1 ታ ናአዉ፥ ታን ኔና ታማርስያዋ ዶጎፓ፤ ታ አዛዞቱዋካ ነ ዎዛናን ዎꬃ። 2 አያዉ ጎፐ፥ ኡንቱንቱ ነ ላይꬃ አዱሳና፤ እሻሎ ደኡዋነ ሳሮተꬃ ነዉ ጉጃና። 3 አገና ሲቁነ ቱማተꬃይ ኔፐ ሃኮፕኖ፤ ኡንቱንታ ነ ቆꬍያን ቃቻ፤ ነ ዎዛናንካ ኡንቱንታ ጻፋ። 4 ያቶፐ፥ ኔን ጾሳነ አሳ ስንꬃን ሳበታናነ ናሸታና። ሉቃሳ 2:52

5 ነ ፖሎ ዎዛናን መꬍና ጎዳ አማነታ፤ ነ አኬካን ዘምፖፓ። 6 ኔን ኦꬅያ ኦሱዋ ኡባን አ ስንꬃያ፤ እ ኔና ሱረ ኦግያ ካለꬃና። 7 ኔና ነ ሁጲያን አꬌዳ ኤራንቻ ከሶፓ፤ መꬍና ጎዳዉ ያያ፤ ኢታፐካ ሃካ። ሮመ 12:16 8 ሄዌ ነ ቦላ ፓጻ ዎꬃና፤ ነ መቀꬃካ ምንሳና። 9 መꬍና ጎዳ ነ ዱረተꬃን ቦንቻ፤ ኮይሮ አይፌዳ ካꬃ ኡባፐካ ጼራ አዉ እምያዋን አ ቦንቻ። 10 ያቶፐ፥ ነ ዬሰቱዋን ካꬃይ ኩማና፤ ነ ባꬃካ አይፈ ዎይንያ ኤሳይ ኩሚደ ፓላሀና።

11 ታ ናአዉ፥ መꬍና ጎዳ ሴራ ካꬎፓ፤ እ ኔና ሴርያ ዎደካ ላንጮፓ። ኢዮባ 5:11እብራ. 12:5-6 12 አያዉ ጎፐ፥ አዉ ባረ ሲቅያ ናኣ ሴርያዋዳን፥ መꬍና ጎዳይ ባረ ዶስያ ኡራ ሴሬ። ሳፃ 3:19 13 አꬌዳ ኤራተꬃ ደምያ ኡራይ፥ አኬካካ ባረዋ ኦꬅያ ኡራይ አንጀቴዳዋ። 14 አያዉ ጎፐ፥ አፐ ደምያ ጎአይ ዎርቃፐነ ብራፐ ደምያ ጎኣፐ አꬌነ ኬኬ። 15 አꬌዳ ኤራተꬃይ እንቁዋፐ ሎይꬅ አልኤ፤ ኔን ደማናዉ አሞትያ ኡባይ አꬌዳ ኤራተꬃና ልከተና። 16 አꬌዳ ኤራተꬃይ ነ ላይꬃ አዱሴ፤ እ ነዉ ዱረተꬃነ ቦንቹዋ ጉጄ። 17 አ ኦገቱ ናሸችያ ኦገቱዋ፤ አ ሎሱዋ ኡባይካ ሳሩዋ። 18 እ ባረና ኦይቂያዋንቶ ደኡዋ ምꬃ፤ አ ምንስ ኦይቂያ ኡባቱካ አንጀቴዳዋንታ።

19 መꬍና ጎዳይ ባረ አꬌዳ ኤራተꬃን ሳኣ መꬌዳ፤ ባረ አኬካንካ ሳሎቱዋ ምንሴዳ። 20 አ ኤራተꬃን ሻፋቱ ጎጊኖ፤ ሻራቱዋፐካ እራይ ቡኬ።

21 ታ ናአዉ፥ ሎኦ አꬌዳ ኤራተꬃነ አዱስ ቆፕያዋ ናጋ፤ ኡንቱንቱ ኔፐ ሻከቶፕኖ። 22 ኡንቱንቱ ነዉ ደኡዋ ግዳና፤ ኡንቱንቱ ነዉ እሻሉዋነ ናሸቻ ደኡዋ እማና። 23 ሄ ዎደ ኔን ነ ኦግያን ህርግ ባይናን ሀመታና፤ ነ ገዲካ ꬉበተና። 24 ኔን ግሴዳ ዎደ፥ ያያካ፤ ግሳደካ ማልኦ ገምእሹዋ ገምእሻና። 25 አኬከናን ጋክያ ባሻዉ፥ ዎይ ኢታቱ ꬋይያ ꬋዮ ያያካ። 26 አያዉ ጎፐ፥ መꬍና ጎዳይ ነዉ አማነትያዋ ግዳና፤ ነ ገዲካ ጲርያን ኦይቀተናዳን፥ እ ኔና ናጋና።

27 ነዉ ዎልቃይ ደእሺና፥ መቶቴዳዎ ሎኦባ ኦꬅያዋ አጎፓ። 28 ሀእ ነዉ ደእሺና፥ ነ ሾሮ፥ “ስማደ ያ፤ ታን ነዉ ዎንት እማና” ያጎፓ። 29 ኔናን አማነቲደ፥ ነ ማታን ደእሺና፥ ነ ሾሩዋ ቦላ ኢታባ ኦꬃናዉ ቆፖፓ። 30 ኔና ናቂቤና አሳ፥ ጮ ሞቶፓ። 31 ሱገꬃ ኦꬅያ አሳቱዋ ቁሎፓ፤ ኡንቱንቱ ኢታ ኦሱዋካ ካሎፓ። 32 አያዉ ጎፐ፥ መꬍና ጎዳይ ኢታ ኦꬅያዋንታ እጼ፤ ሽን ሱረቱዋ እ ኡሎፐ ሲቄ። 33 መꬍና ጎዳ ሸቃይ ኢታ ኦꬅያዋንቱ ሶይና፤ ሽን አ አንጁ ሱረባ ሀንያዋንቱ ሶይና። 34 ኦቶረቲደ ቅሊጭያዋንታ ጾሳይካ ቅሊጬ፤ ሽን ባረንታ ካዉሽያዋንታ ናሼ። ያቆባ 4:6፤ 1 ጰጽ. 5:5 35 አꬌዳ ኤራንቻቱ ቦንቹዋ ደማና፤ ሽን ቦዛቱ ካዉሻና።