1 መꬍና ጎዳይ ሙሳ፥ ከሳ 25:31-40፤ 37:17-24 2 “ኔን አሮናዉ ሀዋዳን ያጋደ ኦዳ፤ ‘ኔን ላፑን ጾምፐቱዋ ዎꬅያ ዎደ ጾምፐቱ ጾምፕያ ዎꬅያ ባላቱዋፐ ስንꬃ ባጋና ደእያ ሄራቱዋ ፖኢኖ’ ያጋ” ያጌዳ።

3 እ ጌዳዋዳን አሮን ኦꬄዳ። መꬍና ጎዳይ ሙሳ አዛዜዳዋዳን፥ አሮን ጾምፐቱዋ ዎꬅያ ባላቱዋፐ ስንꬃ ባጋና ደእያ ሄራቱዋ ፖእሳናዳን ኦꬂደ፥ ባላቱዋን ዎꬄዳ። 4 ጾምፕያ ዎꬅያዌ ጋርሳ ገድያፐ ቦላ ጪሻና አሌቀቴዳ ባላቱዋ ጼራ ጋካናዉ ቆጸቴዳ ዎርቃፐ መቴዳ። ጾምፕያ ዎꬅያ ባላይ መꬍና ጎዳይ ሙሳ በሴዳ ሌምሱዋዳን ኦሰቴዳ።

5 ቃይ መꬍና ጎዳይ ሙሳ፥ 6 “ሀራ እስራኤልያ አሳ ግዱዋፐ ሌዋቱዋ አካደ፥ ኡንቱንታ ዎጋዳን ጌሻ። 7 ኔን ኡንቱንታ ጌሻናዉ ሀዋዳን ኦꬃ: ጌሽያ ሃꬃ አካደ ኡንቱንታ ፑሻካ፤ ኡንቱንቱ ባረንቱ ቦላ ኡባ ሜደትኖ፤ ባረንቱ ማዩዋካ ሜጭኖ፤ ያቲደ ኡንቱንቱ ዎጋዳን ጌሻ ግዳና። 8 ሄዋፐ ጉይያን፥ ኡንቱንቱ ኮሩማ እቱዋነ ሊቆ ꬊልያ ዛይትያን ሙናቄዳዋ ካꬃ ያርሾ አክኖ፤ ኔን ቃይ ላኤንꬆ ኮሩማ ናጋራ ያርሾ አካ። 9 ያታደ ሌዋቱዋ ጾሳ ዱንካንያ ስንꬃ አያ፤ እስራኤልያ አሳ ማባራ ኡባ ሺሻ። 10 ኔን ሌዋቱዋ መꬍና ጎዳ ስንꬃ፥ አህና እስራኤልያ አሳይ ኡንቱንቱ ቦላ ባረንቱ ኩሽያ ዎꬅኖ። 11 ሌዋቱ መꬍና ጎዳ ኦሱዋ ኦꬃናዉ ጊጋና ማላ፥ አሮን እስራኤልያ አሳፐ ሌዋቱዋ ቃꬅያ ያርሹዋ ኦꬂደ፥ መꬍና ጎዳ ስንꬃ ሺሾ።

12 “ሌዋቱ ባረንቱ ኩሽያ ኮሩማቱ ሁጲያን ዎꬅኖ፤ እቱዋ ናጋራ ያርሹዋ ኦꬃደ፥ እቱዋ ቃይ ሌዋቱ አቶ ጌተታና ማላ፥ ጹግያ ያርሹዋ ኦꬃደ መꬍና ጎዳዉ ያርሻ። 13 ሌዋቱዋ አሮናነ አ አቱማ ናናቱ አዎተꬃ ጋርሳን ዎꬃ፤ ያታደ ኡንቱንታ ቃꬅያ ያርሹዋ ኦꬃደ፥ መꬍና ጎዳ ስንꬃ ሺሻ። 14 ሄዋዳን ኦꬃደ ሌዋቱዋ ሀራ እስራኤልያ አሳፐ ዱማያ፤ ዱማዮፐ ሌዋቱ ታዋ ግዳና።

15 “ኔን ሌዋቱዋ ጌሼዳዋፐነ ቃꬅያ ያርሹዋ ኦꬃደ ሺሼዳዋፐ ጉይያን፥ ጾሳ ዱንካንያን ባረንቱ ኦሱዋ ኦꬃናዉ ዪኖ። 16 እስራኤልያ አሳ ግዱዋፐ ኡንቱንቱ ታዉ ኡባና እመቴድኖ፤ እስራኤልያ ማጫ አሳፐ የለቴዳ ባይራ አቱማዋንቱ ኡባ ድራዉ ታን ሌዋቱዋ ታዉ አካድ። 17 እስራኤልያ አሳ ግዱዋን ባይራ የለቴዳዌ አሳ ግድና፥ መህያ ግድናካ ኡባይ ታዋ። ታን ግብጼ ጋድያን ባይራ ኡባ ዎꬌዳ ጋላሳን፥ ኡንቱንታ ታዉ ዱማያድ። ከሳ 13:2 18 እስራኤልያ ባይራ አቱማዋንቱ ኡባ ድራዉ ታን ሌዋቱዋ አካድ። 19 እስራኤልያ አሳ ኡባ ግዱዋፐ ታን ሌዋቱዋ አሮናዉነ አሮና አቱማ ናናዉ እሙዋ ኦꬃደ እማድ። እስራኤልያ አሳይ ጋከትያ ዱንካንያ ሺቅያ ዎደ፥ ቦሻይ ኡንቱንታ ቦቼና ማላ፥ ሌዋቱ እስራኤልያ አሳ ግሻ ጋከትያ ዱንካንያን ባረንቱ ኦሱዋ ኦꬅኖነ ኡንቱንቱ ድራዉ አቶ ጌተትኖ” ያጌዳ።

20 መꬍና ጎዳይ ሙሳ ሌዋቱዋ ዱማያናዉ አዛዜዳዋዳን ሙሴ፥ አሮንነ እስራኤልያ አሳ ማባራይ ኡባይ ኦꬄድኖ። 21 ሌዋቱ ባረና ጌሼድኖ፤ ባረንቱ ማዩዋካ ሜጬድኖ። አሮን ኡንቱንቱ ቃꬅያ ያርሹዋ ኦꬂደ፥ መꬍና ጎዳ ስንꬃ ሺሼዳ፤ ኡንቱንታ ጌሻናዉ ኡንቱንታ አቶ ጊሴዳ። 22 ሄዋፐ ጉይያን፥ ሌዋቱ አሮናነ አሮና አቱማ ናናቱ አዎተꬃ ጋርሳን፥ ጋከትያ ዱንካንያ ግዶን ባረንቱ ኦሱዋ ኦꬃናዉ ዬድኖ። መꬍና ጎዳይ ሙሳ ሌዋቱዋ ዱማያናዉ አዛዜዳዋዳን ኡንቱንቱ ኦꬄድኖ።

23 ቃይካ መꬍና ጎዳይ ሙሳ ሀዋዳን ያጌዳ፤ 24 “ሀዌ ሌዋቱዋ ጼልያ ዎጋ: ላይꬃይ ላታማነ እቼሻነ ሄዋፐ ቦላና ደእያ አቱማዋንቱ ኦሱዋ ኦꬃናዉ ጋከትያ ዱንካንያ ዪኖ። 25 ሽን ኡንቱንቱ ላይꬃይ እሻታሙዋ ግድያ ዎደ ኡንቱንቱ ባረንቱ ኦሱዋፐ ጹራታ ከስኖ፤ ስሚደ ላኤንꬆ ኦꬆፕኖ። 26 ኡንቱንቱ ጋከትያ ዱንካንያን ኦꬅያ ባረንቱ እሻቱዋ ኦꬅ ማዳና ጎፐ ማድኖፐ አትና፥ ኡንቱንቱ ባረካ አይ ኦሶነ ኦꬆፕኖ። ስም ኔን ሌዋቱዋ ኦሱዋ ሀዋዳን ኦስሳሳ” ያጌዳ።