ጌሻ ማጻፋ ማዝሙርያ 54

ሞርክያ ኩሽያፐ አታናዉ ሺቄዳ ዎሳ

ዛማረቱዋ ካፖ የጸቴዳ፥ ዚፋን ደእያ አሳቱ ሳኦላኮ ቢደ፥ “ዳውት ኑ ቢታን ቆሰቴዳ” ያጊደ ኦዲደ ስምና ዳዊተ አኬካን ዲጼዳ ግንጹዋ.

1 አቤት ጾሳዉ፥ ነ ሱንꬃን ታና አሻ፤

ነ ዎልቃን ታና ሻትንꬃ።

2 አቤት ጾሳዉ፥ ታ ዎሳ ስሳ፤

ታ ዶና ሃሳያ ሀይዛ።

3 ኦቶራንቻቱ ታ ቦላ ደንዲኖ፤

ዳጋንꬅያ አሳቱ ታና ዎꬋናዉ ኮዪኖ።

ኡንቱንቱ ጾሳ አላለ ጊክኖ።

4 ሄኮ ጾሳይ ታና ማድያዋ፤

ጎዳይ ታና ዘምፕስያዋ።

5 አቤት ጾሳዉ፥ ታ ሞርከቶ ኡንቱንቱ ኢታተꬃ ዛራ።

ኔን አማነትያዋ ግድያዋዳን፥

ኡንቱንታ ꬋይሳ።

6 አቤት መꬍና ጎዳዉ፥ ታን ታ ሸንያን ነዉ ያርሻና፤

ኔን ኬካ ግድያ ድራዉ፥

ታን ነ ሱንꬃ ጋላታና።

7 አያዉ ጎፐ፥ ኔን ታና

ታ መቱዋ ኡባፐ አሻዳ፤

ታ ሞርከቱ ጾነትያዋ ታ አይፍያን በኣድ።