69
ማዱዋ ደማናዉ ሺቆ ዎሳ
ዛማረቱዋ ካፖ፥ ጪሻ ዋꬃ ግያ ዋጹዋን የጸቴዳ ዳዊታ ማዝሙርያ
1 አቤት ጾሳዉ፥ ታና አሻ፤
አያዉ ጎፐ፥ ሃꬃይ ታዉ ቆꬍያ ጋኬዳ።
2 ገዲ ኤቂያ ሳአይ ባይና ጫርያን ሙከታድ፤
ጪሞ ሃꬃ ግዶ ገላድ፤
ሃꬃ ዙሉ ታ ቦላ ባና ሀኔ።
3 ማዶ ዋሳደ ዳቡራይ፤
ታ ኮቶኒካ መሌዳ።
ታ ጾሳይ አሌ ጋደ ጼልሽን፥
ታ አይፊ ጋልጄዳ።
4 ታና ጮ እጽያዋንቱ፥
ታ ሁጲያ ብናናፐ ዳራ። ማዝ. 35:19፤ ዮሃ. 15:25
ዎርዱዋን ታና ሞርክያዋንቱነ፥
ꬋይሳናዉ ኮይያዋንቱ ዳሬድኖ።
ታን ዎልቃንꬃ አካቤና ሚሻ ታና ጭግሲኖ።
5 አቤት ጾሳዉ፥ ታ ባይዙዋ ኤያተꬃ ኔን ኤራሳ፤
ታን ኦꬄዳ ናጋራይ ኔፐ ቆሰተና።
6 አቤት ጎዳዉ፥ ኡባፐ ዎልቃማ መꬍና ጎዳዉ፥
ኔና ህዶታን ናግያዋንቱ፥
ታ ጋሱዋን ዬላቶፕኖ።
አቤት እስራኤልያ ጾሳዉ፥ ኔኮ ሺቅያዋንቱ
ታ ጋሱዋን ካዉሾፕኖ።
7 ታን ቦርያ ዳንዳዬዳዌነ
ታ ሶምኢ ዬላ ማዬዳዌ ነ ድራሳ።
8 ታን ታ እሻቶ እማꬃ፥
ቃይ ታ አት ናናቶ አላጋ ግዳድ።
9 ታን ነ ጎልያዉ ሴለትያ ሴላይ፥
ታና ታማዳን ጉዴ፤ ዮሃ. 2:17፤ ሮመ 15:3
ኔና ቦርያዋንቱ ቦሪ ታ ቦላ ዎꬌዳ።
10 ታን ጾማደ፥ ታ ሁጲያ ካዉሼዳዌ፥
ታዉ ቅሊጩዋ ግዴዳ።
11 ታን ካዩዋ ማዩዋ ማዬዳ ዎደ፥
ኡንቱንቶ ቶሳዉ ግዳድ።
12 ካታማ ፐንግያን ኡትያዋንቱ ታና ቅሊጪኖ፤
ማꬆትያዋንቱ ታባ የꬃ ከሲኖ።
13 ሽን አቤት መꬍና ጎዳዉ፥ ታና ግዶፐ፥
ታን ኔና ዎሳይ።
አቤት ጾሳዉ፥ ነ ዶስያ ዎድያን፥
አገና ነ ሲቁዋ ዳሩዋን፥
ኔን አሻና ጌዳዋዳን ታዉ ዛሩዋ እማ።
14 ጫርያን ሙከተናዳን ታና አሻ።
ታና እጽያዋንቱፐ፥
ጪሞ ሃꬃቱዋፐ ኔን ከሳ አካ።
15 ሃꬃ ድኡዋን ታና አፍሶፓ፤
ዎይ ጪሞ ኦላን ታና ምትሶፓ፤
ዎይ ዱፉዋ ዶና ታ ቦላ ጎርድሶፓ።
16 አቤት መꬍና ጎዳዉ፥ አገና ነ ሲቁዋ ኬካተꬃዳን፥
ታዉ ዛሩዋ እማ።
ነ ቃረታ ዳሩዋዳን ታኮ ስማ።
17 ታፐ ነ ቆማፐ ነ ሶምኡዋ ገንꬆፓ፤
ታን ዋየትያ ድራዉ፥ ታዉ ኤለ ዛሩዋ እማ።
18 ኔን ታኮ ሺቃ፤ ታና ዎዛ፤
ታ ሞርከቱዋፐ ታና ላአ ከሳ።
19 ታን ቦርያ፥ ዬላነ፥
ካዉሻ አኬዳዋ ኔን ኤራሳ።
አያዉ ጎፐ፥ ታ ሞርከቱዋ ኡባ ኔን በኣሳ።
20 ቦሪ ታ ዎዛና ፓጸናዳን መንꬆ ድራዉ፤
ህዶታ ቃንጻድ።
ታዉ ቃረትያዋ ኮያድ።
ሽን እቱነ ባዋ፤
ታና ምንꬅያ አሳ ጼላድ፤ ሽን ደማበይከ።
21 ታን ኮሻቴዳ ዎደ፥
ታዉ ጫምያ ቁማ አꬄድኖ።ማቶሳ 27:48፤ ማር. 15:36፤ ሉቃሳ 23:36፤ ዮሃ. 19:28-29
ታን ሳመቴዳ ዎደ፥
ታዉ ጫላ ዎይንያ ኤሳ እሜድኖ።
22 ኡንቱንቱ ምያ ሳምፓይ ኡንቱንቶ ጲረ ግዶ። ሮመ 11:9-10
ኡንቱንቱ ያርሹዋ ያርሺደ፥
ምያ ግብራይ ኡንቱንቶ ግትያ ግዶ።
23 ጼለናዳን ኡንቱንቱ አይፊ ጎዘቶ፤
ኡንቱንቱ ጋዱዋ ኡባ ገደ ኮኮርሳ።
24 ነ ሀንቁዋ ኡንቱንቱ ቦላ ትጋ፤
ነ ሱሎ ሀንቁ ኡንቱንታ የደርሲደ ኦይቆ።
25 ኡንቱንቱ ካምቡ መላ ደኦ፤ ኪታ 1:20
ኡንቱንቱ ዱንካንያን ኦንነ ደኦፖ።
26 አያዉ ጎፐ፥ ኡንቱንቱ፥
ኔን ሙሬዳዋንታ የደርሲኖ፤
ቃይ ኔን ደቼዳዋንቱ ቱጋባ
ደንꬂደ ሃሳዪኖ።
27 ኔን ኡንቱንቱ ናጋራ ቦላ
ናጋራ ጉጃናዳን አጋ፤
ነ ማሮተꬃፐ ኡንቱንታ አያይነ ጋኮፖ።
28 ኡንቱንቱ ደኡዋ ማጻፋፐ ቁጨትኖ፤ ከሳ 32:32፤ ሳፃ 3:5፤ 13:8፤ 17:8
ጽሎ አሳና ማዝጋበቶፕኖ።
29 ታን ሳከታደነ ቱጋታደ ደአይ።
አቤት ጾሳዉ፥ ታና አሻደ፥
ሳሮ ሳኣን ዎꬃ።
30 ታን ጾሳ ሱንꬃ የꬃን ጋላታና፤
ጋላታ እሙዋን አ ዳርሳና።
31 ሄዌካ፥ ቦራ ያርሽያዋፐ
ዎይ ካጫማ ኮሩማ ያርሽያዋፐ
አꬊደ፥ መꬍና ጎዳ ናሸቻና።
32 ናቀቴዳዋንቱ ታና ጾሳይ፥
አሼዳዋ በኢደ ናሸትኖ።
ህንተኖ ጾሳኮ ሺቅያዋንቶ፥
ህንተ ዎዛናይ ምነቶ።
33 አያዉ ጎፐ፥ መꬍና ጎዳይ ህዬሳቱዋ ስሴ፤
ቃሾ ጎልያን ደእያ ባረ አሳካ ካና።
34 ሳሉነ ሳአይ፥ ቃይ አባይነ
አ ግዶን ዎጽ ቃጽያ ኡባቱ ጾሳ ጋላትኖ።
35 አያዉ ጎፐ፥ ጾሳይ ጽዮነ አሻና፤
ይሁዳ ካታማቱዋ ዛሪደ ኬጻና።
አ አሳይ ያን ደአናነ ሄ ቢታይ ኡንቱንቱሳ ግዳናዋ።
36 አ ቆማቱዋ ናናቱ ሄ ቢታ ላታና፤
አ ሱንꬃ ሲቅያዋንቱ ያን ደአና።