1 ሮቤላ ዛረቶነ ጋዳ ዛረቶ ሎይꬅ ዳሮ መሂ ደኤ። ኡንቱንቱ ያእዜራ ቢታይነ ጋላኣደ ቢታይ መህያዉ እንጀ ግድያዋ በኤድኖ። 2 ኡንቱንቱ ሙሴኮ፥ ቄስያ ኤልኣዛራኮነ ማባራ ካፓቱዋኮ ዪደ፥ ኡንቱንታ ሀዋዳን ያጌድኖ፤ 3-4 “መꬍና ጎዳይ እስራኤልያ አሳን ጾንሴዳ ቢታቱ፥ አጻሮት፥ ድቦን፥ ያእዜር፥ ኒምር፥ ሀሰቦና፥ ኤልኣል፥ ሴብም፥ ናቦነ ባኦን መህያዉ እንጀ ቢታ፤ ኑዉ ህንተ ቆማቶ መሂ ደኤ። 5 ኑን ህንተና ናሸቼዳዋ ግዶፐ፥ ሀ ቢታቱ ኑ ህንተ ቆማቶ ላታ ጋደ ግዲደ እመትኖ። ኑና ዮርዳኖሳ ሻፋ ሄፍንꬃ ፕንꬆፕተ” ያጌድኖ።

6 ሙሴ ጋዳ ዛራቱዋነ ሮቤላ ዛራቱዋ ሀዋዳን ያጌዳ፤ “ሀራ እስራኤልያ አሳይ ኦላ ብያ ዎደ፥ ህንተ ሀዋን ኡቲቴ? 7 መꬍና ጎዳይ ኡንቱንቶ እሜዳ ቢታ እስራኤላቱ ፕነናዳን፥ ህንተ አያዉ ኡንቱንቱ ዎዛና ሹግሲቴ? 8 ቃዴሳ-ባርነፐ ሄ ቢታ ዎች ጼላናዉ ህንተ አዎቱዋ ታን የዴዳ ዎደ፥ ኡንቱንቱካ ሀዋዳን ኦꬄድኖ።ፓይ. 13:17-33 9 ዋኒደ ጎፐ፥ ኡንቱንቱ ኤሽኮላ ዛንጋራ ከሲደ፥ ሄ ቢታ ጼሌዳ ዎደ፥ እስራኤላቱ መꬍና ጎዳይ ኡንቱንቶ እሜዳ ቢታ ገለና ማላ፥ ኡንቱንቱ እስራኤላቱዋ ዎዛና ሹግሴድኖ። 10 መꬍና ጎዳይ ሄ ጋላስ ሀንቁዋ ኤጽ ከሲደ፥ ሀዋዳን ያጊደ ጫቄዳ፤ ፓይ. 14:26-35 11-12 ‘መꬍና ጎዳ ባረንቱ ኩመንꬃ ዎዛናፐ ካሌዳ ቀኒዝያ ይፉነ ናኣ ካሌባፐነ ኔዌ ናኣ ኢያሱፐ አትና፥ የለቶደፐ ላታሙ ላይꬃነ ሄዋፐ ቦላና ደእያ አቱማ አሳን ግብጼ ጋድያፐ ከሴዳዋንቱፐ እቱነ፥ ታን አብራሃማዉ፥ ይሳቃዉነ ያቆባዉ እማናዉ ጫቄዳ ቢታ በኤና። አያዉ ጎፐ፥ ኡንቱንቱ ታና ባረንቱ ኩመንꬃ ዎዛናፐ ካልበይክኖ’ ያጊደ ጫቄዳ። 13 መꬍና ጎዳ ሀንቁ እስራኤልያ ቦላ ኤጽ ከሴዳ፤ ያትና ጾሳ ስንꬃን ኢታ ኦꬄዳ ሄ የለታ ኡባይ ዉር ꬋያና ጋካናዉ፥ መላ ቢታን ኦይታሙ ላይꬃ እ ኡንቱንታ ቶይላዬዳ። 14 ህንተኖ፥ ናጋራንቻ የለታቶ፥ መꬍና ጎዳይ እስራኤልያ ቦላ ጉጅ ሀንቁዋ ኤጽ ከሳናዳን፥ ህንተ ህንተ አዎቱዋ ሳኣን ሀእ ኤቄድታ። 15 ህንተ መꬍና ጎዳ ካልያዋ አጊደ ዎራ ስሞፐ፥ እ ቃይካ ባረ አሳ መላ ቢታን አግ ባሻና። ያቲደ ህንተ ሀ አሳ ኡባ ꬋይሳና” ያጌዳ።

16 ኡንቱንቱ ሙሴ ማታ ዪደ፥ አ ሀዋዳን ያጌድኖ፤ “ኑን ሀዋን ኑ መሄቶ ድርሳ፥ ኑ ናናዉ ካታማቱዋ ኬጻና። 17 ሽን ኑን ኦላ ሚሻ ዳንጪደ፥ እስራኤልያ አሳ ኡንቱንቱ ሳኣ ጋꬃና ጋካናዉ ኦለታናዉ ባና። ሄዋ ኬሻን፥ ሀ ጋድያን ደእያ አሳቱዋፐ ናገታናዉ፥ ኑ ናናይነ ማጫ አሳይ ግምበቲደ ኡቴዳ ካታማቱዋን ደእኖ። 18 እስራኤላቱ ኡባይ ባረንቱ ላታ ላታ አካና ጋካናዉ፥ ኑን ኑ ጎለ ስሞኮ። 19 ኑን ኑ ላታ ዮርዳኖሳ ሻፋፐ ሀፍንꬃ አዋይ ዶልያ ባጋና ላቴዳ ድራዉ፥ ኑን ዮርዳኖሳፐ ሄፍንꬃ ባጋና፥ ያን ኡንቱንቱና ላታ ላቶኮ” ያጌድኖ።

20 ሙሴ ኡንቱንቱ፥ “ህንተ ሀዋ ኦꬆፐ፥ ህንተ መꬍና ጎዳ ስንꬃን ኦላ ባናዉ ጊጎፐነ 21 ህንተ ኦላንቻቱ ኡባይ ኦላ ሚሻ ዳንጪደ፥ መꬍና ጎዳይ ባረ ሞርከቱዋ ባረ ስንꬃፐ የደርሳና ጋካናዉ፥ ዮርዳኖሳ ሻፋ ጾሳ ስንꬃን ፕኖፐ፥ 22 መꬍና ጎዳይ ሄ ቢታ ጾኔዳዋፐ ጉይያን፥ ህንተ ስማናዉ ዳንዳዪታ። ያቶፐ፥ ህንተ ኦለታናዉ በስያ ኦላ መꬍና ጎዳዉነ እስራኤልያ አሳዉ ኦለቲደ ፖሌድታ ግያዋ። ቃይ ሄ ቢታይ መꬍና ጎዳ ስንꬃን ህንተንቶ ላታ ቢታ ግዳናዋ።

23 “ሽን ህንተ ሄዋዳን ኦናን እጾፐ፥ መꬍና ጎዳ ቦላ ናጋራ ኦꬂታ፤ ስም ህንተና ህንተ ናጋራይ ጋክያዋ ቱሙ ኤርተ። 24 ህንተ ህንተ ናናዉነ ማጫ አሳዉ ካታማቱዋ ኬጽተ፤ ህንተ ዶርሳ ዉድያዉካ ባሉዋ ጊግስተ፤ ሽን ህንተ ጌዳዋ አገናን ኦꬅተ” ያጌዳ።

25 ጋዳ ዛራቱነ ሮቤላ ዛራቱ ሙሳ፥ “ኑን ነ ቆማቱ ኔን ኑ ጎዳይ አዛዜዳዋዳን ኦꬃና። 26 ኑ ናናቱነ ኑ ማጫ አሳቱ፥ ኑ ዶርሳቱነ ኑ ሚዛቱ ሀዋን ጋላኣደ ካታማቱዋን ደእሽኖ። 27 ሽን ኑን ነ ቆማቱ፥ ኦላዉ ዳንጬዳ ኦላንቻቱ ኡባይ፥ ኔን ኑ ጎዳይ ግያዋዳን፥ ኦለታናዉ መꬍና ጎዳ ስንꬃን ዮርዳኖሳ ሻፋ ፕናና” ያጌድኖ።

28 ሄዋ ድራዉ፥ ሙሴ ቄስያ ኤልኣዛራ፥ ኔዌ ናኣ ኢያሳነ እስራኤልያ ዛራቱ ካፓቱዋ ኡንቱንቱዋ አዛዜዳ። ኢያሳ 1:12-15 29 ሙሴ ኡንቱንታ ሀዋዳን ያጌዳ፤ “ጋዳ ዛራቱነ ሮቤላ ዛራቱ ኡባይ ኦላ ሚሻ ዳንጪደ፥ መꬍና ጎዳ ስንꬃን ህንተናና ዮርዳኖሳ ሻፋ ፕኖፐነ ህንተ ሄ ቢታ ጾኖፐ፥ ሄዋፐ ጉይያን፥ ጋላኣደ ቢታ ህንተ ኡንቱንታ ላትስተ። 30 ሽን ኡንቱንቱ ኦላ ሚሻ ዳንጪደ፥ ህንተናና ፕነናን እጾፐ፥ ኡንቱንቱ ካናነ ቢታ ህንተናና ላትኖ” ያጌዳ።

31 ጋዳ ዛራቱነ ሮቤላ ዛራቱ ዛሪደ፥ “ኑን ነ ቆማቱ መꬍና ጎዳይ ጌዳዋ ኦꬃና። 32 ኦላ ሚሻ ዳንጪደ፥ መꬍና ጎዳ ስንꬃን ኑን ካናነ ቢታ ገላናዉ ፕናና፤ ሽን ኑን ላትያ ላታይ ዮርዳኖሳፐ ሀፍንꬃ ባጋና ግዳናዋ” ያጌድኖ።

33 ሄዋ ድራዉ፥ ሙሴ ጋዳ ዛረቶ፥ ሮቤላ ዛረቶነ ዮሴፎ ናኣ ምናሰ ዛራቱዋፐ ባጋዉ አሞረቱ ካትያ ስሆና ካዉተꬃነ ባሳነ ካትያ ኦጋ ካዉተꬃ፥ ኡንቱንቱ ዩሹዋን ደእያ ካታማቱዋና እሜዳ። 34 ጋዳ ዛራቱ ድቦና፥ አጻሮታ፥ አሮኤራ 35 አጽሮት-ሾፋና፥ ያእዜራ፥ ዮግባሀ፥ 36 ቤት-ኒምራነ ቤት-ሃራና ጌተትያ ግምቢያን ድረቴዳ ካታማቱዋ ዛረꬂደ ኬጼድኖ። ባረ ዶርሳቶካ ኡንቱንቱ ባሉዋ ጊግሴድኖ።

37 ሮቤላ ዛራቱካ ሀሰቦና፥ ኤልኣላ፥ ቅርያታይማነ፥ 38 ናባ፥ ባኣል-ማኦናነ (ሄ ካታማቱዋፐ እቱ እቱ ሱንꬃ ላሜድኖ) ሲብማ ጌተትያ ካታማቱዋ ዛረꬅ ኬጼድኖ።

39 ምናሰ ናኣ ማክራ ያራቱ ጋላኣደ ቢደ፥ ኦላይ ኦይቂደ፥ ያን ደእያ አሞረቱዋ የደርሴድኖ። 40 ሄዋ ድራዉ፥ ምናሰ ናኣ ማክራ ያራቶ ሙሴ ጋላኣደ ቢታ እምና፥ ኡንቱንቱ ያን ደኤድኖ። 41 ምናሰ ዛረ ግድያ ያኢር ቢደ፥ ኡንቱንቱ ኦላይ ኦይቂደ፥ ሀቦት-ያኢራ ካታማቱዋ ያጊደ ሱንꬄዳ። 42 ኖባህ ቢደ፥ ቃናታ ካታማነ አ ዩሹዋን ደእያ ሄራቱዋ ኦላን ኦይቂደ፥ ባረ ሱንꬃን ኖባሀ ጊደ ጼሴዳ።