1 መꬍና ጎዳይ ሙሳ ሀዋዳን ያጌዳ፤ 2 “እስራኤልያ አሳዉ ሀዋዳን ያጋ፤ ‘ህንተ ደአና ማላ፥ ታን ህንተንቶ እምያ ቢታ ገልያ ዎደ፥ 3 መህያፐ ዎይ ዶርሳፐ፥ ጹግያ ያርሹዋ ግድና፥ ዎይ ሺቆዋ ጋꬃናዉ ያርሽያ ያርሹዋ ግድና፥ ዎይ መꬍና ጎዳይ ኬሬዳ ባላ ጋላሳቱዋን ህንተ ዶሱዋን ጮ እምያ ያርሹዋ ግድና፥ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሾቱዋ ያርሽተ። 4 ያርሹዋ ሺሽያ ኡራይ ካꬃ ያርሾ እት ኪሎ ግራመ ꬊልያ እት ሊትሮ ዎጋራ ዛይትያን ሙናቄዳዋካ መꬍና ጎዳዉ አሆ። 5 ቃይ ጹግያ ያርሾ፥ ዎይ ሀራ ያርሾ አህያ እት እት ዶርሳና እት ሊትሮ ዎይንያ ኤሳ ኡሻ ያርሹዋ ኦꬂደ ጊግስተ።

6 “ ‘ዶርሳ ኦርግያ ያርሻናዉ ሺሽያ ዎደ፥ ካꬃ ያርሾ ላኡ ኪሎ ግራመ ꬊልያ እት ሊትሮነ ባጋ ዎጋራ ዛይትያን ሙናቄዳዋነ 7 እት ሊትሮነ ባጋ ዎይንያ ኤሳ ኡሻ ያርሾ አህተ። መꬍና ጎዳዉ ሳዉዋ ቶሹኩ ግያ ያርሹዋ ያርሽተ።

8 “ ‘እት ኮሩማ ጹግያ ያርሹዋ፥ ዎይ ሺቁዋ ጋꬅያ ያርሹዋ፥ ዎይ እትፐተꬃ ያርሹዋ ኦꬂደ ያርሻናዉ መꬍና ጎዳዉ አህያ ዎደ፥ 9 ኮሩማና እትፐ ካꬃ ያርሾ ሄዙ ኪሎ ግራመ ꬊልያ ላኡ ሊትሮ ዎጋራ ዛይትያን ሙናቄዳዋነ 10 ኡሻ ያርሾ ላኡ ሊትሮ ዎይንያ ኤሳካ አህተ። መꬍና ጎዳዉ ሳዉዋ ቶሹኩ ግያ ያርሹዋ ታማን ያርሽተ።

11 “ ‘እት እት ኮሩማ ቦራ፥ ዎይ እት እት ዶርሳ ኦርግያ፥ ዎይ ያላጋ ዴሻ ኦርግያ፥ ዎይ አቱማ ዶርሳ ማራ ያርሻናዉ ሺሽያ ዎደ፥ ካꬃ ያርሹነ ኡሻ ያርሹ ሀዋዳን እትፐ ሺቄ። 12 እት መህያፐ ዳሩ ሺቅያ ዎደ፥ ካꬃ ያርሹነ ኡሻ ያርሹ ሄዋዳን ዳሪደ ሺቄ። 13 እስራኤልያ አሳ ግድያ ኦንነ ታማን ጹግያ፥ ሳዉዋ ቶሹኩ ግያ ያርሹዋ መꬍና ጎዳዉ ሺሽያ ዎደ ኡባን፥ ሀዋዳን ኦꬃናዉ ኮሼ። 14 ስንꬃፐ ያና የለታን ህንተ ግዶን ደእያ በቲ ዎይ ሀራ አሳይ ኦንነ ጹግያ፥ ሳዉዋ ቶሹኩ ግያ ያርሹዋ መꬍና ጎዳዉ ሺሻናዉ ኮዮፐ፥ እካ ህንተ ኦꬅያዋዳን ኦꬃናዉ ኮሼ። 15 ህንተዉካ ህንተ ግዶን ደእያ በተቶካ ሀ ዎጋይ እቱዋ፤ ሀዌ ስንꬃፐ ያና የለታዉካ ኤቂደ ደእያ ዎጋ። ህንተካ በተቱካ መꬍና ጎዳ ስንꬃን እቱዋ። 16 ህንተዉካ ህንተ ግዶን ደእያ በተ አሳቶካ ህጊነ ዎጋይ እቱዋ ግዳና’ ያጋ” ያጌዳ። ዎጋ 24:22

17 ሄዋፐ ጉይያን፥ መꬍና ጎዳይ ሙሳ ሀዋዳን ያጌዳ፤ 18 “እስራኤልያ አሳዉ ሀዋዳን ያጋደ ኦዳ፤ ‘ታን ህንተና አፍያ ቢታ ህንተ ገሊደ፥ 19 ሄ ጋድያን ሞክያ ካꬃ ምያ ዎደ፥ ሄ ካꬃፐ ጼራ ከሲደ፥ ህንተ መꬍና ጎዳዉ ያርሹዋ ኦꬂደ ሺሽተ። 20 ሄዌካ፥ ባይራ ካኤዳ ካꬃፐ ኡኬዳ ኮይሮ ኮምፑዋ፥ ካꬃ ቡክያ ኡዱማፐ እምያ ያርሹዋ ኦꬂደ ሺሽተ። 21 ያና የለታ ኡባን ህንተ ህንተ ጋድያን ሞኬዳ ካꬃፐ ጼራ ከሴዳ ኮምፑዋ፥ መꬍና ጎዳዉ ያርሹዋ ኦꬂደ ሺሽተ።

22 “ ‘መꬍና ጎዳይ ኦዴዳ ሀ አዛዞቱዋ ኡባ ህንተ ኤራና ꬋዪደ፥ ናገናን አጎፐ፥ 23 መꬍና ጎዳይ አ ባጋና ህንተና አዛዜዳ አዛዞቱዋ ኡባ፥ መꬍና ጎዳይ እሜዳ ጋላሳፐ ዶሚደ፥ ያና የለታ ጋካናዉ፥ ፓጨናን ናገናን አጎፐ፥ 24 ቃይ ሄዋ ማባራይ ኤረናን ኦꬄዳዋ ግዶፐ፥ ማባራይ ኡባይ መꬍና ጎዳዉ እት ኮሩማ ጹግያ፥ ሳዉዋ ቶሹኩ ግያ ያርሹዋ ኦꬂደ፥ አዉ ዎጋይ አዛዝያዋዳን፥ ካꬃ ያርሹዋናነ ኡሻ ያርሹዋና ሺሾ፤ ቃይ ናጋራ ያርሹዋ ኦꬂደ፥ እት ዴሻ ኦርግያ ሺሾ። 25 ያቶፐ ቄሲ ኩመንꬃ እስራኤልያ ማባራ ናጋራ አቶ ጊስያ ዎጋ ፖሎ፤ ኡንቱንቱ ናጋራይ አቶ ጌተታና። አያዉ ጎፐ፥ ኡንቱንቱ ኤሪደ ኦꬅበይክኖ፤ ቃይ ኡንቱንቱ ባረንቱ ባይዙዋ ድራዉ፥ መꬍና ጎዳዉ ታማን ጹግያ ያርሹዋነ ባረንቱ ናጋራ ያርሹዋ ሺሼድኖ። 26 አሳይ ኡባይ ኤረናን ሄ ባይዙዋን ሀምባላቼቴዳ ድራዉ፥ ኩመንꬃ እስራኤልያ ማባራዉካ ኡንቱንቱ ግዶን ደእያ በተ አሳዉካ አቶ ጌተታና።

27 “ ‘እት አሳይ ባረካ ኤራና ꬋዪደ ናጋራ ኦꬆፐ፥ የለቶደፐ እት ላይꬃ ግድያ እት ዴሻቶ ናጋራ ያርሹዋ ኦꬂደ ሺሾ፤ ዎጋ 4:27-31 28 ኤረናን ደኢደ ናጋራ ኦꬄዳ ኡራዉ ቄሲ መꬍና ጎዳ ስንꬃን ናጋራ አቶ ጊስያ ዎጋ ፖሎ፤ አ ናጋራይ አቶ ጌተታና። 29 ኤረናን ደኢደ ናጋራ ኦꬅያ አሳ ኡባዉ፥ የለታን እስራኤልያ አሳ ግድናካ በተ አሳ ግድናካ ሀ ህጊ እቱዋ።

30 “ ‘ሽን የለታን እስራኤልያ አሳ ግድናካ በተ አሳ ግድናካ ኤሪደ ኦቶሩዋን ናጋራ ኦꬅያ ኡራይ መꬍና ጎዳ ቦሬ። ሄ ኡራይ ባረ አሳ ግዶፐ ቦሄቶ። 31 ሄ አዉ መꬍና ጎዳ ቃላ ካꬌዳ ድራዉነ አ አዛዙዋ መንꬄዳ ድራዉ፥ እ ቱሙዋፐ አሳ ግዶፐ ቦሄታናዉ በሰ፤ አ ባይዙ አና’ ያጋ” ያጌዳ።

32 እት ጋላስ እስራኤልያ አሳይ መላ ቢታ ደእሽን፥ እት ብታኒ ሳምባታን ምꬃ ምጺደ ቤቴዳ። 33 ምꬃ እ ምጽሽን ደሜዳ አሳቱ ሙሴኮ፥ አሮነኮነ ኩመንꬃ ሽቁዋኮ አ አሄድኖ። 34 ኡንቱንቱ አ ኦꬃናዋ ኤርቤና ድራዉ፥ ቃሹዋን ታክሴድኖ። 35 ሄዋፐ ጉይያን መꬍና ጎዳይ ሙሳ፥ “ሀ ብታኒ ሀይቃናዉ በሰ፤ ኩመንꬃ ያአይ ባረንቱ ዱንካኔዳ ሳኣፐ ጋጻ ከሲደ፥ ሹቻን ጫዲደ አ ዎꬎ” ያጌዳ። 36 ኩመንꬃ ያአይ መꬍና ጎዳይ ሙሳ አዛዜዳዋዳን፥ ዱንካኔዳ ሳኣፐ ጋጻ ከሲደ፥ ሹቻን ጫዲደ አ ዎꬌዳ።

37 መꬍና ጎዳይ ሙሳ ሀዋዳን ያጌዳ፤ 38 “እስራኤልያ አሳዉ ሀዋዳን ያጋደ ኦዳ፤ ‘ህንተካ ስንꬃፐ ያና የለታይካ ህንተ ማዩዋ ጋጻ ጼራን ጼራን ማጫራ ከስተ፤ ሄ ማጫራ ቦላ ሳሉዋ ማላትያ ቃጭና ስክተ። ዛረ. 22:12 39 ሄ ማጫራ ህንተ በእያ ዎደ ኡባን መꬍና ጎዳ አዛዞቱዋ ሀሳዪደ ፖልተ፤ ያቶፐ፥ ህንተ ህንተ አይፍያነ ህንተ ዎዛና አሙዋ ካሊደ፥ ታፐ ዎራ ስምክታ። 40 ሄ ማጫራ በእያዋን ህንተ ታ አዛዞቱዋ ኡባ ሀሳዪደ ፖላናነ ህንተ ህንተ ጾሳዉ ጌሻ ግዳና። 41 ታን መꬍና ጎዳ፥ ህንተ ጾሳቴ፤ ታን ህንተ ጾሳ ግዳናዉ፥ ህንተና ግብጼፐ ከሳድ። ታን መꬍና ጎዳ፥ ህንተ ጾሳ’ ያጋ” ያጌዳ።