1 ጻሎፍሃዳ ማጫ ናናይ ማህሎ፥ ኖኦ፥ ሆግሎ፥ ምልኮነ ትርጾ። ጻሎፍሃድ ሄፌራ ናኣ፤ ሄፌር ጋላኣደ ናኣ፤ ጋላኣደ ማክራ ናኣ፤ ማክር ምናሰ ናኣ፤ ምናሰ ዮሴፎ ናኣ። 2 ሀ ማጫ ናናይ ጋከትያ ዱንካንያ ፐንግያን ሙሴ ስንꬃን፥ ቄስያ ኤልኣዛራ ስንꬃን፥ ካፓቱ ስንꬃንነ ማባራ ኡባ ስንꬃን ኤቂደ፥ ሀዋዳን ያጌድኖ፤ 3 “ኑ አዉ ባዙዋን ሀይቄዳ፤ እ ባረ ናጋራን ሀይቄዳፐ አትና፥ መꬍና ጎዳ ቦላ ደንዴዳ ቆራሀ ካልያዋንቱ ግዶን ደኤና። አዉ አቱማ ናእ ባዋ። 4 አቱማ ናእ አዉ ባይናዋ ግዶፐነ፥ ኑ አዉዋ ሱንꬃይ አ ዳቦቱዋ ግዱዋፐ አያዉ ꬋዪ? ኑ አዉዋ እሻንቱ ግዶን ኑዉ ላትያ ቢታ እማ” ያጌድኖ።

5 ሙሴ ኡንቱንቱ ኦሻ መꬍና ጎዳ ስንꬃ ሺሼዳ። 6 መꬍና ጎዳይ ሙሳ፥ 7 “ጻሎፍሃዳ ማጫ ናናይ ኦቼዳዌ ልከ፤ ኡንቱንቱ አዉዋ እሻንቱ ግዶን ኔን ኡንቱንቶ ላትያ ቢታ እማ፤ አ ላታይ ኡንቱንታ ጋኮ። ፓይ. 36:2 8 ቃይ ኔን እስራኤላቱዋ ሀዋዳን ያጋ፤ ‘እት አሳይ አቱማ ናእ ባይናን ሀይቂያዋ ግዶፐ፥ አ ቢታ አ ማጫ ናእ ላቶ፤ 9 ማጫ ናእካ አዉ ባይናዋ ግዶፐ፥ አ ቢታ አ እሻቱ ላትኖ፤ 10 አዉ እሻቱ ባይናዋ ግዶፐ፥ አ አዉዋ እሻቱ ላትኖ፤ 11 አ አዉዋ እሻቱካ ባይናዋ ግዶፐ፥ አ ዛርያፐ ኡባፐ ማታትያ ዳቡዋ ላትሳ። ታን መꬍና ጎዳይ ኔና ሙሳ አዛዜዳዋዳን፥ ሀዌ እስራኤላቶ ህገ ግዶ’ ያጋ” ያጌዳ።

12 ሄዋፐ ጉይያን፥ መꬍና ጎዳይ ሙሳ፥ “ፑደ አባርማ ደረቱዋ ከሳደ፥ ታን እስራኤልያ አሳዉ እሜዳ ቢታ በአ። ዛረ. 3:23-27፤ 32:48-52 13 በኤዳዋፐ ጉይያን፥ ነ እሻ አሮነዳን ኔንካ ሀይቃደ፥ ነ ማይዛን ጋከታና። 14 አያዉ ጎፐ፥ ጺና ባዙዋን ደእያ ሃꬃን አሳይ ኡባይ ማካሌዳ ዎደ፥ ህንተ ላኡካ ኡንቱንቱ ስንꬃን ታና ጌሻዳን ቦንቻናዉ ታዉ አዛዘትበይክታ” ያጌዳ። ሄዌ ሃꬃይ ጺና መላ ቢታን፥ ቃዴሳን ደእያ ማሪባ ሃꬃ።

15 ሙሴ መꬍና ጎዳ ሀዋዳን ያጌዳ፤ 16-17 “አቤት መꬍና ጎዳዉ፥ አሳ ኡባዉ ደኡዋ እምያ ጾሳዉ፥ ነ አሳይ፥ ጾሳ አሳይ ሄንꬃንቻይ ባይና ዉድያ ማላ ግደናዳን፥ ሀ አሳ ስንꬃን ከስያነ ገልያ፥ ኡንቱንቱካ ካለꬂደ ከስያነ ገልስያ፥ እት አሳ ሀ ማባራ ቦላ ሱንꬃርኪ” ያጌዳ። ህዝ. 34:5፤ ማቶሳ 9:36፤ ማር. 6:34

18 መꬍና ጎዳይ ሙሳ፥ “አያናይ አን ደእያ ኔዌ ናኣ ኢያሳ አካደ፥ ነ ኩሽያ አ ቦላ ዎꬃ፤ከሳ 24:13 19 ያታደ ቄስያ ኤልኣዛራ ስንꬃንነ ማባራ ኡባ ስንꬃን ኤሳደ፥ ኡንቱንቱ በእሽን ሱንꬃ። 20 እስራኤላቱዋ ማባራ ኡባይ አዉ አዛዘታናዳን፥ ነ ማታፐ አዉ ሻካደ እማ። 21 ቄስያ ኤልኣዛራ ስንꬃን እ ኤቆ፤ ኤልኣዛር ኡሪምያን አዉ መꬍና ጎዳ ሸንያ ኦቾ። ኢያሱነ እስራኤልያ ማባራይ ኡባይ ኤልኣዛራ አዛዙዋን ከስኖነ አ አዛዙዋን ገልኖ” ያጌዳ። ከሳ 28:30፤ 1 ሳሜላ 14:41፤ 28:6

22 መꬍና ጎዳይ አዛዜዳዋዳን ሙሴ ኦꬄዳ፤ ኢያሳ አፊደ፥ ቄስያ ኤልኣዛራ ስንꬃንነ ማባራ ኡባ ስንꬃን ኤሴዳ። 23 መꬍና ጎዳይ ጾሳይ አዛዜዳዋዳን፥ ሙሴ ባረ ኩሽያ አ ቦላ ዎꬂደ፥ አ ሱንꬄዳ።ዛረ. 31:23