1 አሳ ካለꬅያዋንቱ የሩሳላመን ደኤድኖ። ቃይ ህንኮ አሳፐካ ታሙዋፐ እቱ እቱ ጌሻ ካታማን የሩሳላመን ደአና ማላ፥ ሳማ የጊደ ዶሬድኖ። ሽን ሀራ ኡዱፑን ኩሽያ አሳይ ባረንቱ ካታማቱዋን ደኤድኖ። 2 የሩሳላመን ደአናዉ ባረንቱ ሸንያን ማዬዳ አሳ ኡባ አሳይ አንጄዳ።

3 ሀራ ካታማቱዋን ደእያ እስራኤልያ አሳይ፥ ቄሳቱ፥ ሌዋቱ፥ ጌሻ ጎልያ ቆማቱነ ሶሎሞነ ቆማቱዋ ያራቱ ኡባይ ባረንቱ ካታማን ካታማን ደእያ ጋድያ ኦይቂደ ደኤድኖ። ሽን ሀዋፐ ካሊደ ጻፈቴዳዋንቱ፥ የሩሳላመን ደአናዉ ዬዳ ጋድያ ካለꬅያዋንታ።ናህ. 7:73

4 ይሁዳ ዛርያፐ ዬዳ ካለꬅያዋንቱ ፓሬሳ ያራ ግዴዳ አታያነ ሼላ ያራ ግዴዳ ማእሴያ። አታይ ኦዝያና ናኣ፤ ኦዝያነ ዛካራሳ ናኣ፤ ዛካራስ አማርያ ናኣ፤ አማር ሻፋጽያ ናኣ፤ ሻፋጽ ማላልኤላ ናኣ። 5 ማእሴይ ባሩካ ናኣ፤ ባሩክ ኮልሆዛ ናኣ፤ ኮልሆዝ ሀዛያ ናኣ፤ ሀዛይ አዳያ ናኣ፤ አዳይ ዮያሪባ ናኣ፤ ዮያሪብ ዛካራሳ ናኣ። 6 ፓሬሳ ያራፐ ዎልቃማ ግዴዳ 468 አሳቱ የሩሳላመን ደኤድኖ።

7-8 ቢንያማ ዛርያፐ ዬዳ ካለꬅያዋንቱ ሳላ፥ ጋባያነ ሳላያ። ሳሉ ማሹላማ ናኣ፤ ማሹላም ዮኤዳ ናኣ፤ ዮኤድ ፓዳያ ናኣ፤ ፓዳይ ቆላያ ናኣ፤ ቆላይ ማእሴያ ናኣ፤ ማእሴይ እትኤላ ናኣ፤ እትኤል ይሻእያ ናኣ። ሙለና 928 ቢንያማ ዛራቱ የሩሳላመን ደኤድኖ። 9 ዚክራ ናአይ ዩኤል ኡንቱንቱ ካፑዋ፤ ቃይ ሀሳኑአ ናአይ ይሁዳይ ካታማን ላኤንꬆ ማራጊ ደእያ ካፑዋ።

10-11 ቄሳቱ ዋፐ ዬዳ ካለꬅያዋንቱ ዮያሪባ ናኣ ያዳያ፥ ያኪናነ ሳራያ። ሳራይ ህልቂያ ናኣ፤ ህልቂ ማሹላማ ናኣ፤ ማሹላም ጻዶቃ ናኣ፤ ጻዶቀ ማራዮታ ናኣ፤ ማራዮት ጾሳ ጌሻ ጎልያ ካፑዋ ግዴዳ አህጹባ ያራ። 12 ኡንቱንቱና እትፐ ጾሳ ጌሻ ጎልያ ኦሱዋ ኦꬄዳዋንቱ ኡባና 822. ቃይ ሀራ ካለꬅያዌ አዳያ፤ አዳይ ይሮሃማ ናኣ፤ ይሮሃም ፓላልያ ናኣ፥ ፓላሊ አሞጻ ናኣ፤ አሞጽ ዛካራሳ ናኣ፤ ዛካራስ ፓሽሁራ ናኣ፤ ፓሽሁር ማልክያ ናኣ። 13 አዳያና እትፐ ደእያ አሳይ ኡባና 242. ቃይካ ሀራ ካለꬅያዌ አማሻሳያ፤ አማሻሳይ አዛርኤላ ናኣ፤ አዛርኤል አህዛያ ናኣ፤ አህዛይ ማሽለሞታ ናኣ፤ ማሽለሞት እሜራ ናኣ። 14 አማሻሳያና እትፐ ደእያ ኦላንቻቱ ኡባና 128. ኡንቱንቱ ካፑ ሀግዶልማ ናኣ ዛብድኤላ።

15 ሌዋቱዋፐ ዬዳ ካለꬅያዋንቱፐ እቱ ሻማእያ፤ ሻማኤ ሀሹባ ናኣ፤ ሀሹብ አዝርቃማ ናኣ፤ አዝርቃም ሀሻብያ ናኣ፤ ሀሻቢ ቡና ናኣ። 16 ቃይ ሀራቱ ሻባታያነ ዮዛባዳ፤ ኡንቱንቱ ጾሳ ጌሻ ጎልያፐ ካረና ኦሰትያ ኦሶቶ አዎትያ ሌዋቱ ካፓቱዋ። 17 ቃይካ ሀራይ ማታንያ፤ እ ጋላታ ዎሳ ዎስያ ዎደ ጋላታ ማዝሙርያ የጽያዋንቶ ካፑዋ፤ እ አሳፋ ያራፐ የለቴዳ ዛብዳ ናኣ ናኣ፥ ሚካ ናኣ። ባረናና እትፐ የጽያዋንቱ ግዶን ባቅቡቀ ላኤንꬆ። ቃይ ሀራይካ አብዳ፤ እ ሻሙአ ናኣ፤ ሻሙእ ጋላላ ናኣ፤ ጋላል ይዱቱና ናኣ። 18 ኡባና 284 ሌዋቱ ጌሻ ካታማን የሩሳላመን ደኤድኖ።

19 ፐንግያ ናግያዋንቱፐ አቁባ፥ ጻልሞናነ ኡንቱንቱና እትፐ ኦꬅያ ሀራ 172.

20 አቴዳ ቄሳቱ፥ ሌዋቱነ እስራኤልያ አሳይ ኡባይ ባረንቱ ጋዲ ደእያ ሳኣን ደእያ ሳኣን ዱማ ዱማ ይሁዳ ካታማቱዋን ደኤድኖ። 21 ሽን ጌሻ ጎልያ ቆማቱ የሩሳላመ ካታማን እት ባጋና ደእያ ኦፌላ ጌተትያ ሄራን ደኤድኖ። ጺህነ ግሽፕነ ላኡ ኡንቱንታ ካለꬅያዋንታ።

22 የሩሳላመን ደእያ ሌዋቶ ካፑ ኡዛ። እ ባና ናኣ፤ ባን ሀሻብያ ናኣ፤ ሀሻቢ ማታንያ ናኣ፤ ማታኒ ሚካ ናኣ። ኡዝ ጌሻ ጎልያን የጽያዋንቶ ካፑዋ ግዴዳ አሳፋ ያራ። 23 ኡንቱንቱ ሀቼ ሀቼ ኦꬃናባዉ ካትያፐ ኡንቱንቶ እመቴዳ አዛዙ ደኤ።

24 ይሁዳ ናኣ ዛራሀ ያራፐ የለቴዳ ማሸዛቤላ ናኣ ፓታሄ እስራኤልያ አሳ ጼልያ ኡባባዉ ኡንቱንቱ ዶና ግዲደ፥ ካትያ ማታን ደኤ።

25 አሳፐ ዳራቱ ባረንቱ ጎሻ ጎሻ ማታን ደእያ ቄር ካታማቱዋን ደኤድኖ። ሄዋ ድራዉ፥ ይሁዳ ዛራቱ ቅርያት-አርባአን፥ ድቦናን፥ ያቃብጽኤላንነ ሄዋ ሄራን ደእያ ቄር ካታማቱዋን ደኤድኖ። 26 ኡንቱንቱ ቃይ የሹአን፥ ሞላዳን፥ ቤት-ጳሌጻን፥ 27 ሀጻር-ሹኣላን፥ በርሳቤሀንነ ሄዋ ሄራን ደእያ ቄር ካታማቱዋን፥ 28 ጽቅላጋን፥ ማኮናንነ ሄዋ ሄራን ደእያ ቄር ካታማቱዋን ደኤድኖ። 29 ቃይካ ኤንርሞናን፥ ጾርኣንነ ያርሙታንካ ደኤድኖ። 30 ሄዋ ጻላላ ግደናን ዛኖሀን፥ አዱላማንነ ሄዋ ሄራን ደእያ ቄር ካታማቱዋንነ ላክሻንነ ሄዋ ሄራን ደእያ ጎሻን፥ ቃይ አዜቃንነ ሄዋ ሄራን ደእያ ቄር ካታማቱዋንካ ደኤድኖ። ሄዋ ድራዉ፥ ይሁዳ አሳይ ኡባና በርሳበሄፐ ቢደ፥ ህኖማ ዛንጋራ ጋካናዉ ደእያ ሳኣን ደኤድኖ።

31 ቢንያማ ዛራቱ ቤቴለንነ ሄዋ ሄራን ደእያ ቄር ካታማቱዋንነ ገባአን፥ ምክማሳን፥ አያን፥ 32 አናቶታን፥ ኖባን፥ አናንያን፥ 33 ሀጾራን፥ ራማን፥ ግታይማን፥ 34 ሀዲዳን፥ ጻቦኢማን፥ ናባላጻን 35 ሎዳን፥ ኦኖንነ ኩሽያ ሂላቱ ዛንጋራ ግያ ሳንካ ደኤድኖ። 36 ይሁዳን ደኤዳ ሌዋቱዋፐ ዳራቱ ቢንያማ አሳና እትፐ ደአናዳን ኦሰቴድኖ።