1 ሌዊያ ዛርያፐ ቃሃታ ያራ ግድያ ይጽሃራ ናአይ ቆራህ፥ ሮቤላ ዛርያፐ ኤልኣባ ናናይ ዳታንነ አቢራምነ ቃይ ፐሌታ ናአይ ኦንስ፥ ይሁዳ 11 2 ሙሴ ቦላ ደንዴድኖ። ኡንቱንቱና ላኡ ጼታነ እሻታሙ እስራኤልያ አሳቱ ደኢኖ፤ ኡንቱንቱ ኤረቴዳ አሳነ ማባራን ዶረቴዳ ካለꬅያዋንታ። 3 ኡንቱንቱ ሙሴነ አሮና ስንꬃ ሺቂደ፥ ሀዋዳን ያጌድኖ፤ “ህንተ ዳርሴድታ! ማባራይ ኡባይ ሁጲያን ሁጲያን ጌሻ፤ መꬍና ጎዳይካ ኡንቱንቱ ግዱዋን ደኤ፤ ያትና መꬍና ጎዳ ማባራ ቦላ ህንተና አያዉ ꬎቁ ꬎቁ ኦꬂቴ?” ያጌድኖ።

4 ሙሴ ሀዋ ስሴዳ ዎደ ጾሳ ስንꬃን ሳኣን ጉፋኔዳ፤ 5 ቆራሀነ አ ጭታ ኡባ፥ “ዎንት ዎንታ መꬍና ጎዳይ ኦን ናጋራንቼንቶነ ኦን ጌሸንቶ በሳና፤ እ ሄ ዶርያ አሳ ባረኮ ሺሻና። 6 ቆራሀ፥ ኔንነ ነ ጭታይ ኡባይ ሀዋ ኦꬅተ: ዎንት እጻና ጩዋይያዋንታ አኪደ፥ 7 ቦንቁዋ አን ዎꬂደ፥ መꬍና ጎዳ ስንꬃን እጻና ጩዋይተ። መꬍና ጎዳይ ዶርያ አሳይ፥ እ ጌሻ ግዳናዋ። ሌዊያ ዛረቶ፥ ህንተ ዳርሴድታ” ያጌዳ።

8 ሙሴ ቃይካ ቆራሀ፥ “ህንተኖ ሌዊያ ዛረቶ፥ ስስተ! 9 እስራኤልያ መꬍና ጎዳይ ህንተና እስራኤልያ ማባራፐ ዱማዪደ፥ መꬍና ጎዳ ዱንካንያ ኦሱዋ ኦꬃና ማላነ አሳ ስንꬃን ሄ ኦሱዋ ኦꬃናዉ ህንተ ኤቃና ማላ፥ ባረኮ ሺሼዳዌ ህንተንቶ ጉጼዴ? 10 እ ህንተናነ ህንተ እሻቱዋ ሌዋቱዋ ኡባ ባረኮ ሺሼዳ፤ ቃይ ሀእ ህንተ ቄሰተꬃካ ካጄሊታ። 11 ኔንነ ነ ጭታይ ኡባይ አሮና ቦላ ዙዙምያዌ፥ እ ኦኔ? ህንተንቱ መꬍና ጎዳ ቦላ ማካሊታ” ያጌዳ።

12 ሄዋፐ ጉይያን፥ ሙሴ ኪቲደ ኤልኣባ ናናቱዋ፥ ዳታናነ አቢራማ ጼስሴዳ፤ ሽን ኡንቱንቱ አ፥ “ኑን ቦኮ! 13 ኔን መላ ቢታን ኑና ዎꬋናዉ ማꬃይነ ኤሳይ ጎግያ ጋድያፐ ከሴዳዌ ጉጼዴ? ቃይ ሀእ ኔን ኑ ቦላ ካፑዋ ግዳናዉ ኮያይ? 14 ሄዋ ቦላካ ቃይ ማꬃይነ ኤሳይ ጎግያ ቢታ ኔን ኑና ገልሳባካ፥ ዎይ ኔን ኑዉ ላታ ኦꬃደ ጋድያነ ዎይንያ ቱራ እማባካ፤ ኔን ሀ አሳ ጭማሳ። ኑን ቦኮ!” ያጌድኖ።

15 ሙሴ ሎይꬅ ሀንቀቲደ መꬍና ጎዳ፥ “ኡንቱንቱ ያርሽያ ያርሹዋ አኮፓ፤ ታን ኡንቱንቱፐ ሀርያ እቱዋነ አካበይከ፥ ዎይ ታን ኡንቱንቱፐ እት አሳነ ናቃበይከ” ያጌዳ።

16 ቃይ ሙሴ ቆራሀ፥ “ዎንት ኔን፥ ነ ጭታይ ኡባይነ አሮን መꬍና ጎዳ ስንꬃን ግድተ። 17 እት እት አሳይ ባረ እጻና ጩዋይያዋ ኡባና ላኡ ጼታነ እሻታሙዋ አኪደ፥ እጻና አን ዎꬂደ፥ መꬍና ጎዳ ስንꬃ ሽሾ። ቃይ ኔንነ አሮን ህንተ እጻና ጩዋይያዋንታ አህተ” ያጌዳ። 18 አሳይ ኡባይካ ባረ እጻና ጩዋይያዋ አኪደ፥ ቦንቁዋነ እጻና አን ዎꬄዳ፤ ጋከትያ ዱንካንያ ፐንግያን ሙሴናነ አሮናና ኤቄድኖ። 19 ቆራህ ኩመንꬃ ማባራ ጋከትያ ዱንካንያ ፐንግያን ሺሼዳ።

ሄ ዎደ መꬍና ጎዳ ቦንቹ ኩመንꬃ ማባራዉ ቆንጬዳ። 20 መꬍና ጎዳይ ሙሳነ አሮና፥ 21 “ታን እት ኩꬃን ሀ ማባራ ꬋይሳና ሀንያ ድራዉ፥ ኡንቱንቱፐ ሻከትተ” ያጌዳ።

22 ሽን ሙሴነ አሮን ሳኣን ጉፋኒደ፥ “አቤት ጾሳዉ፥ አሹዋ ማዬዳ አሳ ኡባ መꬌዳ ጾሳዉ፥ እት ኡራይ ናጋራ ኦꬆፐ፥ ኔን ኩመንꬃ ማባራ ሀንቀታይ?” ያጌድኖ።

23 ያትና መꬍና ጎዳይ ሙሳ፥ 24 “ኔን ማባራ፥ ‘ቆራሀ፥ ዳታናነ አቢራማ ዱንካነቱዋፐ ክችተ’ ያጋደ ኦዳ” ያጌዳ።

25 ሙሴ ደንዲደ፥ ዳታነኮነ አቢራመኮ ቢና፥ እስራኤልያ ጭማቱ አ ካሌድኖ። 26 ማባራ እ፥ “ሀ ኢታ አሳቱ ዱንካነቱዋፐ ክችተ፤ ኡንቱንቱዋ ግዴዳዋ አያነ ቦቾፕተ። ሄንኮደ ኡንቱንቱ ናጋራ ኡባ ጋሱዋን ህንተካ ፕተት ꬋያና” ያጊደ ምንሲደ ኦዴዳ።

27 ኡንቱንቱ ቆራሀ፥ ዳታናነ አቢራማ ዱንካነቱዋፐ ክቼድኖ። ዳታንነ አቢራም ካረ ከሲደ፥ ባረንቱ ማቼቱዋና፥ ባረንቱ ናናቱዋና ባረንቱ ጉꬃ ናናቱዋና ባረንቱ ዱንካነቱዋ ፐንግያን ኤቄድኖ። 28 ሙሴ አሳ፥ “ታን ሀ ኦሶ ኡባ ኦꬃና ማላ፥ መꬍና ጎዳይ ታና ኪቴዳዋነ ታን ታ ሸንያን ኦናዋ ህንተ ሀዋን ኤራና። 29 ሀ አሳቱ አሳይ ሀይቂያዋዳን ሀይቆፐ፥ ዎይ አሳ ቦላ ጋክያዋ ጻላላይ ኡንቱንቱ ቦላ ጋኮፐ፥ መꬍና ጎዳይ ታና ኪትቤና። 30 ሽን መꬍና ጎዳይ ኡባና ኦራꬃባ ኦꬅና፥ ቢታይ ዶየቲደ ኡንቱንታነ ኡንቱንቶ ደእያዋ ኡባ ምት አጎፐ፥ ኡንቱንቱ ፓጻ ደኢደ ስኦልያ ዱገ ዎꬎፐ፥ ሄ ዎደ ሀ አሳቱ መꬍና ጎዳ ካꬌዳዋ ህንተ ኤራና” ያጌዳ።

31 እ ያጊደ ዉርሴዳ ዎደ፥ ኡንቱንቱ ኤቄዳ ቢታይ ጳልቀት ዎꬌዳ። 32 ቢታይ ዶየቲደ፥ ኡንቱንታነ ኡንቱንቱ ሶ አሳ፥ ቆራሀ ጭታ ኡባ ኡንቱንቶ ደእያዋ ኡባና ምት አጌዳ። 33 ያትና ኡንቱንቱ ባረዉ ደእያዋ ኡባና ፓጻ ደኢደ፥ ስኦልያ ዱገ ዎꬌድኖ። ቢታይካ ኡንቱንቱ ቦላ ጎርደት አጌዳ፤ ኡንቱንቱ ማባራ ግዶፐ ትፕ ጊደ ꬋይ አጌድኖ። 34 ኡንቱንቱ ዋሱዋን ኡንቱንቱ ማታን ደእያ እስራኤላቱ ኡባይ፥ “ቢታይ ኑናካ ቃይ ምታና ሀኔ!” ያጊድ ባቃቴድኖ።

35 ቃይ ታማይካ መꬍና ጎዳ ማታፐ ዪደ፥ እጻና ጩዋይያ ላኡ ጼታነ እሻታሙ አሳ ም አጌዳ።

36 ሄዋፐ ጉይያን መꬍና ጎዳይ ሙሳ፥ 37 “ኔን ቄስያ አሮና ናኣ ኤልኣዛራዉ ያጋደ ኦዳ፥ ‘እጻና ጩዋይያባቱዋ ታማን ጹገቴዳ አሳ ግዶፐ አካ፤ ቦንቁዋ ጩዋይያባቱዋፐ ሃሳደ ላላ። ሄ እጻና ጩዋይያባቱ ጌሻ። 38 ባረ ናጋራ ድራዉ ሀይቄዳ ሀ አሳቱ እጻና ጩዋይያባቱዋ ሌእሳደ ቆጻደ፥ ያርሹዋ ሳጽንያ ካማ። ኡንቱንቱ ሄዋንታ መꬍና ጎዳ ስንꬃን ሺሼዳ ድራዉ፥ ሄዋንቱ ጌሻ፤ ሄዋንቱ እስራኤላቱዋ ሀሳይስያ ማላታ ግዳና’ ያጋ” ያጌዳ።

39 ቄሲ ኤልኣዛር ጹገቴዳ አሳቱ ሺሼዳ ናሃሰ ብራታፐ ኦሰቴዳ እጻና ጩዋይያባቱዋ አኪደ፥ ያርሹዋ ሳጽንያ ካማናዉ ሌእሲደ ቆጼዳ። 40 አሮና ዛረ ግደና ኦንነ መꬍና ጎዳ ስንꬃን እጻና ጩዋያናዉ ሺቀና ማላ፥ ቆራሀነ አ ጭታ ጋኬዳዌ አ ጋከና ማላ፥ እስራኤላቱዋ ሀሳይሳናዉ ሀዋንታ ኦꬄዳ። መꬍና ጎዳይ ሙሴ ባጋና ኤልኣዛራ አዛዜዳዋዳን ሀዌ ሀኔዳ።

41 ዎንተꬃ ጋላስ እስራኤልያ ማባራይ ኡባይ፥ “መꬍና ጎዳ አሳ ህንተ ዎꬌድታ” ያጊደ፥ ሙሴ ቦላነ አሮና ቦላ ዙዙሜድኖ። 42 ማባራይ ሙሴነ አሮና ቦላ ደንዳናዉ ሺቂደ፥ ጋከትያ ዱንካንያኮ ስም ጼልያ ዎደ፥ ሻሪ ጋከትያ ዱንካንያ ካምና፥ መꬍና ጎዳ ቦንቹ ቆንጬዳ።

43 ሄዋፐ ጉይያን፥ ሙሴነ አሮን ጋከትያ ዱንካንያ ስንꬃዉ ዬድኖ። 44 መꬍና ጎዳይ ሙሳ፥ 45 “ሀ አሳ ግዱዋፐ ክችተ፤ ታን ኡንቱንታ እት ኩꬃን ꬋይሳ ባሻና” ያጌዳ።

ኡንቱንቱ ሳኣን ጉፋኔድኖ። 46 ሙሴ አሮና፥ “ነ እጻና ጩዋይያዋ አካደ፥ ቦንቁዋ ያርሽያ ሳኣፐ አካደ፥ እጻና አን ዎꬃ፤ ኡንቱንቶ አቶ ጊሳናዉ ኤለካ ማባራኮ አፋ። አያዉ ጎፐ፥ መꬍና ጎዳ ሀንቁ አ ማታፐ ከስ ክቼዳ፤ ቦሻይካ ዶም ክቼዳ” ያጌዳ። 47 ሙሴ ጌዳዋዳን አሮን ባረ እጻና ጩዋይያዋ አኪደ፥ ማባራ ግዶ ዎጼዳ። ቦሻይ አሳ ግዱዋን ዶም ደእሽን፥ አሮን እጻና ጩዋዪደ፥ አሳዉ አቶ ጊሴዳ። 48 ያቲደ እ ሀይቄዳዋንቱፐነ ፓጻ ደእያዋንቱፐ ግዱዋን ኤቂና፥ ቦሻይ አግ አጌዳ። 49 ቆራሀ ጋሱዋን ሀይቄዳ አሳይ ፓይደተናን፥ ሀ ቦሻን ሀይቄዳዋንቱ 14,700. 50 ቦሻይ ኤቄዳዋፐ ጉይያን፥ አሮን ጋከትያ ዱንካንያ ፐንግያን ደእያ ሙሴኮ ስሜዳ።