1 ታ ናአዉ፥ ኔን ታ ግያዋ አኮፐ፥ ታ አዛዙዋካ ነ ግዶን ምንጆፐ፥ 2 አꬌዳ ኤራተꬃ ሀይዞፐ፥ ነ ዎዛናፐ አኬኮፐ፥ 3 ኤራተꬃ ጼሶፐ፥ አኬካካ ꬎቁ ኦꬃደ ጼሳ። 4 አሳይ ብራ ዎይ ቆሴዳ ሚሻ ኮይያዋዳን፥ ኔን ኤራተꬃ ኮያ። 5 ሄ ዎደ ኔን መꬍና ጎዳዉ ያዬ ግያዌ አየንቶ አኬካና፤ ጾሳካ ሎይꬃደ ኤራና። 6 አያዉ ጎፐ፥ መꬍና ጎዳይ አꬌዳ ኤራተꬃ እሜ፤ አፐ ኤራተꬃይነ አኬካይ ቤቴ። 7 እ ሱረቶ ማድያ ዞርያ ምንጄ፤ ቶሺ ባይናን ሀመትያዋንቶካ እ ጎንዳልያ። 8 ቱሙዋ ፕርዳ ኦግያ ናጌ፤ ባረዉ አማነትያዋንቱ ኦግያካ ናጌ።

9 ሄ ዎደ ኔን ጽሎተꬃ፥ ሱረ ፕርዳ፥ ሱረተꬃነ ሎኦ ኦሱዋ ኡባ ኤራና። 10 አያዉ ጎፐ፥ አꬌዳ ኤራተꬃይ ነ ዎዛና ገላና፤ ኤራተꬃይካ ነ ሸምፖ ናሸቻ ግዳና። 11 ኔና አዱስ ቆፕያዌ ናጋና፤ አኬካይካ ኔና ናጋና። 12 አꬌዳ ኤራተꬃይ ኔና ኢታ አሳቱዋ ኦግያፐ ናጋና፤ ጌላባ ሃሳይያዋንቱፐ አሻና። 13 ኡንቱንቱ ናጋራ ꬉማን ደአናዉ፥ ጽሎተꬃ ኦግያ አጊኖ። 14 ኢታ ኦꬅያዋን ናሸቲኖ፤ ጌላባን ሀሹ ጊኖ። 15 ኡንቱንቱ ኦꬅያዌ ምርቀꬃ፤ ኡንቱንቱ ደኡካ ጌላ።

16 አꬌዳ ኤራተꬃይ ዎሹምያ ምሽራትፐነ ሸሌሽያ ቃላን ሃሳይያ ላገꬃትፐ ኔና አሻና። 17 እዛ ባረ ናአተꬃ አስና አጋዉ፤ ባረ ጾሳ ስንꬃን ጫቀቴዳ ጫቁዋካ ዶጋዉ። 18 እዝ ጎለ ብያዌ ሀይቃናዉ ብያዋ፤ እዝ ኦጊ ሀይቆ ካለꬄ። 19 ኢኮ ብያ ኦንካ ጉየ ስመና፤ ደኡዋ ኦግያካ ደመና። 20 ሄዋ አጋደ፥ ኔን ሎኦ አሳቱዋ ሌምሱዋ ካላ፤ ጽሎ አሳቱዋ ደኡዋካ ቁላ። 21 አያዉ ጎፐ፥ ሱረ አሳቱነ ቶሺ ባይና አሳቱ ቢታን ጋምኢደ ደአና። 22 ሽን ኢታቱ ቢታፐ ꬎቆለታና፤ አማንተናዋንቱካ ሾደቲደ ꬋያና።