1 መꬍና ጎዳይ ሙሳ፥ 2 “እስራኤላቱዋ ሀዋዳን ያጋደ አዛዛ፤ ‘ታ ቁማ፥ ታና ቶሹኩ ጊደ ሳዋና ማላ፥ ታማን ያርሽያ ታ ያርሹዋ ኬሬዳ ዎድያን ዎድያን ታዉ ናጊደ እምተ’ ያጋ። 3 ቃይ ኔን ኡንቱንታ፥ ‘መꬍና ጎዳዉ ታማን ያርሽያ ያርሹ ሀዋ: ትላ ቦላና ደእያ፥ እት ላይꬃ ግዴዳ ላኡ ዶርሳ ኦርገቱዋ ሀች ሀች ጹግያ ያርሾ ያርሽተ፤ 4 ዶርሳ ኦርገቱዋፐ እቱዋ ዎንታ፥ ላኤንꬁዋ ኦማርስ ያርሽተ። 5 ቃይ ሄዋና እት ሊትሮ ግድያ ዛይትያን ሙናቀቴዳ እት ኪሎ ግራመ ሙሩታ ዛርጋ ꬊልያ ካꬃ ያርሾ ያርሽተ። 6 ሀዌ መꬍና ጎዳ ቶሹኩ ጊደ ሳዋና ማላ፥ ሲና ደርያ ቦላን አዛዘቴዳ፥ ሀች ሀች ታማን ጹግያ ያርሹዋ። 7 ሄዋና ያርሽያ ኡሻ ያርሹ እት ዶርሳ ኦርግያዉ እት ሊትሮ ግድያ ዎይንያ ኤሳ። ኡሻ ያርሹዋ ጌሻ ሳኣን መꬍና ጎዳዉ ጉስተ። 8 ኦማርስ ላኤንꬆ ዶርሳ ኦርግያ፥ ዎንታዋ ኦꬄዳዋዳን ኦꬂደ፥ ካꬃ ያርሹዋናነ ኡሻ ያርሹዋና መꬍና ጎዳ ቶሹኩ ጊደ ሳዋና ማላ፥ ታማን ያርሽተ።

9 “ ‘ሳምባታ ጋላሳን፥ ትላ ቦላና ደእያ እት ላይꬃ ግዴዳ ላኡ ዶርሳነ ዛይትያን ሙናቀቴዳ ላኡ ኪሎ ግራመ ግድያ ሙሩታ ꬊልያ ካꬃ ያርሹዋነ ኡሻ ያርሹዋ ኦꬂደ ያርሽተ። 10 ሀቼ ሀች ጹግያ ያርሹዋነ አ ኡሻ ያርሹዋ ቦላ፥ ሳምባታ ጋላሳ ኡባን ህንተ ያርሽያ ጹግያ ያርሹ ሀዋ።

11 “ ‘አግናይ ጼርያ ጋላሳ ኡባን፥ ላኡ ኮሩማቱዋ፥ እት ዶርሳ ኦርግያነ እት ላይꬃ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ጹግያ ያርሹዋ ኦꬂደ፥ መꬍና ጎዳዉ ያርሽተ። 12 እት እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ꬊልያ፥ እት ዶርሳ ኦርግያና ዛይትያን ሙናቀቴዳ ላኡ ኪሎ ግራመ ግድያ ሙሩታ ዛርጋ ꬊልያነ 13 ላፑን ዶርሳ ማራቱዋፐ እት እት ዶርሳ ማራና ዛይትያን ሙናቀቴዳ እት ኪሎ ግራመ ግድያ ሙሩታ ዛርጋ ꬊልያ ካꬃ ያርሹዋ ኦꬂደ፥ መꬍና ጎዳ ቶሹኩ ጊደ ሳዋና ማላ፥ ታማን ያርሽያ ያርሹዋ ያርሽተ። 14 ቃይ ኡሻ ያርሾ እት እት ኮሩማና ላኡ ሊትሮ ግድያ ዎይንያ ኤሳ፥ እት ዶርሳ ኦርግያና እት ሊትሮነ ባጋ ዎይንያ ኤሳነ እት እት ዶርሳ ማራና እት ሊትሮ ግድያ ዎይንያ ኤሳ ሺሽተ። ሀዌ ላይꬃ ግዶን አግናይ ጼርያ ጋላሳ ኡባን ያርሽያ ጹግያ ያርሹዋ። 15 ሀቼ ሀች ጹግያ ያርሹዋነ አ ኡሻ ያርሹዋ ቦላ፥ እት ዴሻ ኦርግያ ናጋራ ያርሹዋ ኦꬂደ፥ መꬍና ጎዳዉ ያርሽተ።

16 “ ‘ኮይሮ አግናን ታማነ ኦይደንꬆ ጋላሳይ መꬍና ጎዳ ፓስጋ ቦንችያ ጋላሳ ግዶ። ከሳ 12:1-13፤ ዛረ. 16:1-2 17 ቃይ ሄ አግናንካ ታማነ እቼሸንꬆ ጋላሳን ዶሚደ፥ ኡክꬃ ባላይ ቦንቼቴ፤ ሄዋ ድራዉ፥ ላፑን ጋላሳቱዋን እርሹ ገልቤና ኡክꬃ ሚተ። ከሳ 12:14-20፤ 23:15፤ 34:18፤ ዛረ. 16:3-8 18 ሄ ጋላሳቱዋፐ ኮይሮ ጋላሳን ጌሻ ሺቁዋ ሺቅተ፤ ዳቡርስያ ኦሶ አያነ ኦꬆፕተ። 19 ላኡ ኮሩማቱዋ፥ እት ዶርሳ ኦርግያነ እት ላይꬃ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ታማን ያርሽያ ያርሹዋ ኦꬂደ፥ መꬍና ጎዳዉ ያርሽተ። 20 ካꬃ ያርሾ እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ꬊልያ፥ እት ዶርሳ ኦርግያና ላኡ ኪሎ ግራመ ግድያ ꬊልያነ 21 ላፑን ዶርሳ ማራቱዋፐ እት እት ማራና እት ኪሎ ግራመ ꬊልያ ያርሽተ። 22 ቃይ እት ዴሻ ኦርግያ ናጋራ ያርሾ፥ ህንተ ናጋራ አቶ ጊሳናዉ ያርሽተ። 23-24 ሀቼ ሀች ዎንታ ጹግያ ያርሹዋነ አ ካꬃ ያርሹዋ ቦላ፥ ሳዉዋ ቶሹኩ ግያ ቁማ ታማን ያርሽያ ያርሹዋ ጉጂደ፥ መꬍና ጎዳዉ ያርሽተ። ላፑን ጋላሳዉ ሄዋዳን ኦꬅተ። 25 ላፑንꬃ ጋላሳን ቃይ ጌሻ ሺቁዋ ሺቅተ፤ ዳቡርስያ ኦሶ አያነ ኦꬆፕተ።

26 “ ‘ሳምንታቱ ባላ ጋላሳን ህንተ መꬍና ጎዳዉ ኦራꬃ ካꬃ ሺሽያ ዎደ፥ ጌሻ ሺቁዋ ሺቅተ፤ ዳቡርስያ ኦሶ አያነ ኦꬆፕተ።ከሳ 23:16፤ 34:22፤ ዛረ. 16:9-12 27 ላኡ ኮሩማቱዋ፥ እት ዶርሳ ኦርግያነ እት ላይꬃ ግዴዳ ላፑን ዶርሳ ኦርገቱዋ ሳዉዋ ቶሹኩ ግያ ጹግያ ያርሹዋ ኦꬂደ፥ መꬍና ጎዳዉ ያርሽተ። 28 እት እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ꬊልያ፥ እት ዶርሳ ኦርግያና ላኡ ኪሎ ግራመ ꬊልያነ 29 ላፑን ዶርሳ ማራቱዋፐ እት እት ማራና እት ኪሎ ግራመ ꬊልያ ካꬃ ያርሾ ያርሽተ። 30 ቃይ እት ዴሻ ኦርግያ ናጋራ አቶ ጊስያ ያርሹዋ ኦꬂደ ያርሽተ። 31 ሀቼ ሀች ጹግያ ያርሹዋነ አ ኡሻ ያርሹዋ ቦላ፥ ሀዋንታ ኡንቱንቱ ካꬃ ያርሹዋና ያርሽተ። መሄቱ ትላ ቦላና ደእያዋንታ ግድያዋ ጌሺደ ኤርተ።