18
ጾኑዋ ማዝሙርያ
ዛማረቱዋ ካፖ የጸቴዳ ዳዊታ ማዝሙርያ። መꬍና ጎዳይ አ ሞርክያፐነ ሳኦላ ኩሽያፐ አሼዳ ዎደ ዳዊ ተ መꬍና ጎዳዉ ሀ የꬃ የጼዳ
1 አቤት መꬍና ጎዳዉ፥
ታ ዎልቃዉ፥ ታን ኔና ሲቃይ።
2 መꬍና ጎዳይ ታዉ ዎጋ ዛላ፤
ታን ኦላፐ ናገትያ ሚጻ፤
እ ታና አሽያዋ።
ታ ጾሳይ ታን አኮ ባቃትያ ታ ዎጋ ዛላ።
እ ታ ጎንዳልያ፤ እ ታና አሽያ ዎልቃ፤
እ ታን ቆሰታ አትያ ሳኣ።
3 ጋላታይ በስያ መꬍና ጎዳ ታን ጼሳይ፤
እ ታ ሞርከቱዋፐ ታና አሼ።
4 ሀይቁዋ ዎዶሩ ታና ቃቼዳ፤
ባሻይ ድኡዋዳን ታና ዳጋንꬄዳ።
5 ዱፉዋ ዎዶሩ ታና ቃቼዳ፤
ሀይቁ ጲርያዳን ታና ኦይቄዳ።
6 ታና መቱ ኢስና፥ መꬍና ጎዳ ጼሳድ፤
“ታና ማዳ” ጋደ ታ ጾሳዉ ዋሳድ።
እ ባረ ጌሻ ሳኣን ታ ኮሻ ስሴዳ፤
ታን ዋሴዳ ዋሱ አ ሀይꬃን ዎꬌዳ።
7 ዎꬍና ጾሳይ ሀንቀቴዳ ድራዉ፥
ቢታይ ዪቂዪቂደ ቃጼዳ፤
ደረቱዋ ጻጱ ጋጅ ጋጂደ ኮኮሬዳ።
8 አ ሲꬍያፐ ሀንቁዋ ጩዋይ ጩዋቴዳ፤
አ ዶናፐ ምያ ታማ ላጩነ ጹግያ ቦንቁ ከሴዳ።
9 ሳሉዋ እ ጳልቂደ፥ ዱገ ዎꬌዳ፤
ሄ ዎደ አ ገድያፐ ጋርሳና ስቅመቴዳ ሻሪ ደኤ።
10 ቀፍያና ደእያ ኪታንቻ ክሩብያን ኡቲደ ፓሌዳ፤
ጫርኩዋ ቀፍያ አኪደ ኤሌሌዳ።
11 ባረና ꬉማን ካሜዳ፤
አ ዱንካኒ እራና ስቅመቴዳ ሻርያ።
12 አ ስንꬃን ደእያ ዎልቃማ ፖኡዋፐ
ሻቻይነ ታማ ላጩ ከሴዳ፤
ከሲደ ስቅመቴዳ ሻርያ አꬊደ ቤዳ።
13 ቃይ መꬍና ጎዳይ ጉጉንꬃዳን ሳሉዋፐ ጉሜዳ፤
ኡባፐ ꬎቂያ ጾሳይ ዋልቃንꬃንነ ታማ ላጩዋን ቆንጬዳ።
14 ባረ ዎንዳፍያ ጩብያ የዲደ፥
ባረ ሞርከቱዋ ላሌዳ፤
ዋልቃንꬃ ፖኡዋ ኪቲደ፥ ኡንቱንታ የደርሴዳ።
15 አቤት መꬍና ጎዳዉ፥ ኔን ሴሬዳ ዎደነ፥
ሀንቀታደ ፔኑቄዳ ዎደ፥
አባ ሃꬃይ ግሴዳ ቢታይ ቤቴዳ።
ቃይ ሳኣ ባሱካ ቆንጬዳ።
16 ጾሳይ ቦላፐ ኩሽያ ዱገ የዲደ፥
ታና ኦይቄዳ፤
ጪሞ ሃꬃፐ ታና ከሴዳ።
17 እ ታና ታ ዎልቃማ ሞርክያፐነ፥
ታና እጽያዋንቱፐ አሼዳ።
አያዉ ጎፐ፥ ኡንቱንቱ ታዉ ሎይꬅ ዳሮ ዎልቃማ።
18 ታ ዋይያ ጋላስ ኡንቱንቱ ታ ቦላ ደንዴድኖ፤
ሽን መꬍና ጎዳይ ታና ዘምፕስያዋ።
19 እ ታና አኮ ሳኣ ከሴዳ፤
ታናን ናሸቴዳ ድራዉ፥ ታና አሼዳ።
20 ታ ጽሎተꬃዳን መꬍና ጎዳይ ታዉ ጭጌዳ፤
ታ ኩሽያ ጌሻተꬃዳን እ ታዉ ዛሬዳ።
21 ታን መꬍና ጎዳ ኦግያ ካላድ፤
ታን ታ ጾሳ አጋደ ዎራ ባበይከ።
22 ታን አ ህግያ ኡባ ናጋድ፤
አ ዎጋ ፖልያዋ አጋበይከ።
23 ታን አ ስንꬃን ሱረ ደኣድ፤
ታን ታና ናጋራፐ ናጋድ።
24 ሄዋ ድራዉ፥ መꬍና ጎዳይ ታዉ ታ ጽሎተꬃዳንነ
ታ ኩሺ አ ስንꬃን ጌሻ ግድያዋዳን ዛሬዳ።
25 አቤት ጾሳዉ፥ አማነትያዋንቶ ኔን አማነትያዋ፤
ሱረቶ ኔንካ ሱረ።
26 ጌሻቶ ኔንካ ጌሻ፤
ሽን ጌላቶ ኔን ጭንጫ።
27 ባረንታ ሆክስያዋንታ አሻሳ፤
ሽን ባረንታ ꬎቂስያዋንታ ኔን ዝቂሳሳ።
28 አቤት መꬍና ጎዳዉ፥ ኔን ታ ጾምፕያ ፖእሳሳ፤
ታ ጾሳይ ፖእስና፥ ታ ꬉማይ ክቼ።
29 ነ ማዱዋን ታን ታ ሞርከ ዎታዳራቱዋ ኦላይ፤
ታ ጾሳን ታን ኡንቱንቱ ሚጻ ጼራና ጉፓ አꬋይ።
30 ጾሳ ኦጊ ሱረ።
መꬍና ጎዳ ቃላይ ጌሻ።
አኮ ባቃትያ ኡባቶ እ ጎንዳለ።
31 ጾሳፐ አትና፥ ሀራ መꬍና ጎዳይ ባዋ፤
ኑ ጾሳፐ አትና፥ ሀራ ዎጋ ዛል ባዋ።
32 ታዉ ዎልቃ እምያዌነ
ታ ኦግያ ሳሮ ኦꬅያዌ ጾሳተኔ።
33 እ ታ ገድያ ገንእያ ገድያዳን ምንሴ፤ እምባ. 3:19
ታና ꬎቃ ሳአቱዋን ሳሮተꬃን ዎꬄ።
34 እ ታ ኩሽያ ኦላ ሜዘዬ፤
ሄዋ ድራዉ፥ ታን ታ ቀስያን
ናስያ ግያ ብራታ ዎንዳፍያ ዳፋደ ዱካይ።
35 ታና አሽያ ነ ጎንዳልያ ኔን ታዉ እማዳ።
ነ ኡሸቻ ኩሺ ታና ዘምፕሴ፤
ነ ሎኦ ኦይꬃይ ታና ꬎቂሴ።
36 ታ ሀመትያሳ አሳሳ፤
ሄዋ ድራዉ፥ ታ ገዲ ሀልጽቤና።
37 ታ ሞርከቱዋ ታን የደርሳ ኦይቃድ፤
ታን ኡንቱንታ ꬋይሰናን ደኣደ ጉየ ስማበይከ።
38 ታን ኡንቱንታ ላኤንꬆ ደንደናዳን ሾጫድ፤
ኡንቱንቱ ታ ገድያን ኩንዴድኖ።
39 ኦላዉ ታና ዎልቃ ዳንጭሳዳ፤
ታናና ጋዳትያዋንታ ታዉ ጉልባትሳዳ።
40 ታ ሞርከቱዋ ታ ስንꬃፐ ጉየ ባቃትሳዳ፤
ታና እጽያዋንታ ታን ꬋይሳድ።
41 ባረንታ ማዳና ማላ ዋሴድኖ፥
ሽን ኦንነ ኡንቱንታ አሽቤና።
መꬍና ጎዳካ ኡንቱንቱ ጼሴድኖ፥
ሽን እ ኡንቱንቶ ኮይቤና።
42 ጫርኩ ፕቲደ አፍያ ባናዳን ታን ኡንቱንታ ሊቅሳድ፤
ኦግያን ደእያ ኡርቃዳንካ ኡንቱንታ የꬋድ።
43 ማካላ አሳፐ ታና አሻዳ።
ታና ካዉተꬃቱዋ ቦላን ሱንꬃዳ፤
ታን ኤረና አሳይ ታዉ ሞደቴዳ።
44 ኡንቱንቱ ታ ዎርያ ስሲደ፥ ታዉ አዛዘቲኖ፤
አላጋ ደረ አሳይካ ታ ስንꬃን ሆኪኖ።
45 ኡንቱንቱ ዎዛና ካሃ አጊኖ።
ባረንቱ ናገትያ ሚጻፐ ኮኮሪደ ዪኖ።
46 መꬍና ጎዳይ ደኤ!
ጾሳይ፥ ታ ዎጋ ዛላይ ጋላተቶ!
ታና አሽያ ጾሳይ ꬎቁ ꬎቁ ጎ!
47 እ ታ ሀሉዋ ከስያ ጾሳ፤
ካዉተꬃቱዋ ታፐ ጋርሳና ሞድስያዋ፤
48 ታ ሞርከቱዋፐ ታና አሽያዋ።
አቤት ጾሳዉ፥ ኔን ታናና ጋዳትያዋንቱ ቦላን
ታና ꬎቁ ꬎቁ ኦꬃሳ፤
ማካላንቻ አሳቱዋፐ ኔን ታና አሻሳ።
49 ሄዋ ድራዉ፥ ታን ኔና ካዉተꬃቱዋ ግዶን ጋላታና፤ ሮመ 15:9
ታን መꬍና ጎዳ ሱንꬃ ሳባና።
50 ጾሳይ ባረ ካትያዉ ጾኑዋ ቦላን ጾኑዋ እሜ።
ባረ ኦኬዳ፥ ዳዊተዉነ አ ዘረꬃዉ፥
ሎኦተꬃ መꬍናዉ በሴ።