34
ጾሳይ ፕርድያዋ ግዶዎ ሳቡሳ
ባረና የደርሴዳ አብመሌካ ስንꬃፐ ጎይያዋ ማላቲደ ቤዳ ዎደ፥ ዳዊታ ማዛሙርያ
1 ታን መꬍና ጎዳ ኡባ ዎደ ጋላታና፤
አ ጋላታይ አይ ዎደነ ታ ዶናፐ ፓጨና።
2 ታን መꬍና ጎዳን ጬቀታይ፤
ናቀቴዳዋንቱ ሄዋ ስሲደ ናሸትኖ።
3 ታናና ግዲደ፥ መꬍና ጎዳ ግታይተ።
አነ እትፐ አ ሱንꬃ ꬎቁ ꬎቁ ኦꬆይተ።
4 ታን መꬍና ጎዳ ኮያድ፤
እ ታዉ ዛሬዳ፤
ታን ያይያዋ ኡባፐ ታና እ አሼዳ።
5 ኔኮ ጼልያዋንቱ ናሸቲኖ፤
ኡንቱንቱ ሶምኢ ኡባካ ዬላተና።
6 ሀ ህዬሳ ብታኒ ዋሴዳ፤
መꬍና ጎዳይ አ ዋሱዋ ስሴዳ፤
አ መቱዋ ኡባፐ አ አሼዳ።
7 መꬍና ጎዳ ኪታንቻይ አ ያይያ አሳቱዋ ናጌ፤
እ ኡንቱንቱ ዩሹዋን ግዲደ፥ ኡንቱንታ አሼ።
8 መꬍና ጎዳይ ኬካ ግድያዋ ጼል በእተ። 1 ጰጽ. 2:3
አኮ ባቃትያ አሳይ አንጀቴዳዋ።
9 ህንተኖ፥ አ ጌሻ አሳቶ፥ መꬍና ጎዳዉ ያይተ፤
አያዉ ጎፐ፥ አዉ ያይያ ኡባቶ አያይነ ፓጨና።
10 ጋሞቱካ ምያዌ ꬋይና ኮሻቲኖ፤
ሽን መꬍና ጎዳ ኮይያዋንቶ ሎኦባይ ፓጨና።
11 ታ ታማረቶ፥ ሃ ዪተ፤ ስስተ፤
መꬍና ጎዳ ያሻ ታን ህንተና ታማርሳና።
12 ሎኦ ደኡዋ ደአናዉነ
ኬካባ በአና ማላ፥ 1 ጰጽ. 3:10-12
ባረ ላይꬃይ አዱቃናዉ ኮይያ አሳይ ኦኔ?
13 ነ እንጻርሳይ ኢታባ ሃሳየናዳን፥
ነ ዶናይካ ጭሜናዳን ተአ።
14 ኢታፐ ሻከታ፤ ሎኦባ ኦꬃ፤
ሳሮተꬃ ሎይꬃ ኮያደ ካላ።
15 መꬍና ጎዳ አይፊ ጽሎቱዋኮ ጼሌ፤
ቃይ አ ሀይꬃይካ ኡንቱንቱ ዋሱዋ ሀይዜ።
16 ኡንቱንታ ሀሳይስያዋ ቢታፐ ꬋይሳና ማላ፥
መꬍና ጎዳይ ኢታ ኦꬅያዋንታ፥
ባረ ሀንቁዋ ሶምኡዋን ጼሌ።
17 ጽሎቱ ዋሲኖ፤
መꬍና ጎዳይ ኡንቱንቱ ዋሱዋ ስሴ።
እ ኡንቱንቱ መቱዋ ኡባፐ አሼ።
18 መꬍና ጎዳይ ዎዛናይ መኤዳዋንቶ ማታና፤
ቃይ ባረንቱ ህዶታ ቃንጼዳዋንታ አሼ።
19 ጽሎ አሳ መቱ ዳራ፤
ሽን መꬍና ጎዳይ አ ሄ ኡባፐ አሼ።
20 ጾሳይ አ ምንꬅ ናግያ ድራዉ፥ ዮሃ. 19:36
አ መቀꬃፐ እቱነ መኤና።
21 ኢታቱዋ ኢታተꬃይ ዎꬋና፤
ጽሎቱዋ እጽያዋንቱ ፕርደታና።
22 መꬍና ጎዳይ ባረ ቆማቱዋ አሼ።
አኮ ባቃቲደ ኦንነ ፕርደተና።