1 እስራኤልያ አሳይ ግብጼፐ ከሴዳ ላኤንꬆ ላይꬃን ኮይሮ አግናን ሲና መላ ቢታን መꬍና ጎዳይ ሙሴዉ ሀዋዳን ያጊደ ሃሳዬዳ፤ ከሳ 12:1-13 2 “እስራኤልያ አሳይ ፓስጋ ባላ ኬሬዳ ጋላሳን ቦንቾ። 3 ሀ አግናን ታማነ ኦይደንꬆ ጋላሳን፥ አ ኬሬዳ ዎደ፥ አዋይ ዉላና ሀንያ ዎደ፥ አ ዎጋ ኡባዳንነ አ አዛዞ ኡባዳን ቦንቾ” ያጌዳ። 4 ሙሴ እስራኤልያ አሳይ ፓስጋ ባላ ቦንቻና ማላ፥ ኡንቱንቶ ኦዴዳ። 5 ኮይሮ አግናዉ ታማነ ኦይደንꬆ ጋላስ፥ አዋይ ዉላና ሀንያ ዎደ ሲና መላ ቢታን ኡንቱንቱ ፓስጋ ባላ ቦንቼድኖ። እስራኤልያ አሳይ መꬍና ጎዳይ ሙሳ አዛዜዳዋዳን ኡባባ ኦꬄዳ።

6 ሽን ኡንቱንቱፐ አማሬዳዋንቱ ሀይቄዳ አሳ አሃ ቦቺደ ቱኔዳ ድራዉ፥ ሄ ጋላስ ፓስጋ ባላ ቦንቻናዉ ዳንዳይበይክኖ። ሄዋ ድራዉ፥ ኡንቱንቱ ሙሴኮነ አሮናኮ ሄ ጋላስ ዪደ፥ 7 ሙሳ፥ “ኑን ሀይቄዳ አሳ አሃ ቦቼዳ ድራዉ ቱኔዶ፤ ሽን ኬሬዳ ዎድያን ሀራ እስራኤልያ አሳና መꬍና ጎዳዉ ያርሹዋ ሺሽያዋ ኑን አያዉ ድገቴቶ?” ያጌድኖ።

8 ሙሴ ኡንቱንታ፥ “መꬍና ጎዳይ ህንተዋ ታዉ አዛዝያዋ ታን ስሳና ጋካናዉ ህንተ ታክሽተ” ያጌዳ።

9 ሄዋፐ ጉይያን መꬍና ጎዳይ ሙሳ፥ 10 “ኔን እስራኤልያ አሳ ሀዋዳን ያጋ፤ ‘ህንተፐ ዎይ ህንተ ዛራቱዋፐ ኦንነ አሃ ቦቺደ ቱኖፐ፥ ዎይ ማንዳሬዳዋ ግዶፐ፥ እ መꬍና ጎዳዉ ፓስጋ ባላ ቦንቾ፤ 11 ላኤንꬆ አግናን ታማነ ኦይደንꬆ ጋላስ አዋይ ዉላና ሀንያ ዎደ ፓስጋ ባላ ቦንቾ። ፓስጋ ዶርሳ እርሹ ገልቤና ኡክꬃናነ ጫሞ ቦንጭያና ሞ። 12 ሳአይ ዎንታናዉ ሄ ዶርሳፐ አያነ አሾፖ፤ ቃይ አ መቀꬃፐካ እቱዋነ መንꬆፖ። ፓስጋ ባላዉ አ ዎጋ ኡባ ኦꬆ።ከሳ 12:46፤ ዮሃ. 19:36 13 ሽን ማንዳርቤና ጌሻ አሳይ ፓስጋ ቦንቼናን እጾፐ፥ ሄዋፐ ስንꬃዉ እ ታ አሳ ግዶፐ ቦሄቶ። አያዉ ጎፐ፥ መꬍና ጎዳ ያርሹዋ ኬሬዳ ዎድያን እ ሺሽቤና። ሄ አሳይ ባረ ናጋራይ አሄዳ መቱዋ አካናዉ በሰ።

14 “ ‘ህንተ ግዱዋን ደእያ በተ አሳይ ፓስጋ ባላ መꬍና ጎዳዉ ቦንቻና ኮዮፐ፥ ፓስጋ ዎጋዳን ቦንቾ። በትያዉካ ጋደ አሳዉካ እት ማላ ዎጋይ ደኦ’ ያጋ” ያጌዳ።

15 ዱንካኒ ቶለቴዳ ጋላስ ሻሪ ማርካተꬃ ዱንካንያ ማዬዳ፤ ኦማርሳፐ ዶሚደ፥ ዎንታና ጋካናዉ ዱንካንያፐ ቦላና ደእያ ሻሪ ታማ ማላቴ። 16 ሄዋዳን ኡባ ዎደ ጋላስ ጋላስ ሻሪ ማዬ፤ ቃማ ቃማ ሄ ሻሪ ታማዳን ፖኤ። 17 ሄ ሻሪ ዱንካንያ ቦላፐ ደንድያ ዎደ አዉደነ እስራኤላቱ ባረንቱ ዱንካኔዳ ሳኣፐ ደንዲኖ፤ ቃይ ሄ ሻሪ ዎꬍያ አይ ሳኣንነ እስራኤላቱ ዱንካኒኖ። 18 እስራኤላቱ መꬍና ጎዳ አዛዙዋን ደንድኖ፤ ሄዋዳንካ፥ መꬍና ጎዳ አዛዙዋን ዱንካኒኖ። ሻሪ ዱንካንያ ቦላን ጋምእያ ዎደ ኡባን ባረንቱ ዱንካኔዳሳን ጋምእኖ። 19 ሻሪ ዱንካንያ ቦላን ዳሮ ጋላሳ ጋምኦፐ፥ እስራኤላቱ መꬍና ጎዳ አዛዙዋ ናጊኖፐ አትና፥ ሀቃነ ቢክኖ። 20 እት እት ገደ ሻሪ ዱንካንያ ቦላን አማሬዳ ጋላሳ ጋምኤ። መꬍና ጎዳ አዛዙዋን ኡንቱንቱ ዱንካኒኖ፤ ቃይ ሄዋዳንካ፥ ጾሳ አዛዙዋን ኡንቱንቱ ደንድኖ። 21 እት እት ገደ ሻሪ ኦማርሳፐ ዎንታና ጋካናዉ ጻላላ ጋምኤ፤ ዎንትና ሻሪ ደንድያ ዎደ ኡንቱንቱካ ደንድኖ። ጋላሳ ግድና፥ ቃማ ግድና፥ ሻሪ ደንድያ ዎደ ኡንቱንቱካ ደንድኖ። 22 ሻሪ ዱንካንያ ቦላን ላኡ ጋላሳ ጋምእና፥ ዎይ እት አግና፥ ዎይ እት ላይꬃ ጋምእና፥ እስራኤላቱ ባረንቱ ዱንካኔዳሳን ጋምኢኖፐ አትና ቢክኖ። ሽን ሻሪ ደንድያ ዎደ ኡንቱንቱካ ደንድኖ። 23 ኡንቱንቱ መꬍና ጎዳ አዛዙዋን ዱንካኒኖነ ቃይ መꬍና ጎዳ አዛዙዋን ደንድኖ፤ መꬍና ጎዳይ ሙሴ ባጋና አዛዜዳዋዳን፥ ኡንቱንቱ መꬍና ጎዳ አዛዙዋ ናጌድኖ።