1 ታ ናቶ፥ ህንተ አቡ ዞርያ ስስተ፤ ሎይꬅ ሀይዝተ፤ ያቶፐ፥ ህንተ አኬካና። 2 ታን ህንተዉ ሎኦ ትምርትያ እምያ ድራዉ፥ ታ ትምርትያ አጎፕተ። 3 ታን ታ ሁጲያንካ ታ አቦ ናኣ፤ ታ አትዉካ አ ሲቅያ መጽ እት ናኣ። 4 ታ አቡ ታና ታማርሲደ፥ ሀዋዳን ያጌዳ፤ “ታን ኦድያዌ ነዉ ገሎ፤ ታ አዛዙዋ ናጋ፤ ያቶፐ፥ ኔን ፓጻ ደአና። 5 አꬌዳ ኤራተꬃነ አኬካ ደማ፤ ታን ነዉ ኦዴዳዋ ዶጎፓ፤ ታ ቃላፐ ከሶፓ። 6 አꬌዳ ኤራተꬃዉ ዞክያ ዛሮፓ፤ አያዉ ጎፐ፥ እ ኔና አሻና፤ አ ሲቃ፤ እ ኔና ናጋና። 7 አꬌዳ ኤራተꬃይ ኡባፐ አꬍያ ድራዉ፥ አꬌዳ ኤራተꬃ ደማ። አኬካይ ነ ደእያዋ ኡባ ዉርስ አኮፐካ አ ደማ። 8 ኔን አ ቦንቻ፤ እካ ኔና ꬎቁ ꬎቁ ኦꬃና፤ ኔን አ ኦይቆፐ፥ እ ኔና ቦንቻና። 9 እ ነ ሁጲያን ሳባ ካላቻ ዎꬃና፤ ቦንቾ ካላቻ እማና” ያጌዳ።

10 ታ ናአዉ፥ ስሳ፤ ታን ግያዋካ አካ፤ ነ ደኡዋ ላይꬃይካ አዱቃና። 11 ታን ኔና አꬌዳ ኤራተꬃ ኦግያ ካለꬃና፤ ሱረ ሎሱዋናካ አፋና። 12 ኔን ሀመትያ ዎደ፥ ነ ሀመትያሳን ꬉቢያዌ ደኤና፤ ዎጾፐካ ꬉበታካ። 13 ታማሬዳዋ ሀሳያ፥ የዶፓ፤ ትምርቲ ነዉ ደኡዋ ግዴዳ ድራዉ፥ ሎይꬃ ናጋ። 14 ናጋራንቻቱዋ ኦግያ የꬎፓ፤ ኢታ አሳቱዋ ኦግያንካ ሀመቶፓ፤ 15 አፐ ሃካ፤ አን ሀመቶፓ፤ አፐ ጉየ ስማ፤ ያታደ ነ ኦግያን ባ። 16 አያዉ ጎፐ፥ ኡንቱንቱ ኢታባ ኦꬃና ጋካናዉ፥ ገምእሻናዉ ዳንዳይክኖ፤ ኡንቱንቱ አሳ ꬉበናን ኡንቱንታ ገምእሹ አፈና። 17 ኡንቱንቱ ናጋራ ኡክꬃዳን ሚኖ፤ ሱገꬃ ኦሱዋካ ኡሻዳን ኡሺኖ።

18 ጽሎቱዋ ኦጊ ሴታ ጋላሳይ ጋካናዉ፥ ጉጅ ጉጅ ፖእያ ዎንታ ጻልቂያ ማላ። 19 ሽን ናጋራንቻቱዋ ኦጊ ꬍጵ ጎ ꬉማ ማላ፤ ኡንቱንቱ ዎት ꬉበትንቶካ ኤርክኖ።

20 ታ ናአዉ፥ ታን ኦድያዋ ስሳ፤ ታን ኦድያዋካ ሎይꬃደ ሀይዛ። 21 ታን ኦዴዳባቱ ነ አይፍያፐ ጌሞፕኖ፤ ኡንቱንታ ነ ዎዛናን ዎꬃ። 22 አያዉ ጎፐ፥ ኡንቱንታ ደምያ አሳዉ ኡባዉ ደኡዋ እሚኖ፤ ኡንቱንቱ ቦላዉካ ፓጻተꬃ እሚኖ። 23 ኡባባፐካ ነ ዎዛና ምንሳደ ናጋ፤ አያዉ ጎፐ፥ ደኡ አፐ ፑልቴ። 24 ነ ዶናፐ ገነ ሃሳያ ድጋ፤ ዎርዶ ሃሳያ ነ ዶናፐ ድጋ። 25 ስት ጋደ ስንꬃዉ ጼላ፤ ነ አይፊ ነ ስንꬃን ደእያዋ ትሽ ኦꬂደ ጼሎ። 26 ነ ገድያዉ ሀመትያ ኦግያ ሱርሳ፤ ሱረ ኦግያ ጻላላን ሀመታ። እብራ. 12:13 27 ሱረ ኦግያፐ ኡሸቻ ሀድርሳ ጎፓ፤ ነ ገዲ ኢታሳ ቤናዳን ናጋ።