1 መꬍና ጎዳይ፥ ሙሳ፥ 2 “ታን እስራኤላቶ እምያ ካናነ ቢታ ዎቻና ማላ፥ አማሬዳ አሳ ኪታ፤ ኡንቱንቱ ዛረ ኡባፐ እት እት ካፑዋ ኪታ” ያጌዳ። 3 ሙሴ መꬍና ጎዳ አዛዙዋን ፓራና መላ ቢታፐ ኡንቱንታ ኪቴዳ። ኡንቱንቱ ኡባይካ እስራኤልያ አሳ ካፓቱዋ። 4 ኡንቱንቱ ሱንꬃይ ሀዋፐ ካሊደ ጻፈቴዳዋ:

17 ኡንቱንቱ ካናነ ቢታ ዎቻና ማላ፥ ሙሴ ኡንቱንታ ኪትያ ዎደ ሀዋዳን ያጌዳ፤ “ሀዋፐ ኔጌባ መላ ቢታ ፑደ ከሲደ፥ ያፐ ሁጲሳ ባጋን ደእያ ገዘ ቢታ ቢተ። 18 ቢታይ አይ ማላ ቢተንቶነ በእተ፤ ሄ ጋድያን ደእያ አሳይ ምነንቶነ ላፈንቶ፥ ጉꬄንቶነ ዳረንቶ፥ 19 ኡንቱንቱ ደእያ ቢታይ ሎኤንቶነ ኢተንቶ፥ ኡንቱንቱ ደእያ ካታማይነ አይ ማላ ካታመንቶ፥ ግምቢያን ድረት ኡቴደንቶ ድረትቤነንቶ፥ 20 ቢታይ አይ ማላ ቱኤንቶነ ላደንቶ፥ ሄ ጋድያን ምꬃይ ደእንቶነ ባዌንቶ በእተ። ምንተ! ሄ ጋድያን ሞኬዳዋ አይፍያፐ አከናን ዮፕተ” ያጌዳ። ሄ ዎዲ ዎይንያ ቱራይ ኮይሮ አይፍያ አይፍያ ዎደ።

21 ኡንቱንቱ ፑደ ከሲደ፥ ጺና ግያ መላ ቢታፐ ዶሚደ፥ ቢደ ሀማታ ፕኑዋ ማታን ደእያ ራሆባ ጋካናዉ ሄ ቢታ ዎቼድኖ። 22 ኔጌባ ፑደ ከሲደ፥ ከብሮና ጋኬድኖ፤ ሄዋን አህማና፥ ሸሻያነ ታልማያ ጌተትያ አናቀ ዛራቱ ደኢኖ። ከብሮን ግብጼን ደእያ ጾኣነ ካታማፐ ላፑን ላይꬃ ካሰት ኬጸቴዳ።

23 ሄዋና አꬊደ፥ ኡንቱንቱ ኤሽኮላ ግያ ዛንጋራ ቢደ ጋኬዳ ዎደ፥ ዎይንያ ቱራ እቱዋፐ እት ዉርጩዋና ደእያ እት ታሽያ ቃንጼድኖ፤ ኡንቱንቱፐ ላኡ ካሱዋ ግዱዋን ገልስ ቶኬድኖ። ሄዋና ሮማንያነ ባላስያ ግያ ምꬃቱዋ አይፍያ አሄድኖ። 24 እስራኤልያ አሳቱ ሄዋፐ ቃንጼዳ ዎይንያ ቱራ ዉርጩዋ ድራዉ፥ ሄ ሳኣ ኤሽኮላ *ኤሽኮላ፦ ሀ ሱንꬃ ብለꬃይ እብራዌꬁዋን፥ “ዳሮ ዎይኒ ደእያ ሳኣ” ግያዋ። ዛንጋራ ጊደ ጼሴድኖ።

25 ኡንቱንቱ ሄ ቢታ ዎቺደ፥ ኦይታሙ ጋላሳፐ ጉይያን ስሜድኖ፤ 26 ፓራና መላ ቢታን ቃዴሳ ግያ ሳን ደእያ ሙሴኮ፥ አሮነኮነ እስራኤልያ አሳ ማባራ ኡባኮ ዬድኖ። ባረንቱ በኤዳዋ ኡንቱንቶዉነ አሳ ኡባዉ ኦዴድኖ፤ ሄ ጋድያን አይፍያ አይፍያካ ኡንቱንታ በሴድኖ። 27 ኡንቱንቱ ሙሴዉ ሀዋዳን ያጊደ ኦዴድኖ፤ “ኔን ኑና ኪቴዳ ቢታ ኑን ቤዶ፤ ሄ ጋድያን ማꬃይነ ኤሳይ ጎጌ። አን አይፍያ አይፍያካ ሀዋ በአ። 28 ሽን ሄ ጋድያን ደእያ አሳይ ዎልቃማ፤ ኡንቱንቱ ካታማይካ ግምቢያ ድርሳን ድረት ኡቴዳዋነ ዎልቃማ። ኑን ቃይ አናቀ ዛራቱዋ ያን በኤዶ። 29 ኔጌባ አማሌቃ አሳቱ ደኢኖ፤ ገዝያን ሂተቱ፥ ያቡሳቱነ አሞራቱ ደኢኖ፤ ቃይ ካናነቱ ሜድተራነ አባ ዶናንነ ዮርዳኖሳ ሻፋ ጋጻን ደኢኖ” ያጌድኖ።

30 ካሌብ አሳ ሙሴ ስንꬃን ጮኡ ጊሲደ፥ “ኑን ቱሙ ጾናናዉ ዳንዳይያ ድራዉ፥ ፑደ ሀእ ከሲደ፥ ሄ ቢታ ኦሊደ አነ ኦይቆይተ” ያጌዳ።

31 ሽን ካሌበና ፑደ ቤዳ አሳቱ፥ “ሄ ቢታ አሳይ ኑፐ ምንያ ድራዉ፥ ኑን ኡንቱንታ ጾናናዉ ዳንዳዮኮ” ያጌድኖ። 32 ኡንቱንቱ ዩይ ዎቼዳ ቢታ እስራኤልያ አሳዉ ሀዋዳን ጊደ፥ ኢታ ኦዱዋ ኦዴድኖ፥ “ኑን ዎቼዳ ቢታይ ባረናን ደእያ አሳካ ምያዋ፤ አሳይ ኡባይካ ሎይꬅ አዱሳ። 33 ኑን ዎጋ አዱሳ አሳቱ ያራ ግድያ አናቀ ዛራቱዋ ያን በኤዶ፤ ኑን ኑ አይፍያን ኑና ጼልያ ዎደ ቡምቡረꬃ ማላቴቶ፤ ቃይ ኑን ኡንቱንቱ አይፍያን ሄዋካ ማላ” ያጌድኖ። ዶመꬃ 6:4