ሌምሱዋ ማጻፋ
ገሉዋ
ሌምሱዋ ማጻፋይ ሂላ ሃሳያንነ ሌምሱዋ ሃሳያን ጊጌዳ ኦሱዋነ አማኑዋ ትምርትያ። እ ዳሮ ባጋ አሳ ደኡዋን ሀች ሀች ጋከትያ ሀኖቱዋባ ኦዴ። ኮይሮ ዶሚደካ፥ “አꬌዳ ኤራተꬃዉ ዶመꬃይ ጾሳዉ ያይያዋ” ያግ ሀሳይሲደ ዶሜ። እ ታማርስያዌ አማኑዋ ዎጋን አሳይ ኦꬃናባ ጻላላ ግደናን፥ አሳይ ባረ ሀች ሀች ደኡዋን ሀናናዉ በስያ ሎኦ ኤሻነ ኦꬃናዉ በስያ ሎኦ ኦሱዋ ጉጂደ ታማርሴ። ሀ ማጻፋ ግዶን አሽከተꬃባን፥ አሳዉ ቃረትያዋንነ አማነትያዋን ዳሮ ትምርቲ ሌምሱዋን እመቴዳ።
ሸምፓቱዋ ኡባቶ እመቴዳ ቃንꬃ ቆፋቱዋ
ሌምሳቱዋ ዎቲደ ጎኤታነንቶ 1:1-7
አꬌዳ ኤራተꬃ ኮያናዳን እመቴዳ ማቁዋ 1:8—7:27
አꬌዳ ኤራተꬃ ሳቢደ ኦደቴዳ ማዝሙርያ 8:1—9:18
ሶሎሞና ሌምሳቱዋ 10:1—29:27
አጉራ ሃሳያ 30:1-33
ሊሙኤላ ዳያ ባረ ናኣ ታማርሴዳ ትምርትያ 31:1-31
1
ሌምሳቱዋ ዎት ጎኤታነንቶ
(1:1-7)
1 ሀዋንቱ እስራኤልያ ካትያ ዳዊታ ናኣ ሶሎሞና ሌምሳቱዋ። 1 ካታ. 4:32 2 ሌምሶቱ አሳይ አꬌዳ ኤራተꬃ፥ ሴራነ ኤራ ሃሳያ አኬካናዉ ማዲኖ። 3 ኡንቱንቱ አꬌዳ ኤራተꬃን፥ ደአና ደኡዋ፥ ጽሎተꬃ፥ ሱረ ፕርዳነ ሱረተꬃ ታማርስያዋንታ፥ 4 ቦዛቶ አኬካ፥ ዎዳላቶ ኤራተꬃነ ዎዛናማተꬃ እምያዋንታ። 5 አꬌዳ ኤራንቻቱ ሀ ሌምሳቱዋ ስሲደ፥ ኤራ ጉጂኖ፤ አኬካንቻ አሳቱካ ሎኦ ዞርያ አኪኖ። 6 ሄዋዳን ሌምሳቱዋነ ኡንቱንቱ ብለꬃ፥ አꬌዳ ኤራንቻቱዋ ሃሳያነ ኡንቱንቱ ቃንእሸቱዋ አኬካናዉ ዳንዳየቴ።
7 አꬌዳ ኤራተꬃዉ ዶመꬃይ መꬍና ጎዳዉ ያይያዋ፤ ሽን ቦዛቱ አꬌዳ ኤራተꬃነ ሴራ ካꬊኖ።ኢዮባ 28:28፤ ማዝ. 111:10፤ ሌም. 9:10
አꬌዳ ኤራተꬃ ኮያናዳን እመቴዳ ዞርያ
(ሌም. 1:1—7:27)
8 ታ ናአዉ፥ ነ አቡ ዞርያ ስሳ፤ ነ ዳያ ታማርስያዋካ ዶጎፓ። 9 ሄዌ ነ ሁጲያዉ ቦንቾ ካላቻ፤ ነ ቆꬍያዉካ ሀብልያ ግዳናዋ።
10 ታ ናአዉ፥ ኔና ናጋራንቻቱ ባለꬆፐ፥ ኤኖ ጎፓ። 11 ኡንቱንቱ ኔና፥ “ኑናና ደንዳ፤ አሳ ዎꬋናዉ ቆሰቲደ ናጎይተ፤ ጋሱ ꬋዮፐነ ጽሎቱዋ ዎꬋናዉ ቆሰት ኡቶይተ፤ 12 ስኦሊ ምትያዋዳን፥ ኑንካ ኡንቱንታ ፓጻ ደእሺና ምቶይተ፤ ኑን ኡንቱንታ ጪሞ ኦላን ኦልያ አሳቱዋዳን ኦꬃና። 13 ኑን አልኦ ሚሻ ኡባ ደማና፤ ኑ ጎልያካ ኦሞዱዋን ኩንꬃና፤ 14 ኑናና ዙፐቱዋን፤ ደሜዳዋካ እትፐ ግሸታና” ያጋና።
15 ታ ናአዉ፥ ኡንቱንቱና ኦግያ ሀመቶፓ፤ ነ ገድያ ኡንቱንቱ ሎሱዋ የꬍሶፓ። 16 አያዉ ጎፐ፥ ኡንቱንቱ ኢታባ ኦꬃናዉ ዎጺኖ፤ አሳ ሱꬃ ጉሳናዉ ኤሌሊኖ። 17 ካፉ ጼልሽን፥ አ ኦይቃናዉ ዳባ የግያዌ አይነ ማደና። 18 ሽን ኡንቱንቱ ባረንቱ ሱꬃ ጉሳናዉ ባረንቶ ዎጽማድያ ምጪኖ፤ ባረንቱ ሸምፑዋ ዎꬋናዉ ቆሰት ኡቲኖ። 19 ቦንቂያን ጎኣ ደምያ ኡባቱዋ ዉርሰꬃይ ሄዋ ማላ፤ ሄዌ እዛዉ ሸምፑዋ አኬ።
አꬌዳ ኤራተꬃ እጾፐ ኔና ኤራ!
20 አꬌዳ ኤራተꬃታ ኦግያን ጼሳዉ፤ ጉታራን ባረ ቃላ ꬎቁ ኦꬃደ ስሳዉ። ሌም. 8:1-3 21 አꬌዳ ኤራተꬃታ አሳይ ሺቅያ ሳኣን ኤቃደ ጼሳዉ፤ ካታማ ገልያ ፐንግያን ኤቃደ፥
22 “ህንተኖ፥ አኬካይ ፓጬዳዋንቶ፥ ህንተ አኬካ ፓጫ አዉደ ጋካናዉ ዶሲቴ? ቅሊጭያዋንቶ፥ ቅሊጭያዋን አዉደ ጋካናዉ ናሸቲቴ? ቦዛቶ፥ ኤራተꬃ አዉደ ጋካናዉ እጺቴ? 23 ታ ሴራኮ ስሞፐ፤ ታን ታ ኤራ ህንተ ቦላ ጉሳና፤ ታ ቃላካ ህንተና ታማርሳና። 24 ታን ጼሴዳ ዎደ፥ ህንተ ኮየናን እጼድታ፤ ታን ኩሽያ ምጭናካ፥ ኦንነ አኬክቤና። 25 ታ ዞርያ ኡባ ካꬌድታ፤ ታ ሴራካ አክበይክታ። 26 ሄዋ ድራዉ፥ ህንተና መቱ ጋክያ ዎደ፥ ታን ህንተ ቦላ ሚጫና፤ ህንተና ባሻይ ጋክያ ዎደ፥ ታን ቅሊጫና። 27 ዳጋማይ ኡሹዋዳን ህንተ ቦላ ይያ ዎደ፥ መቱ ጎትያዳን ህንተ ቦላ ይያ ዎደ፥ ቱጋይነ ዋዪ ህንተ ቦላ ጋክያ ዎደ፥ ታን ህንተና ቅሊጫና።
28 “ሄ ዎደ ኡንቱንቱ ታና ጼሳና፤ ሽን ታን ኮይከ፤ ኡንቱንቱ ታና ምንሲደ ኮያና፤ ሽን ደምክኖ። 29 አያዉ ጎፐ፥ ኡንቱንቱ ኤራተꬃ እጼድኖ፤ መꬍና ጎዳዉ ያይያዋ ዶርበይክኖ። 30 ታ ዞርያ አክበይክኖ፤ ታ ሴራ ኡባካ ካꬌድኖ። 31 ሄዋ ድራዉ፥ ኡንቱንቱ ባረንቱ ኦꬄዳ ኦሱዋ አይፍያ ማና፤ ባረንቱ ቆፔዳ ቆፋ አይፍያካ ካላና። 32 አኬካይ ፓጬዳዋንታ አꬌዳ ኤራተꬃፐ ሃክያዌ ዎꬌ፤ ቦዛቱዋ ሸነኮ ግያዌ ꬋይሴ። 33 ሽን ታን ኦድያዋ ስስያዋንቱ ኡባይ ዎፑ ጊደ፥ ሳሮ ደአና፤ መቱዋ ህርጋፐካ ሸምፓና” ያጋዉ።