍያ እዝራ ኦቼድኖ። 2 ያትና፥ ላፑንꬃ አግናን ኮይሮ ጋላሳን፥ አቱማዌ ማጫዌ፥ አኬካናዉ ዳንዳይያ አሳይ ኡባይ ሺቄዳ ሳኣን እዝር ህግያ ማጻፋ አሄዳ። 3 ሃꬃ ፐንግያ ስንꬃን ደእያ ዳባባን ኤቂደ፥ አቱማዎ ማጫዎ፥ አኬካናዉ ዳንዳይያ አሳ ኡባዉ ህግያ ማጻፋ ዎንታፐ ጋላሳ ሴታይ ጋካናዉ ናባቤዳ፤ አሳይካ ሎይꬅ ሀይዚደ ስሴዳ።

4 እዝር ኤቂደ ናባባናዉ ምꬃፐ ጊግሴዳ ጉታራ ቦላን ኤቄዳ። አፐ ኡሸቻ ባጋና ማቲትያ፥ ሻማእያ፥ አናያ፥ ኦርዮና፥ ህልቂያነ ማእሴያ ጌተትያ አሳቱ ኤቄድኖ። ሀድርሳ ባጋና ቃይ ፓዳያ፥ ምሻኤላ፥ ማልክያ፥ ሀሹማ፥ ሀሽባዳናሀ፥ ዛካራሳነ ማሹላማ ጌተትያ አሳቱ ኤቄድኖ።

5 እዝር አሳ ኡባፐ ꬎቂያ ሳኣን ኤቄዳ ድራዉ፥ ኡባይካ አ ሎይꬂደ ጼልሽን፥ ኡንቱንቱ ስንꬃን ህግያ ማጻፋ ዶዬዳ። ሄ ዎደ ኡንቱንቱ ኡባይ ኡቴዳ ሳፐ ደንድ ኤቄድኖ። 6 እዝር መꬍና ጎዳ፥ ዎልቃማ ጾሳ ጋላቴዳ። አሳይ ኡባይ ባረንቱ ኩሽያ ፑደ ደንꬂደ፥ “አመንእ፥ አመንእ” ያጌድኖ። ቃይ ኡንቱንቱ ሶምእ ሳኣ ቦቻና ጋካናዉ ጉፋኒደ፥ መꬍና ጎዳዉ ጎይኔድኖ።

7 ሄዋፐ ጉይያን ደንዲደ፥ ባረንቱ ደእያ ሳኣን ኤቄድኖ። ኢያሳ፥ ባና፥ ሸረብያ፥ ያሚና፥ አቁባ፥ ሻባታያ፥ ሆድያ፥ ማእሴያ፥ ቃሊጻ፥ አዛርያ፥ ዮዛባዳ፥ ሀናናነ ፓላያ ጌተትያ ሌዋቱ ህግያ አሳይ አኬካናዳን ኦꬄድኖ። 8 ኡንቱንቱ ጾሳ ህግያ ማጻፋፐ ናባቢደ፥ ቃይ ናባበቴዳዌ ዋግንቶ፥ አሳይ ኤራና ማላ፥ ብል ቆንጭሴድኖ።

9 አሳይ ህግያ ቃላ ስሴዳ ዎደ፥ ባረንቱ ዎዛናን ምሸቲደ ዬኬድኖ። ሄዋ ድራዉ፥ ቢታ ሞድያ ናህሚ፥ ቄሰነ ጻፍያ ግዴዳ እዝርነ አሳዉ ማጻፋ ብልያ ሌዋቱ አሳ ሀዋዳን ያጌድኖ፤ “ሀ ጋላሳይ መꬍና ጎዳዉ፥ ህንተንቱ ጾሳዉ፥ ጌሻ ጋላሳ ግድያ ድራዉ፥ እቱነ ካዮቶፕተነ ዬኮፕተ” ያጌድኖ።

10 ቃይ ናህሚ ጉጂደካ ሀዋዳን ያጌዳ፤ “ቢተ፥ ሞꬉዋ ሚተ፤ ማልእያዋካ ኡሽተ፤ ቃይ ባይናዋንቶካ ህንተዋፐ ሻክ እምተ። አያዉ ጎፐ፥ ሀቼ ጋላሳይ ኑ ጾሳዉ ጌሻ ጋላሳ። መꬍና ጎዳ ናሸቻይ ህንተንቶ ዎልቃ ግድያ ድራዉ ካዮቶፕተ” ያጌዳ።

11 ሌዋቱካ ቃይ፥ “ሀዌ ጌሻ ጋላሳ ግድያ ድራዉ፥ ካዮቶፕተ፤ ሀይዝተ” ያጊደ አሳ ጮኡ ኦꬄድኖ። 12 ሄዋፐ ጉይያን፥ አሳይ ናሸቻን ማናዉነ ኡሻናዉ ቃይ ባይናዋንቶካ ዴእያዋፐ ሻክ እማናዉ ቤድኖ። አያዉ ጎፐ፥ ኡንቱንቱ ኦዴዳ ቃላ ስሴድኖነ አኬኬድኖ።

13 አግናዉ ላኤንꬆ ጋላስ ዛራቱዋ ካፓቱ፥ ቄሳቱ ነ ሌዋቱ ህግያ ቃላ ኡንቱንቶ ብርሻና ማላ፥ እዝራኮ ዬድኖ። 14 ሄዋን ታማሪደ፥ ላፑንꬃ አግናን ዳስያ ባላ ቦንችያ ዎደ፥ እስራኤልያ አሳይ ኡባይ ዳስያ ግዶን ኡታናዳን መꬍና ጎዳይ ሙሴ ባጋና አዛዜዳዋ አኬኬድኖ። ዎጋ 23:33-36፣ 39-43፤ ዛረ. 16:13-15 15 ሄዋ ድራዉ፥ ካታማቱዋ ኡባንነ የሩሳላመን ሀዋዳን ያጊደ አዋዬድኖ፤ “ደርያ ሁጲያ ከስተ፤ ዛይትያ ዎጋራፐ፥ ዎራን ዶልያ ዎጋራፐ፥ ባርሴነትያ ምꬃፐ፥ ዛምባ ምꬃፐነ ሀይꬃይ ደእያ ምꬃ ኡባፐ ህግያን ጻፈቴዳዋዳን፥ ዳስያ ዳሳናዉ ታሽያ አህተ” ያጌድኖ።

16 ሄዋ ድራዉ፥ አሳይ ቢደ ምꬃ ታሽያ አሄድኖ፤ ባረንቱ ጎልያ ቦላን ደእያ ደምባ ሳኣን፥ ባረንቱ ግቢያን፥ ጾሳ ጌሻ ጎልያ ዳባባን፥ ሃꬃ ፐንግያ ዳባባንነ ኤፍሬማ ፐንግያ ዳባባን ዳስያ ዳሴድኖ። 17 ኦሞዱዋፐ ስሜዳ አሳይ ኡባይ ዳስያ ዳሴዳ፥ አ ግዶን ኡቴድኖ። ነዌ ናኣ ኢያሱ ዎድያፐ ዶሚደ፥ ሄ ጋላሳይ ጋካናዉ፥ ኡንቱንቱ ሀዋ ማላ ባላ ቦንች ኤርክኖ። ሄዋ ድራዉ፥ ኡባይካ ሎይꬅ ናሸቴድኖ። 18 ባላይ ዶመቶደፐ ቢደ ዉራና ጋካናዉ፥ ሀቼ ሀቼ እዝር ጾሳ ህግያ ማጻፋፐ አሳዉ ናባቤዳ። ባላ ላፑን ጋላሳ ቦንቾዋፐ ጉይያን፥ ሆስፑንꬃ ጋላሳን ህጊ አዛዝያዋዳን ጌሻ ሽቁዋ ኦꬄድኖ።