1 ኮይሮ አግናን እስራኤላቱ ኡባይ ጺና ግያ መላ ቢታ ጋኪደ፥ ቃዴሳ ግያ ሳን ዱንካኔድኖ። ሄዋን ሚርያማ ሀይቃደ ሞገታዱ።

2 ሄዋን አሳዉ ሃꬃይ ꬋይና፥ አሳይ ሺቂደ፥ ሙሴ ቦላነ አሮና ቦላ ደንዴዳ። 3 ኡንቱንቱ፥ “ኑ እሻቱ መꬍና ጎዳ ስንꬃን ሀይቄዳ ዎደ፥ ኑንካ ሀይቄዳዋ ግዴሮኮሻ! 4 ኑንነ ኑ መሂ ሀ መላ ቢታን ሀይቃናዳን፥ መꬍና ጎዳ አሳ ሀዋ ህንተ አያዉ አሄድቴ? 5 ሀ ዎልቃማ ሳኣ ኑና ግብጼፐ ፑደ አያዉ አሄድቴ? ሀዋን ካꬃ አይፊ፥ ዎይ ባላስያ፥ ዎይ ዎይንያ አይፊ፥ ዎይ ሮማኒ ባዋ፤ ቃይ ኡሽያ ሃꬃይካ ሀዋን ባዋ” ያጊደ ሙሴና ዋላቀቴድኖ።

6 ያትና ሙሴነ አሮን አሳ ማታፐ ጋከትያ ዱንካንያ ፐንገ ቢደ ጉፋኔድኖ፤ መꬍና ጎዳ ቦንቹ ኡንቱንቶ ቆንጬዳ። 7 መꬍና ጎዳይ ሙሳ፥ 8 “ነ ጋትማ አካ፤ ኔንነ ነ እሻ አሮን ሺቁዋ ሺሽተ፤ ኡንቱንቱ ስንꬃን ዛላይ ሃꬃ ጎጋና ማላ ኦዳ። ዛላፐ ሃꬃ ህንተ ከሲደ፥ ሽቁዋነ ኡንቱንቱ መህያ ኡሻና” ያጌዳ። 9 መꬍና ጎዳይ አዛዜዳዋዳን፥ ሙሴ መꬍና ጎዳ ስንꬃፐ ጋትማ አኬዳ።

10 እነ አሮን ሺቁዋ ዛላ ስንꬃን ሺሼድኖ፤ ሙሴ ኡንቱንታ፥ “ህንተኖ ማካላንቻቶ፥ ስስተ፤ ሀ ዛላፐ ሃꬃ ህንተንቶ ኑን ቱሙ ከሳኔ?” ያጌዳ። 11 ሙሴ ባረ ኩሽያ ꬎቁ ኦꬂደ፥ ባረ ጋትማን ላኡ ገደ ዛላ ሾጭና፥ ሃꬃይ ꬉቂደ ከስና ያአይነ ኡንቱንቱ መሂ ኡሼዳ።

12 ሽን መꬍና ጎዳይ ሙሳነ አሮና፥ “እስራኤልያ አሳ ስንꬃን ህንተ ታ ጌሻተꬃ በሳናዉ አማነትቤና ድራዉ፥ ታን ኡንቱንቶ እምያ ቢታ ሀ አሳ ህንተ ገልስክታ” ያጌዳ።

13 እስራኤልያ አሳይ መꬍና ጎዳና ዋላቀቶዌ እ ባረ ጌሻተꬃ ኡንቱንቱ ግዶን ቆንጭሴዳሳይ ሀ ማሪባ *ማሪባ፦ ሀ ሱንꬃ ብለꬃይ እብራዌꬁዋን፥ “ፓሉመቴዳ” ግያዋ። ሃꬃና።

14 ሙሴ ቃዴሳፐ ኤዶማ ቢታ ካትያኮ፥ ባረ ኪተትያዋንታ ሀዋዳን ያጊደ ኪቴዳ፤ “ነ ዳቦ ግድያ እስራኤልያ አሳይ ሀዋዳን ያጌ፤ ‘ኑና ጋኬዳ መቱዋ ኡባ ኔን ኤራሳ። 15 ኑ ማይዛ አዎቱ ዱገ ግብጼ ዎꬌድኖ፤ ያን ኑን ዳሮ ላይꬃ ደኤዶ። ግብጼቱ ኑናነ ኑ አዎቱዋ ኡቅኔድኖ። 16 ኑን መꬍና ጎዳዉ ዋስና፥ ኑ ዋሱዋ ስሲደ፥ ኪታንቻ ኪቲደ፥ ኑና ግብጼፐ ከሴዳ። ሀእ ኑን ነ ቢታ ጋጻን ደእያ ቃዴሳ ካታማን ደኤቶ። 17 ሀያና፥ ኑና ነ ቢታና አꬃርኪ! ኑን አይ ጋደ ግዶፐካ ዎይ ዎይንያ ቱራ ግዶፐካ ቦቾኮ! ቃይ ኑን አይ ሃꬃ ኦላፐነ ሃꬃ ኡሾኮ። ኑን ካትያ ኦግያ ኦይቂደ ባና፤ ኑን ነ ቢታና አꬋና ጋካናዉ፥ ሀድርሳ ዎይ ኡሸቻ ጎኮ’ ያጌ” ያጌዳ።

18 ሽን ኤዶማ ካቲ፥ “ኑ ቢታና አꬅከ፤ ህንተ ሀዋና መንꬃና ካጄሎፐ፥ ኑን ደንዲደ ህንተና ማሻን ኦላና” ያጌድኖ።

19 እስራኤላቱ አ፥ “ኑን ካትያ ኦግያና ባና፤ ኑን ዎይ ኑ መሂ ህንተ ሃꬃ ኡሾፐ፥ ኑን ሄዎ ጋትያ ጭጋና። ኑን ገድያን አꬃ ጻላላ ኮዬቶ፤ ሀራባ አያነ ኮዮኮ” ያጌድኖ።

20 ኤዶማ ካቲ ዛረꬂደ፥ “ህንተና አꬅከ” ያጌዳ። ሄዋፐ ጉይያን፥ ዳሮነ ዎልቃማ ኦላንቻቱዋ አኪደ፥ እስራኤልያ አሳና ኦላ ጋከታናዉ ከሴዳ። 21 ኤዶማቱ ባረንቱ ቢታና እስራኤልያ አሳይ አꬋናዉ ድጌዳ ድራዉ፥ እስራኤልያ አሳይ ስሚደ ሀራ ኦግያ ቤዳ።

22 እስራኤልያ አሳይ ኡባይ ቃዴሳፐ ደንዲደ፥ ሆራ ግያ ደርያ ቤድኖ። 23 ኤዶማ ዛዋ ማታን ደእያ ሆራ ደርያን፥ መꬍና ጎዳይ ሙሳነ አሮና፥ 24 “አሮን ሀይቂደ ባረ ማይዛን ጋከትያ ዎዲ ጋኬዳ። ማሪባ ሃꬃ ማታን ህንተ ላኡካ ታ አዛዙዋ ቦላ ማካሌዳ ድራዉ፥ እስራኤልያ አሳዉ ታን እምያ ቢታ እ ገለና። 25 አሮናነ አ ናኣ ኤልኣዛራ አካደ፥ ሆራ ደርያ አሀ። 26 አሮና ማዩዋ ቃራደ፥ አ ናኣ ኤልኣዛራ ማይዛ። አሮን ባረ ማይዛን ጋከታና፤ እ ያን ሀይቃና” ያጌዳ።

27 መꬍና ጎዳይ አዛዜዳዋዳን ሙሴ ኦꬄዳ፤ አሳይ ኡባይ ጼልሽን፥ ኡንቱንቱ ሆራ ደርያ ከሴድኖ። 28 ሙሴ አሮና ማዩዋ ቃሪደ፥ አ ናኣ ኤልኣዛራ ማይዜዳ። አሮን ሄ ደርያ ሁጲያን ሀይቄዳ። ሄዋፐ ጉይያን፥ ሙሴነ ኤልኣዛር ደርያፐ ዎꬌድኖ።ከሳ 29:29፤ ፓይ. 33:38፤ ዛረ. 10:6 29 አሮን ሀይቄዳዋ አሳይ ኡባይ ኤሬዳ ዎደ፥ እስራኤልያ አሳይ ኡባይ አሮናዉ ሀታሙ ጋላሳ ዬኬዳ።