10
ፕርዳ ደማናዉ ሺቄዳ ዎሳ
1 አቤት መꬍና ጎዳዉ፥ አያዉ ሃካደ ኤቃይ?
መቱዋ ዎድያን አያዉ ኔን ጌማይ?
2 ባረ ኦቶሩዋን ኢታ አሳይ ህዬሳ ሻንካቴ።
ኡንቱንቱ ባረንቱ ፓላ ማቁዋን ባረንቶ ኦይቀትኖ።
3 ሄ ኢታይ ባረ ዎዛና ኢታ አሙዋን ጬቀቴ፤
ዮራንቻይ መꬍና ጎዳ ቦላ ኢታ ቃላ ሃሳዬነ ካዴ።
4 ኢታይ ባረ ኦቶሩዋን ጾሳ ኮየና፤
ባረ ቆፋ ኡባንካ ጾሳ አይነ ኮየና።
5 ኡባባይ አዉ ኡባ ዎደካ ኩሜ፤
እ ኦቶሩዋ ጴጻሌ።
ነ ህጊ አዉ ገለና፤
ባረ ሞርከቱዋ ቦላን እ ቅሊጬ።
6 ባረ ዎዛናን እ፥ “ታና አያይነ ቃና።
ታና ኡባካ መቱ ጋከና” ያጊደ ቆፔ።
7 አ ዶናን ሸቃይ፥
ዎርዱነ ማንደꬃይ ኩሜዳ። ሮመ 3:14
ባረ እንጻርሳን ገነባነ ኢታባ ሃሳያናዉ ኤሌሌ።
8 ሄራን ቆሰትያሳን እ ዙጊደ ኡቴ።
ባረ ዎꬍያዋ ዎꬋናዉ ቆሰት ናጊደ፥
ዎልቃይ ባይና አሽከቱዋ ጼሌ።
9 ባረ ቆሰትያሳን ጌሚደ፥
ህዬሳ ኦይቃናዉ ጋሙዋዳን ዙጌ።
እ ህዬሳ ኦይቂደ፥ ባረ ጲርያን ጎቺደ አፌ።
10 ያትና፥ ዎልቃይ ባይና ህዬሳይ ሾጨቴ፤
ንፕ ጌነ ሄ ምኑዋን ጾነቴ።
11 እ ባረ ዎዛናን፥ “ጾሳይ ታና ዶግ ክቼዳ።
ባረ ሶምኡዋ ታፐ ገንꬅ ክቼዳ፤
ኡባካ እ በኤና” ያጌ።
12 አቤት መꬍና ጎዳዉ፥ ደንዳ።
ጾሳዉ፥ ነ ኩሽያ ꬎቁ ኦꬃደ ደንꬃ፤
ህዬሳ ዶጎፓ።
13 ናጋራንቻ ኡራይ ባረ ዎዛናን፥
ጾሳ አያዉ ካꬊ?
ባረ ቆፋንካ፥ “ጾሳይ ታና ሙረና”
አያዉ ያጊ?
14 ሽን ጾሳዉ፥ ኔን ቱሙካ በኣሳ፤
መቱዋካ ዋይያካ ጼላሳ።
ኔን ኡባ ዎደ ኑና ማዳናዉ ጊጋ ኡታዳ።
ዪአቶ ኔን ማዱዋ።
ቆሄቴዳዌ ኔን ማዳናዳን ባረና ነዉ ሼꬌ።
15 ገንያዋንቱ ዎልቃ ኔን ዉርሳ፤
ኢታ አሳቱዋካ ሄዋዳ ኦꬃ።
ላኤንꬆ ኡንቱንቱ ግዶን ኢታተꬃይ ቤተና ማላ ኡንቱንታ ሙራ።
16 መꬍና ጎዳይ መꬍ መꬍናዉ ካተቲደ ደኤ፤
ሀራ ካዉተꬃቱ አ ቢታፐ ꬋያና።
17 አቤት መꬍና ጎዳዉ፥
ኔን ባረንታ ካዉሽያዋንቱ አሙዋ ስሳሳ።
ኔን ኡንቱንታ ምንꬃሳ።
18 ይአቶነ ኡንኤቴዳዋንቶ ቱሙዋ ፕርዳ፤
ሳኣን ደእያ አሳይ፥ ኡንቱንታ ያሽሰና ማላ፥
ኡንቱንቱ ዋሱዋ ስሳሳ።