1 ታ ናአዉ፥ ታ አꬌዳ ኤራተꬃ ሀይዛ፤ ነ ሀይꬃ ታ አኬካኮ የጋ። 2 ያቶፐ፥ አዱሳ ቆፋይ ነዉ ደአና፤ ነ ሃሳያይካ ነ ኤራተꬃ ቆንጭሳና።

3 ዎሹምያ ማጫ ምሽራት እንጻርሳፐ ኤሳ እልሉ ጾኬ፤ እ ሃሳያይ ኦይሳፐካ አꬍ ሹጌ። 4 ሽን እዛ ዉርሰꬃን ጎዳረ ኡꬃዳን ጫማዉ፤ ላኡ ባጋን ቃንጽያ ማሻዳን ቃንጽያኖ፤ 5 እ ገደቱ ሀይቁዋኮ ዱገ ቢኖ፤ እ ሀመታይ ስት ኦꬂደ፥ ዱፉዋ አፌ። 6 እዛ ደኡዋ ኦግያ ቆፑኩ፤ እ ኦገቱ ጌላ፤ ሽን ጌላ ግድያዋካ አ ኤሩኩ።

7 ታ ናቶ፥ ሀእካ ታን ኦድያዋ ስስተ፤ ታን ግያዋፐ ከሶፕተ። 8 ዎሹምያ ማጫ ምሽራት ሄራ ቦፕተ፤ እ ጎልያ ፐንግያኮ ሺቆፕተ። 9 ሄዌ ꬋዮፐ፥ ህንተ ህንተንቱ ቦንቹዋ ሀራቶ አꬂደ እማና። ህንተንቱ ህንተንቱ ያላጋተꬃን መቀꬅ ባይና አሳቱዋ ኩሽያን ሀይቃና። 10 ህንተንቱ ማጹዋ አላጋ አሳቱ አካና። ህንተ ዳቡሪደ ሺሼዳዌ ሀራ አሳዉ ግዳናዋ። 11 ዉርሰꬃን ህንተ አሹነ ህንተ አሳተꬃይ ግልቂና፥ ህንተ ኦላና። 12 ቃይ ሀዋዳን ያጋንታ፤ “ታን ትምርትያ አያዉ እጻድታሻ! ታ ዎዛናይካ ሴራ አያዉ ካꬌዴሻ! 13 ታን ታና ታማርስያዋንቱ ኦዴዳዋ አካበይከ፤ ታና ዞርያዋንቱ ዞርያካ ሀይዛበይከ። 14 ሄዋ ድራዉ፥ ታን አሳይ ሺቄዳ ሺቁዋን፥ አኬከናን ካዉሻናዉ ደአይ” ያጋና።

15 ነ ማቻትዉ አማነቴዳዋ ግዳ፤ እዝ ጻላላ ሲቃ። 16 ሀራ ማጫንፐ የለቴዳ ነ ናናቱ፥ ነዉ ሎኦባ ኦꬅክኖ። 17 ኡንቱንቱ ኔና ማዳናዉ ድጭኖ፤ አላጋ ግዶፕኖ።

18 ሄዋ ድራዉ ነ ማቻትና ናሸታ፤ ያላጋተꬃን ኔን አኬዳ ነ ማቻትፐ ናሸቻ ኮያ። 19 ሎእያ ጋራትዳንነ ናሸችያ ገንአቲዳን፥ እ ꬋንꬃይ ኡባ ዎደካ ኔና አሎ፤ ኡባ ዎደ እ ሲቁ ኔና ኦሞዶ። 20 ታ ናአዉ፥ ዎሹምያ ምሽራታ ኔና አያዉ ኦሞዳይ? ሀራ አሳ ማቻቶ አያዉ ቆማይ?

21 አያዉ ጎፐ፥ አሳይ ኦꬅያዋ ኡባ መꬍና ጎዳይ በኤ፤ እ ሀመትያ ሎሱዋ ኡባ ጼሌ። 22 ናጋራንቻ እ ኦꬄዳ ናጋራይ ኦይቄ። አ ናጋራ ግቲ አ ቃቼ። 23 እ ባረ ቦዛተꬃን ሀሌዳ፤ ባረ ሁጲያ ናግቤና ድራዉ ሀይቄዳ።