1 መꬍና ጎዳይ ሙሳ ሀዋዳን ያጌዳ፤ 2 “ኔን፥ ‘ህንተ ዛርያን ዛርያን ህንተ ካፓቱዋፐ ሁጲያን ሁጲያን እት እት ጻምኣ ኡባና ታማነ ላኡ ጻምኣ ታዉ እምተ’ ያጋደ እስራኤላቱዋፐ አካ። እት እት አሳ ሱንꬃ ጻምኣ ቦላን ጻፋ። 3 እት እት ዛርያ ካፖ እት ጻምኣ ግድያ ድራዉ፥ ሌዊያ ጻምአን አሮና ሱንꬃ ጻፋ። 4 ጋከትያ ዱንካንያ ግዶን ታን ኔናና ጋከትያ ማርካተꬃ ታቦታ ስንꬃን ዎꬃ። 5 ታን ዶርያ አሳ ጻምአይ አጫና፤ ሀዋዳን ኦꬃደ ህንተ ቦላን እስራኤላቱ ዙዙምያ ዙዙንꬃ ታን ሙለ ꬋይሳና” ያጌዳ።

6 ሙሴ እስራኤልያ አሳዉ ኦድና፥ ኡንቱንቱ ካፓቱ ታማነ ላኡ ጻምአቱዋ፥ እት እት ዛርያ ካፓቱ እት እት ጻምኣ አዉ እሜድኖ። ሄ ጻምአቱዋ ግዱዋን አሮና ጻምአይካ ደኤ። 7 ሙሴ ሄ ጻምኣ ኡባ ማርካተꬃ ዱንካንያ ግዶን መꬍና ጎዳ ስንꬃን ዎꬄዳ።

8 ዎንተꬃ ጋላስ ማርካተꬃ ዱንካንያ ግዶ ሙሴ ገሌዳ ዎደ፥ ሌዊያ ዛረ ግድያ አሮና ጻምአይ አጬዳዋ፥ ጉምቤዳዋ፥ ጪሼዳዋነ ጪሺደ ላዉዝያ ግያ ምꬃ አይፍያ አይፌዳዋ በኤዳ። እብራ. 9:4 9 ሄዋፐ ጉይያን፥ ሙሴ ጻምኣ ኡባ መꬍና ጎዳ ስንꬃፐ እስራኤልያ አሳ ኡባኮ አሄዳ። አሳይ ኡንቱንታ በኤዳዋፐ ጉይያን፥ ካፓቱ ባረንቱ ጻምኣ ጻምኣ አኬድኖ። 10 መꬍና ጎዳይ ሙሳ፥ “አሮና ጻምኣ ታቦታ ስንꬃን ዛራ ዎꬃ። ሄዋ ማካሌዳዋንቱ ታ ቦላ ላኤንꬆ ዙዙሚደ ሀይቀናዳን፥ ኡንቱንቶ ማላታ ኦꬃደ ናጋ” ያጌዳ። 11 መꬍና ጎዳይ አዛዜዳዋዳን ሙሴ ኦꬄዳ።

12 እስራኤልያ አሳይ ሙሳ፥ “ኑን ሀይቃና፤ ꬋያና፤ ኑን ኡባይካ ꬋያና! 13 መꬍና ጎዳ ዱንካንያኮ፥ ሀራይ አቶ ማታ ሺቅያ ኡራይ ኦንነ ሀይቃና። ስም ኑን ኡባይካ ሀይቄቶ?” ያጌድኖ።