1 ሄ ጋላሳ ቃማ ማባራይ ኡባይ ባረንቱ ቃላ ꬎቂሲደ ዬኬድኖ። 2 እስራኤልያ አሳይ ኡባይ ሙሴ ቦላነ አሮና ቦላ ዙዙሜድኖ። ማባራይ ኩመንꬃይ ኡንቱንታ፥ “ኑን ግብጼ ጋድያን ደኢደ ሀይቄዳዋ ግዴሮኮ! ዎይ ኑን ሀ መላ ቢታን ሀይቄዳዋ ግዴሮኮ! 3 ማሻን ኑና ዎꬍ ዉርሳናዉ መꬍና ጎዳይ ሀ ቢታ ኑና አያዉ አሂ? ኑ ማቼቱነ ኑ ናናይ ኦሞደታና። ሄዋፐ ጉየ ግብጼ ቢታ ስምያዌ ኑዉ ኬከኔየ?” ያጌድኖ። 4 ቃይ ኡንቱንቱ እቱ እቱዋ፥ “ኑን ካለꬅያዋ ዶሪደ፥ ጉየ ግብጼ ስሜቶ” ያጌድኖ።

5 ሙሴነ አሮን ሄዋን ሺቄዳ እስራኤልያ አሳ ማባራ ኡባ ስንꬃን ሶምኡዋ ሳኣን ጋꬂደ ጉፋኔድኖ። 6 ሄ ቢታ ዎቼዳ አሳቱ ግዶፐ ኔዌ ናአይ ኢያሱነ ይፉነ ናአይ ካሌብ ባረንቱ ማዩዋ ፔꬌድኖ። 7 እስራኤልያ አሳ ማባራ ኡባዉ፥ “ኑን ካንꬅ ከሲደ ዎቼዳ ቢታይ ሎይꬅ ዳሮ ሎአ። 8 መꬍና ጎዳይ ኑናን ናሸትያዋ ግዶፐ፥ ማꬃይነ ኤሳይ ጎግያ ሄ ቢታዉ ኑና እ ገልሳና፤ ሄ ቢታ ኑዉ እ እማና። 9 ሄዋ ድራዉ፥ መꬍና ጎዳ ቦላ ማካላ ማካሎፕተ። ሄ ቢታ አሳዉ ያዮፕተ፤ ኡንቱንቱ ኑዉ ሃꬃ ኡሻካ ጋክክኖ። ኡንቱንቶ አምቦምያዌ ባዋ፤ ሽን መꬍና ጎዳይ ኑናና ደኤ። ህንተ ኡንቱንቶ ያዮፕተ!” ያጌድኖ። እብራ. 3:16 10 ማባራይ ኡባይ ኡንቱንታ ሹቻን ጫዳናዉ ሃሳዬድኖ።

ሄ ዎደ መꬍና ጎዳ ቦንቹ ጋከትያ ዱንካንያን እስራኤልያ አሳ ኡባዉ ቆንጬዳ። 11 መꬍና ጎዳይ ሙሳ፥ “ሀ አሳይ አዉደ ጋካናዉ ታና ካꬋኔ? ታን ኡንቱንቱ ግዱዋን ኦꬄዳ ማላታ ኡባ በኢደ፥ አዉደ ጋካናዉ ኡንቱንቱ ታናን አማነናን እጻኔ? 12 ታን ኡንቱንታ ኢታ ሀርግያን ሾጫደ ꬋይሳና፤ ያታደ ታን ኔና ኡንቱንቱፐ ዳርያነ ምንያ ካዉተꬃዉ አዉዋ ኦꬃና” ያጌዳ።

13 ሙሴ መꬍና ጎዳ ሀዋዳን ያጊደ ዎሴዳ፤ “ኔን ነ ዎልቃን ሀ አሳ ግብጼፐ ፑደ ከሴዳዋ ኤርያ ግብጼቱ ሀዋ ስሶፐ፥ ኡንቱንቱ ዋጋኔ?ከሳ 32:11-14 14 ኡንቱንቱ ሀ ጋድያን ደእያዋንቶካ ሄዋ ኦዳና። አቤት መꬍና ጎዳዉ፥ ኔን ሀ አሳ ግዱዋን ደእያዋ ኡንቱንቱ ስሴድኖ። አቤት መꬍና ጎዳዉ፥ ኑን ኔና በኤዳዋ ኡንቱንቱ ኤሬድኖ፤ ነ ሻሪ ኡንቱንቱፐ ቦላና ታክያዋነ ጋላስ ሻርያ ቱሳን፥ ቃማ ታማ ቱሳን ኔን ኡንቱንቱ ስንꬃን ብያዋ በኤድኖ። 15 ሀእ ኔን ሀ አሳ ኡባ እት ኩꬃን ዎꬍያዋ ግዶፐ፥ ነ ካሰ ኦꬄዳዋ ስሴዳ ካዉተꬃቱ፥ 16 መꬍና ጎዳይ ሀ አሳ፥ ‘ህንተዉ እማና ጊደ ጫቄዳ ቢታ ኡንቱንታ አፋናዉ ዳንዳይቤና ድራዉ፥ መላ ቢታን ኡንቱንታ ዎꬌዳ’ ያጊደ ሃሳያና።

17-18 “ሄዋ ድራዉ፥ ጎዳዉ፥ ኔን ነ ዎልቃ ኑና በሳ፤ ኔን ጋደ፥ ‘መꬍና ጎዳይ ዳንዳያንቻነ አገና ሲቁዋን ኩሜዳዋ፤ ናጋራነ ማካላ አቶ ግያዋ፤ ግዶፐነ፥ ባይዛንቻ ሙረናን አገናዋ፤ አዎቱዋ ናጋራ ድራዉ ናናቱዋ ሄዘንꬃነ ኦይደንꬆ የለታ ጋካናዉ ሙርያዋ’ ጋደ ኦዳ ዎꬄዳዋ ፖላ። ከሳ 20:5-6፤ 34:6-7፤ ዛረ. 5:9-10፤ 7:9-10 19 ሀ አሳይ ግብጼፐ ከሶደፐ ዶማደ ሀች ጋካናዉ ኔን አቶ ጌዳዋዳን፥ ነ አገና ሲቁዋ ዳሩዋን ሀ አሳ ናጋራ አቶ ጋርኪ!” ያጌዳ።

20 መꬍና ጎዳይ ሙሳ፥ “ኔን ኦቼዳዋዳን ታን ኡንቱንቶ አቶ ጋድ። 21 ሽን ታ ደኡዋን ጫቃይ፤ መꬍና ጎዳ ቦንቹ ሳኣ ኡባ ኩምያዋዳን፥ እብራ. 3:18 22-23 ሀ አሳፐ እቱነ ሄ ቢታ በኤና። ታ ቦንቹዋነ ግብጼ ቢታንነ መላ ቢታ ታን ኦꬄዳ ማላታ ሀ አሳቱ በኤድኖ፤ ሽን ኡንቱንቱ ታሙ ገደ ታና ፓጬድኖነ ታ ቃላ ስሰናን እጼድኖ። ሄዋ ድራዉ፥ ታን ኡንቱንቱ ማይዛ አዋቶ እማና ጋደ ጫቄዳ ቢታ ታና ካꬌዳዋንቱፐ እቱነ ሙለካ በኤና። 24 ሽን ታ ቆማይ ካሌብ ኡንቱንቱፐ ዱማትያ ድራዉነ እ ታና ፖሎ ዎዛናፐ ካሌዳ ድራዉ፥ ታን እ ካሰ ቤዳ ቢታ አ ጋꬃና፤ አ ዘረꬃይ ሄ ቢታ ላታና። ኢያሳ 14:9-12 25 ሽን ሀእ አማሌቃቱነ ካናነቱ ዛንጋራን ደእያ ድራዉ፥ ዎንት ጉየ ስሚደ፥ ዞኦ አባኮ አፍያ ኦግያ ኦይቂደ መላ ቢታ ቢተ” ያጌዳ።

26 ቃይ መꬍና ጎዳይ ሙሳነ አሮና ሀዋዳን ያጌዳ፤ 27 “ሀ ኢታ አሳይ ታ ቦላ አዉደ ጋካናዉ ዙዙማኔ? ታን እስራኤልያ አሳ ዙዙንꬃ ኡባ ስሳድ። 28 ሄዋ ድራዉ፥ ኔን ኡንቱንቶ ሀዋዳን ያጋደ ኦዳ፤ ‘ታ ደኡዋን ጫቃይ፤ ታን ህንተ ሃሳይሽን ታ ሀይꬃን ስሴዳዋ ህንተንቶ ኦꬃና። ታን መꬍና ጎዳይ ሄዋ ኦዳይ። 29 ህንተ አሃይ ሀ መላ ቢታን ኩንዳና፤ አያዉ ጎፐ፥ አሳ ፓይድያ ዎደ ፓይደቴዳ ላታሙ ላይꬃነ ሄዋፐ ቦላና ደእያ አሳይ ኡባይ ታ ቦላ ዙዙሜድታ። እብራ. 3:17 30 ይፉነ ናኣ ካሌባፐነ ኔዌ ናኣ ኢያሱፐ አትና፥ ህንተፐ ኦንነ ታን ህንተና ዎꬃናዉ ጫቄዳ ሄ ቢታ ገለና። 31 ህንተ፥ “ኑ ናናይ ኦሞደታና” ጌዳ ህንተ ጉꬃ ናናቱዋ ሄ ህንተ ካꬌዳ ቢታ ገልሳና፤ ቢታይካ ኡንቱንቱሳ ግዳናዋ። 32 ሽን ህንተና ግዶፐ፥ ህንተ አሃይ ሀ መላ ቢታን ኩንዳና። 33 ህንተ አማነትቤና ድራዉ፥ ህንተ ዉርሰꬃ አሃይ ሀ መላ ቢታ ዉላና ጋካናዉ፥ ህንተ ናናይ ዋየቲደ፥ ሀ መላ ቢታ ኦይታሙ ላይꬃ ሄንꬃንቻ ግዲደ ዩያና። ኪታ 7:36 34 ህንተ ሄ ቢታ ዎቼዳ ሄ ኦይታሙ ጋላሳ ፓይዱዋን፥ እት ጋላሳዉ እት ላይꬃ፥ ሄዌነ፥ ኦይታሙ ላይꬃዉ ህንተ ናጋራ ድራዉ ህንተ ዋየታና፤ ታን ህንተ ቦላ ደንድያዋ ህንተ ኤራና’ ያጋ ኦዳ። 35 ታን መꬍና ጎዳይ ሀዋ ኦዳይ። ታ ቦላ ሺቅ ኡቴዳ ሀ ኢታ ማባራ ቦላ ሀዋዳን ቱሙ ኦꬃና: ኡንቱንቱ ሀ መላ ቢታን ዉራና፤ ሀዋን ኡንቱንቱ ሀይቃና” ያጌዳ።

36 ሄ ቢታ ዎቻና ማላ፥ ሙሴ ኡንቱንታ ኪትና ቢደ ስሜዳ አሳቱ፥ ሄ ቢታ ኢታ ኦዱዋ ኦዲደ፥ ሙሴ ቦላ አሳይ ኡባይ ዙዙማና ማላ ኦꬄዳዋንቱ፥ 37 ሄ ኢታ ኦዱዋ ኦዴዳ አሳቱ፥ መꬍና ጎዳ ስንꬃ ቦሻን ሀይቄድኖ። 38 ሄ ቢታ ዎቻናዉ ቤዳ አሳቱዋፐ ይፉነ ናአይ ካሌብነ ኔዌ ናአይ ኢያሱ ጻላላይ ፓጻ አቴድኖ።

39 ሙሴ ሀዋ እስራኤልያ አሳዉ ኡባዉ ኦዴዳ ዎደ፥ አሳይ ሎይꬅ ዬኬዳ። 40 ዎንተꬃ ጋላስ ዎንታ ጉራን ኡንቱንቱ ደንዲደ፥ ፑደ ገዘ ቢታ ከሲደ፥ “ኑን ናጋራ ኦꬄዶ፤ ሽን ሀእ ጾሳይ ኑዉ እማና ጌዳ ሳኣ ፑደ ከሳና” ያጌድኖ።

41 ሽን ሙሴ ኡንቱንታ፥ “መꬍና ጎዳ አዛዙዋ ህንተ አያዉ መንꬂቴ? ህንተዉ ሀነና። 42 መꬍና ጎዳይ ህንተናና ደኤና ድራዉ፥ ፑደ ከሶፕተ፤ ህንተ ሞርከቱ ህንተና ጾናና። 43 አማሌቃ አሳቱዋናነ ካናነ አሳቱዋና ህንተ ኦለታና፤ ህንተ ማሻን ሀይቃና። መꬍና ጎዳፐ ህንተ ዎራ ስሜዳ ድራዉ፥ መꬍና ጎዳይ ህንተናና ደኤና” ያጌዳ።

44 ሽን ኡንቱንቱ መꬍና ጎዳ ጫቁዋ ታቦታይነ ሙሴነ ዱንካኔዳ ሳኣፐ ደንዳና ꬋዮፐካ፥ ገዘ ቢታ ከሳናዉ ጻሊደ ደንዴድኖ። 45 ገዘ ጋድያን ደእያ አማሌቃ አሳቱነ ካናነ አሳቱ ዎꬊደ ኡንቱንቱ ኦላይ ጾኒደ፥ ሆርማ ጋካናዉ ኡንቱንታ የደርሴድኖ።