46
ጾሳይ ኑናና ደኤ
ዛማረቱዋ ካፖ ቆረ ናናቱ እምና የጸቴዳ፥ ዎዶሮ ናና የꬃ ሂላን ጻፈቴዳ የꬃ.
1 ጾሳይ ኑን ናገት አትያ ሳነ ኑዉ ዎልቃ።
ኑና መቱ ጋክያ ዎደ፥
ማዳናዉ እ ኡባ ገደ ማታን ደኤ።
2 ሄዋ ድራዉ፥ ቢታይ ቃጽንቶካ፥
ዎይ ደረቱ አባን ኩንድንቶካ፥
ኑን ያዮኮ።
3 አባ ቤታይ ጉሚደ፥ ሆሙዋ ማይንንቶካ፥
አ ዎልቃማ ሆቢያን ደረቱ ዪቂዪቂንቶካ፥
ኑን ያዮኮ።
4 እት ሻፋይ ደኤ።
ሄ ሻፋይ ጎጊደ፥ ጾሳ ካታማ፥
ኡባፐ ꬎቂያ ጾሳይ ደእያ ጌሻ ሳኣ ናሸቼ።
5 ጾሳይ አ ግዶን ደእያ ድራዉ፥
ሄ ካታማይ ቃጸና።
ዎንታ ጉራን ጾሳይ አ ማዳና።
6 ጋድያ አሳይ ሻባረቴ፤
ካዉተꬃቱ ቃጺኖ።
ጾሳይ ባረ ቃላ ስሴዳ ዎደ፥ ሳአይ ሴሬ።
7 መተꬃ ኡባ ጎዳይ ኑናና ደኤ፤
ያቆባ ጾሳይ ኑን ቆሰት አትያ ሳኣ።
8 ሃ ዪተ፤ መꬍና ጎዳይ ኦሱዋ ጼልተ፤
እ ሳኣን አሄዳ ባሻ በእተ።
9 እ ሳኣ ጋጻ ጋካናዉ ደእያ ኦላ ተኤ፤
ዎንዳፍያ መንꬄ፤
ቶራ መንꬄ፤
ጎንዳልያካ ታማን ጹጌ።
10 ዎፑ ጊተ፤ ታን ጾሳ ግድያዋ ኤርተ።
ታን ካዉተꬃቱዋ ግዶን ꬎቃይ።
ቃይ ቢታ ቦላንካ ꬎቃይ።
11 ኡባፐ ዎልቃማ መꬍና ጎዳይ ኑናና ደኤ፤
ያቆባ ጾሳይ ኑን ቆሰት አትያ ሳኣ።